ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະການລົງທຶນ ເນັ້ນເສດຖະກິດດີຈີຕອນ (Digital) ມີບົດບາດສຳຄັນຕໍ່ການພັດທະນາ.

20/06/2020

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະການລົງທຶນ ເນັ້ນເສດຖະກິດດີຈີຕອນ (Digital) ມີບົດບາດສຳຄັນຕໍ່ການພັດທະນາ.

        

     ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການ​ລົງທຶນ ພ້ອມ​ດ້ວຍ​ຄະນະໄດ້​ລົງ​ຢ້ຽມຢາມ ບໍລິສັດ ຫົວ​ເຫວີຍ​ລາວ ໃນ​ວັນ​ທີ 23 ພຶດສະພາ 2020 ​ຜ່ານ​ມາ​, ເຊິ່ງທ່ານໄດ້​ສະແດງ​ຄວາມ​ຊົມເຊີຍ​ຕໍ່​ບໍລິສັດ​ຫົວ​ເຫວີຍ​ທີ່​ເອົາໃຈໃສ່​ພັດທະນາ  ICT ຢູ່ ສປປ ລາວ ແລະເນັ້ນວ່າ ເສດຖະກິດ​​ດີຈີ​ຕ໋ອນ​ມີ​ບົດບາດ​ສຳຄັນ​ຕໍ່​ການ​ພັດທະນາ​ເສດ​ຖະ​ກິດ​-​ສັງ​ຄົມ. 

     ໃນ​ໂອກາດ​ນີ້, ທ່ານ ຫູ ເຫວີຍ​ຫົວ  ອໍາ​ນວຍ​ການ ບໍລິສັດ​ ຫົວ​ເຫວີຍ​ລາວ ໄດ້​ລາຍ​ງານ​ຜົນ​ການ​ດໍາ​ເນີນ​ທຸລະ​ກິດ​ຂອງ ບໍລິສັດ ຫົວ​ເຫວີຍ ຢູ່​ໃນ​ທົ່ວ​ໂລກ, ການ​ດໍາ​ເນີນ​ທຸລະ​ກິດ​ຂອງ ບໍລິສັດ ຫົວ​ເຫວີຍ​ລາວ ແລະ ວິໄສ​ທັດ​ກ່ຽວ​ກັບ​ກາລະ​ໂອກາດ​ຂອງ ສປປ ລາວ ໃນ​ການ​ເປັນ​ສູນ​ກາງ​ທາງ​ດ້ານ ICT ຢູ່​ໃນ​ອະ​ນຸ​ພາກ​ພື້ນ ພ້ອມ​ທັງ​ເຊີນ​ຊົມ​ຫ້ອງ​ວາງສະແດງ Galileo Exhibition Hall on the Cloud ທີ່​ຕັ້ງ​ຢູ່​ເມືອງເຊິ​ນ​ເຈິນ, ສປ ຈີນ ໂດຍ​ຜ່ານ​ລະບົບ​ກອງ​ປະຊຸມ​ທາງ​ໄກ. 

ທ່ານ ຫູ ເຫ​ວີຍ​ຫົວ ໄດ້​ສະແດງ​ຄວາມ​ຂອບໃຈ​ຕໍ່ ລັດຖະບານ​ລາວ ທີ່​ໃຫ້ການ​ສະໜັບສະໜູນ​ທຸລະ​ກິດ​ຂອງ ຫົວ​ເຫວີຍ ຕະຫຼອດ​ໄລຍະ​ທີ່​ຜ່ານ​ມາ ຊຶ່ງ​ໄດ້​ສ້າງ​ເງື່ອນໄຂ​ອັນ​ດີ​ໃຫ້ ບໍລິສັດ ຫົວ​ເຫວີຍ ໄດ້​ພັດທະນາ​ຢ່າງ​ຕໍ່​ເນື່ອງ ແລະ ມີ​ຮາກ​ຖານ​ທີ່​ດີ ແລະ ໝັ້້ນ​ຄົງ​ໃນ​ພາກ​ພື້ນ ແລະ ສປປ ລາວ. ບໍລິສັດ ຫົວ​ເຫວີຍ ໄດ້​ດໍາ​ເນີນ​ທຸລະ​ກິດ​ຢູ່ ສປປ ລາວ ມາ​ເປັນ​ເວລາ 20 ກວ່າ​ປີ​ແລ້ວ ແລະ ໃນ​ອະນາຄົດ​ກໍ​ຍັງ​ຈະ​ສືບຕໍ່​ເພີ່ມ​ທະວີ​ການ​​ຮ່ວມ​ມື​ກັບ​ຜູ້​ປະກອບ​ການ​ໃນ​ລາວ ເພື່ອ​ປັບປຸງ​ຄຸນ​ນະ​ພາບ​ເຄືອ​ຂ່າຍ ແລະ ໃຫ້​ບໍລິການ​ສື່ສານ​ທີ່​ດີ​ຂຶ້ນ​ສຳລັບ​ປະຊາຊົນ​ລາວ. ບໍລິສັດ​ ຫົວ​ເຫວີຍ ຈະ​ສະໜັບສະໜູນ​ການ​ປັບປຸງ​ໂຄງ​ສ້າງ​ພື້ນຖານ ICT ແລະ ຍຸດທະສາດ​ເສດຖະກິດ​ດີ​ຈີ​ຕ໋ອນ (Digital) ​ຂອງ ສປປ ລາວ ຢ່າງ​ຕໍ່​ເນື່ອງ ແລະ ສືບຕໍ່​ລົງທຶນ​ເຂົ້າ​ໃນ​ການ​ພັດທະນາ​ຄວາມ​ສາມາດ​ດ້ານ ICT ໃຫ້​ແກ່ ສປປ ລາວ, ນອກຈາກ​ນັ້ນ, ບໍລິສັດ ຫົວ​ເຫວີຍ ລາວ ໄດ້​ເຊັນ​ບົດ​ບັນທຶກ​ຄວາມ​ເຂົ້າໃຈ ກັບ ກົມ​ແຜນການ ແລະ​ ການ​ຮ່ວມ​ມື, ກະຊວງ​ໄປສະນີ ໂທລະ​ຄົມມະນາຄົມ ແລະ ການ​ສື່ສານ ເພື່ອ​ສະໜອງ​ການ​ຝຶກ​ອົບຮົມ​ໃຫ້​ແກ່ບຸກ​ຄະລາ​ກອນ​ຂອງ​ທາງ​ດ້ານ ICT ຂອງ​ລາວ​ຈໍາ​ນວນ 300 ຄົນ ໃນ​ໄລຍະ​ປີ 2020-2022.

ໃນ​ໂອກາດ​ດັ່ງກ່າວ, ທ່ານ ສອນ​ໄຊ ສີ​ພັນ​ດອນ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະການລົງທຶນ ໄດ້​ສະແດງ​ຄວາມ​ຂອບໃຈ​ຕໍ່ ບໍລິສັດ ​ຫົວ​ເຫວີຍ ທີ່​ໄດ້​ປະກອບສ່ວນ ໃນ​ການ​ພັດທະນາ​ອຸດສາຫະກຳ​ໂທລະ​ຄົມມະນາຄົມ​ຂອງ​ລາວ ພ້ອມ​ເນັ້ນ​​ວ່າ: “ເສດຖະກິດ​ດີຈີຕ໋ອນ (Digital) ​ຈະ​ມີ​ບົດບາດ​ສຳຄັນ​ຢ່າງ​ຫຼວງຫຼາຍ​ຕໍ່​ການ​ພັດທະນາ​ເສດ​ຖະ​ກິດ​-​ສັງຄົມ​ໃນ​ອະ​ນາ​ຄົດ, ອຸດສາຫະກຳ​ໂທລະ​ຄົມມະນາຄົມ ເປັນ​ໜຶ່ງ​ໃນ​ຂະແໜງການ​ບຸລິ​ມະ​ສິດ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ ສປປ ລາວ, ໃນຕໍ່ໜ້າ ຈະ​ຕ້ອງ​ສືບຕໍ່​ພັດທະນາພື້ນຖານ​ໂຄງ​ລ່າງ​ຂອງ​ການ​ຫັນ​ເປັນ​ດີຈີຕ໋ອນ(Digital)​ໃນ​ລາວ ເປັນຕົ້ນລະບົບ e-government ແລະ smart city ແລະສະເໜີໃຫ້ ບໍລິສັດ ຫົວ​ເຫວີຍ ໃຫ້​ຄຳ​ແນະນຳ​ທາງ​ດ້ານ​ວິຊາ​ການ ແລະສະໜັບສະໜູນການ​ພັດທະນາ  ICT ແລະເສດຖະກິດ​ດີຈີ​ຕ໋ອນ (Digital) ​ຂອງ​ລາວ” ພ້ອມ​ທັງສະແດງ​ຄວາມ​ຂອບໃຈ​ຕໍ່ ບໍລິສັດ ຫົວ​ເຫວີຍ ໃນ​ການ​ຝຶກ​ອົບຮົມ​ໃຫ້​ແກ່​ຜູ້​ທີ່​ມີ​ພອນ​ສະຫວັນ​ດ້ານ ICT ແລະ ການ​ຊ່ວຍ​ກໍ່ສ້າງ​ບຸກ​ຄະລາ​ກອນ​ດ້ານ​ໄອ​ຊີ​ທີ​ໃນ ສປປ ລາວ ມາ​ແຕ່​ປີ 1998 ຫຼາຍ​ກວ່າ 3.000 ຄົນ ລວມ​ເຖິງ​ການ​ຊ່ວຍເຫຼືອ​ຜູ້​ປະສົບ​ອຸ​ທົກ​ກະ​ໄພ​ນ້ຳ​ຖ້ວມ​ທີ່ ແຂວງອັດ​ຕະ​ປື​ໃນ​ປີ 2018 ແລະ ປະກອບສ່ວນ​ຊ່ວຍເຫຼືອ​ໃນ​ໄລຍະ​ການ​ລະບາດ​ຂອງ​ພະຍາດ​ໂຄ​ວິດ-19 ແລະ ຫວັງ​ວ່າ ບໍລິສັດ ຫົວ​ເຫວີຍ ຈະ​ສືບຕໍ່​ລົງ​ທຶນ​ໃນ​ລາວ​ຕໍ່​ໄປ​ໃນ​ອະນາຄົດ ແລະ​ຝຶກ​ອົບຮົມ​ບຸກ​ຄະລາ​ກອນ​ດ້ານ ICT ໃນ​ທ້ອງຖິ່ນເພືອສະໜັບສະໜູນ​ການ​ພັດທະນາ​ເສດຖະກິດ​ດີຈີ​ຕ໋ອນ​ຢູ່ ສປປ ລາວ.

 

ສູນບໍລິການຂໍ້ມູນສະຖິຕິ
ວິໄສທັດຮອດປີ2030 ແລະ ຍຸດທະສາດພັດທະນາເສດຖະກິດ-ສັງຄົມໄລຍະ10ປີ (2016-2025)
ຫ້ອງການບໍລິການ ການລົງທຶນປະຕູດຽວ
ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ