ໃນວັນທີ 23 ຕຸລາ 2020 ທີ່ກະຊວງແຜນການ ແລະ ການລົງທືນໄດ້ ຈັດຕັ້ງຂະບວນການບໍລິຈາກເລືອດ ເພື່ອ ຂໍານັບຮັບຕ້ອນກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ກະຊວງ ຜທ ໃຫ້ກຽດເປີດພິທີ ໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງ ຜທ ໂດຍມີ ມີ ບັນດາຮອງລັດຖະມົນຕີ ໃນຄະນະກໍາມະການຄຸ້ມຄອງການລົງທຶນ ຂັ້ນສູນກາງ, ບັນດາທ່ານ ຄະນະນໍາ ກະຊວງ, ທ່ານ ຮອງປະທານອົງການກາແດງລາວ ແລະ ທ່ານຫົວໜ້າກົມ, ຮອງກົມ, ຫົວໜ້າຫ້ອງການ, ສູນ ພ້ອມດ້ວຍບັນດາ ພະນັກງານພາຍໃນກະຊວງ ຜທ ເຂົ້າຮ່ວມຢ່າງເປັນຂະບວນຟົດຟື້ນ.
ຄະນະພັກ-ຄະນະນໍາ ແລະ ພະນັກງານ ກຜທ ເມື່ອໃດກໍເຫັນຄວາມສຳຄັນໃນການປະກອບສ່ວນເຂົ້າສູ່ຂະບວນການບໍລິຈາກເລືອດ ເຊິ່ງ ໃນປີ 2019 ພະນັກງານທົ່ວກະຊວງ ໄດ້ບໍລິຈາກເລືອດ 42 ເທື່ອຄົນ ເຊິ່ງລື່ນແຜນການ ຈໍານວນ 02 ເທື່ອຄົນ ແລະ ຄາດໝາຍສູ້ຊົນ ໃນປີ 2020 ນີ້ ແມ່ນ ຈໍານວນ 57 ເທື່ອຄົນ ເຊິ່ງ ໃນວັນທີ 27 ມີນາ 2020 ມີພະນັກງານຮ່ວມບໍລິຈາກທັງໝົດ 23 ເທື່ອຄົນ ແລະ ໃນມື້ນີ້ຈະໄດ້ຈັດຂື້ນເປັນຄັ້ງທີ່ 2 ຄາດວ່າຈະໃຫ້ໄດ້ຕາມແຜນການທີ່ວາງໄວ້.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງ ຜທ ໄດ້ຍ້ອງຍໍຊົມເຊີຍ ພະນັກງານທີໄດ້ເສຍສະຫຼະປະກອບສ່ວນເພື່ອສັງຄົມ ແລະ ມີຄຳເຫັນວ່າ “ຂະບວນການບໍລິຈາກເລືອດຊ່ວຍເຫຼືອສັງຄົມໃນມື້ນີ້ ເປັນການສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ກະຊວງ ຜທ, ວັນສ້າງຕັ້ງພັກຄົບຮອບ 65 ປີ ແລະວັນປະກາດເອກະລາດຄົບຮອບ 75 ປີ ນອກຈາກນີ້ ຍັງເປັນການຊ່ວຍເຫຼືອປະຊາຊົນ ທີ່ປັດຈຸບັນນີ້ສູນເລືອດແຫ່ງຊາດ ແລະສູນເລືອດແຂວງທົ່ວປະເທດຂາດແຄນເລືອດ. ອີກດ້ານໜຶ່ງ ການລະບາດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (Covid-19) ໄດ້ລະບາດໃນຫຼາຍປະເທດ ລວມເຖິງປະເທດລາວເຮົາ, ສະນັ້ນ, ໃນເງື່ອນໄຂດັ່ງກ່າວ, ສະພາບການບໍລິຈາກເລືອດແມ່ນມີຄວາມສໍາຄັນ ແລະມີຄວາມທ້າທາຍສູງ”.
