ໃນວັນທີ 06 ຕຸລາ 2020, ກະຊວງແຜນການ ແລະ ການລົງທຶນ ໄດ້ຈັດພິທີເຊັນສັນຍາຮັບເໝົາລວມໂຄງການກໍ່ສ້າງພື້ນຖານໂຄງລ່າງຫຼຸດຜ່ອນຄວາມທຸກຍາກ ຊຸດທີ 1 ທີ່ຫ້ອງການ ຄະນະກໍາມະການຮ່ວມມືລາວ-ຈີນ ໂດຍມີ ທ່ານ ໄຊຊະນະ ສິດທິພອນ ຫົວໜ້າຫ້ອງການຄະນະກໍາມະການຮ່ວມມືລາວ-ຈີນ ລົງນາມຕາງໜ້າເຈົ້າຂອງໂຄງການຝ່າຍລາວ, ທ່ານ Zhang Youzuo ຜູ້ອຳນວຍການຫ້ອງການປະຈໍາລາວຂອງກຸ່ມບໍລິສັດກໍ່ສ້າງ-ລົງທຶນ ແລະ ຫຸ້ນສ່ວນ ແຂວງ ຢູນນານ ຈໍາກັດ ລົງນາມຕາງໜ້າຜູ້ຮັບເໝົາ, ທ່ານ ປອ ກິແກ້ວ ຈັນທະບູຣີ ຮອງລັດຖະມົນຕີ ກະຊວງແຜນການ ແລະ ການລົງທຶນ, ຮອງຫົວໜ້າຄະນະຊີ້ນໍາລວມການຈັດຕັ້ງປະຕິບັດໂຄງການ 4 ຕື້ຢວນ ແລະ ທ່ານ Jin Guofeng ຕາງໜ້າ ບໍລິສັດຄຸ້ມຄອງໂຄງການຝ່າຍຈີນລົງນາມເປັນສັກຂີພະຍານ. ພິທີເຊັນສັນຍາດັ່ງກ່າວຍັງມີບັນດາທ່ານ ໃນຄະນະຊີ້ນໍາລວມໂຄງການ 4 ຕື້ຢວນ ແລະ ຄະນະຮັບຜິດຊອບໂຄງການດ່ັງກ່າວ ຈາກຂະແໜງການກ່ຽວຂ້ອງຂອງຝ່າຍລາວ ໃຫ້ກຽດເຂົ້າຮ່ວມ.
ໂຄງການດັ່ງກ່າວໄດ້ຈັດຕັ້ງການປະມູນຂຶ້ນ ໃນວັນທີ 9 ກັນຍາ 2020 ແລະ ໄດ້ຮັບຮູ້ຜົນໃນວັນທີ 16 ກັນຍາ 2020 ທີ່ຜ່ານມາ, ໂດຍແມ່ນ ກຸ່ມບໍລິສັດກໍ່ສ້າງ-ລົງທຶນ ແລະ ຫຸ້ນສ່ວນ ແຂວງຢູນນານ ຈໍາກັດ ເປັນຜູ້ຊະນະການປະມູນ, ເຊິ່ງບໍລິສັດມີໄລຍະການກໍ່ສ້າງທັງໝົດ 18 ເດືອນ, ໄລຍະຮັບປະກັນຄຸນນະພາບ 2 ປີ.
