ກຜທ ວາງພວງມາລາ ແລະ ກະຕ່າດອກໄມ້ ເພື່ອຊົມເຊີຍວັນສ້າງຕັ້ງກອງທັບປະຊາຊົນລາວ ຄົບຮອບ 72 ປີ

by | Jan 22, 2021 | ການເຄື່ອນໄຫວ | 0 comments

ໃນຕອນເຊົ້າວັນທີ 20 ມັງກອນ 2021, ທ່ານ ນາງ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍຄະນະພັກ-ຄະນະນຳ ແລະ 3 ອົງການຈັດຕັ້ງມະຫາຊົນ ໄດ້ເຂົ້າວາງພວງມາລາ ຢູ່ຕໍ່ໜ້າສຸສານນັກຮົບປະຕິວັດແຫ່ງຊາດ (ຫຼັກ 24) ແລະ ວາງກະຕ່າດອກໄມ້ຕໍ່ໜ້າຮູບປັ້ນ ປະທານ ໄກສອນ ພົມວິຫານ.

ຈຸດປະສົງຕົ້ນຕໍແມ່ນເພື່ອຊົມເຊີຍຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແລະ ເພື່ອສ້າງຂະບວນການ ຊົມເຊີຍວັນສ້າງຕັ້ງກອງທັບ ປະຊາຊົນລາວ ຄົບຮອບ 72 ປີ, ຂໍ່ານັບຮັບຕ້ອນວັນສ້າງຕັ້ງພັກຄົບຮອບ 66 ປີ ພ້ອມທັງເປັນການສະແດງຄວາມເຄົາລົບຮັກ, ຮູ້ບຸນຄຸນ ແລະ ລະນຶກເຖິງຄຸນງາມຄວາມດີຂອງບັນດາສະຫາຍ ອາດີດການນຳ, ພະນັກງານ ແລະ ນັກຮົບ ທີ່ເສຍສະຫຼະຊີວິດເພື່ອປະເທດຊາດ, ເພື່ອຄວາມເປັນເອກະລາດແຫ່ງຊາດ ແລະ ເພື່ອຄວາມຢູ່ດີກິນດີຂອງປະຊາຊົນລາວບັນດາເຜົ່າ ແລະ ລະນຶກເຖິງ ປະທານ ໄກສອນ ພົມວິຫານ ຜູ້ນຳທີ່ດີເດັ່ນ ແລະ ເຄົາລົບຮັກຂອງພັກ-ລັດ ແລະ ປວງຊົນລາວທັງຊາດ. ຈາກນັ້ນ, ຄະນະດັ່ງກ່າວ ກໍໄດ້ຢ້ຽມຊົມ ພິພິທະພັນ ໄກສອນ ພົມວິຫານ ເພື່ອຮ່ຳຮຽນກ່ຽວກັບຊີວິດ ແລະ ພາລະກິດປະຕິວັດຂອງເພິ່ນ, ລວມທັງວຽກງານອະນຸລັກ, ປົກປັກຮັກສາ ແລະ ເສີມຂະຫຍາຍມູນເຊື້ອມໍລະດົກວັດທະນະທຳອັນດີງາມຂອງຊາດ.