ກະຊວງແຜນການ ແລະການລົງທຶນ ຮ່ວມກັບ ອົງການສະຫະປະຊາຊາດ ປະຈຳ ສປປ ລາວ ໄດ້ຈັດກອງປະຊຸມປຶກສາຫາລືກ່ຽວກັບການກະກຽມກອງປະຊຸມໂຕະມົນປະຈໍາປີ 2023 ແລະກອງປະຊຸມປະທານ-ປະທານຮ່ວມຂອງໜ່ວຍງານຂະແໜງການ ຂື້ນ ທີ່ນະຄອນຫລວງວຽງຈັນ,ໃນວັນທີ 16 ມັງກອນ 2024 ໂດຍການເປັນປະທານ ຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະການລົງທຶນ ແລະ ທ່ານ ບັກໂຄເດຍ ເບີຄະນ໋ອບ, ຜູ້ປະສານງານອົງການ ອົງການສະຫະປະຊາຊາດ ປະຈໍາ ສປປ ລາວ, ເຊີ່ງມີຜູ້ບັນດາທ່ານ ຮອງລັດຖະມົນຕີ, ຫົວໜ້າຫ້ອງການ, ຫົວໜ້າກົມ, ຜູ້ຕາງໜ້າ ຈາກກະຊວງ ຂະແໜງການ ແລະ ຄູ່ຮ່ວມທະນາ, ບັນດາທ່ານເອກອັກຕະລັດຖະທູດ,ຫົວໜ້າອົງການຈັດຕັ້ງສາກົນ ໂດຍຕາງໜ້າ ໃຫ້ແກ່ ປະທານ-ປະທານຮ່ວມ ຂອງໜ່ວຍງານຂະແໜງການ ເພື່ອປືກສາຫາລືກັບຄູ່ຮ່ວມພັດທະນາ ເຂົ້າຮ່ວມເຂົ້າຮ່ວມ ຢ່າງພ້ອມພຽງ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອກະກຽມ ໃຫ້ແກ່ ກອງປະຊຸມ ໂຕະມົນ ປະຈຳປີ 2023; ກອງປະຊຸມ ໄດ້ຟັງການລາຍງານ ແລະປືກສາຫາລື ກ່ຽວກັບ: 1/ ຄວາມຄືບໜ້າໃນການຈັດຜັນຂະຫຍາຍຜົນຂອງ ກອງປະຊຸມ ໂຕະມົນ ປີ 2022 ທີ່ຜ່ານມາ; 2/ຈຸດປະສົງ, ເນື້ອໃນ ແລະ ຮູບແບບ ຂອງກອງປະຊຸມໂຕະມົນປະຈຳປີ 2023 ແລະ 3/ ຮ່າງບົດແນະນໍາ ກົນໄກຂອງ ຂະນວນການໂຕະມົນ.
ພ້ອມດຽວກັນນີ້, ບັນດາກະຊວງຂະແໜງການ ແລະ ຄູ່ຮ່ວມພັດທະນາ ທີ່ເປັນປະທານ ແລະປະທານຮ່ວມ ຂອງໜ່ວຍງານຂະແໜງການ (SWGs) ໄດ້ພ້ອມກັນປືກສາຫາລື ແລະ ປະກອບຄຳເຫັນ ກ່ຽວກັບຄວາມຄືບໜ້າ ໃນການຈັດຕັ້ງຜັນຂະຫຍາຍຜົນຂອງກອງປະຊຸມ ໂຕະມົນ ປີ 2022 ທີ່ຜ່ານມາ, ຊື່ງແມ່ນການປະກອບສ່ວນຂອງ ກະຊວງ ຂະແໜງການ, ຄູ່ຮ່ວມພັດທະນາ ແລະອົງການຈັດຕັ້ງສາກົນ (ໜ່ວຍງານຂະແໜງການ ແລະໜ່ວຍງານຂະແໜງການຍ່ອຍ); ໄດ້ມີການປະກອບຄໍາເຫັນ ຕໍ່ຈຸດປະສົງ, ເນື້ອໃນ ແລະຮູບແບບ ຂອງ ກອງປະຊຸມໂຕະມົນ ປະຈໍາປີ 2023 ເຊີ່ງຄາດວ່າ ຈະຈັດຂື້ນໃນວັນທີ 13 ກຸມພາ 2024 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ. ນອກຈາກນັ້ນ, ກອງປະຊຸມຍັງໄດ້ປະກອບຄຳເຫັນ ຕໍ່ຮ່າງບົດແນະນຳກົນໄກຂອງ ຂະບວນການໂຕະມົນ ເພື່ອເຮັດໃຫ້ກົນໄກ ການເຮັດວຽກຂອງ ກອງເລຂາ ຄະນະຊີ້ນຳລະດັບຊາບ ເພື່ອຂະບວນການໂຕະມົນ ແລະ ກອງເລຂາ ໜ່ວຍງານຂະແໜງການ ເພືື່ອປືກສາຫາລື ແລະເຮັດວຽກຮ່ວມກັບຄູ່ຮ່ວມພັດທະນາ ມີຄວາມຄ່ອງແຄ່ວ, ມີປະສິດທະພາບ ແລະປະສິດທິຜົນສູງຂື້ນ.
