ກອງປະຊຸມປຶກສາຫາລືລະຫວ່າງພາກລັດ ແລະ ເອກະຊົນ ເພື່ອສົ່ງເສີມການລົງທຶນໃນ ສປປ ລາວ ຄັ້ງທີ 15

by | Dec 17, 2021 | ການເຄື່ອນໄຫວ | 0 comments

 

ໃນວັນທີ 15 ທັນວາ 2021 ກະຊວງແຜນການ ແລະ ການລົງທຶນ ແລະ ສະຖານທູດຍີ່ປຸ່ນປະຈໍາ ສປປ ລາວ ໄດ້ຈັດ “ກອງປະຊຸມປຶກສາຫາລືພາກລັດ ແລະ ເອກະຊົນຍີ່ປຸ່ນ-ລາວຄັ້ງທີ 15” ຂຶ້ນທີ່ ກະຊວງແຜນການ ແລະ ການລົງທຶນ, ໂດຍໄດ້ຮັບການຮ່ວມມືຈາກສະພາອຸດສາຫະກໍາ ແລະ ການຄ້າຍີ່ປຸ່ນປະຈໍາ ສປປ ລາວ (JCCIL), ອົງການສົ່ງເສີມການຄ້າຍີ່ປຸ່ນປະຈໍານະຄອນຫຼວງວຽງຈັນ(JETRO),        ອົງການຮ່ວມມືສາກົນຍີ່ປຸ່ນປະຈໍາລາວ(JICA),ຫ້ອງ ການທະນາຄານຮ່ວມມືສາກົນ ປະຈໍາບາງກອກ (JBIC) ແລະ ອົງການການເງິນສາກົນປະຈໍາລາວ (IFC).

ກອງປະຊຸມໃນຄັ້ງນີ້ໄດ້ຮັບກຽດເປັນປະທານໂດຍ ພະນະທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ແລະ ຮ່ວມກັບພະນະທ່ານ ໂຄບາຢາຊິ ເຄນອິຈິ, ເອກອັກຄະຣາຊະທູດ ຍີ່ປຸ່ນປະຈໍາ ສປປ ລາວ ໂດຍມີພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມໃນຫ້ອງປະຊຸມ ແລະ ເຂົ້າຮ່ວມຜ່ານລະບົບ ທາງໄກ, ເຊິ່ງກອງປະຊຸມໄດ້ດໍາເນີນໄປດ້ວຍບັນຍາກາດອັນດີ ມີການແລກປ່ຽນຄໍາຄິດຄໍາເຫັນຢ່າງ ສ້າງສັນ ແລະ ມີຄວາມຫມາຍ.

ກອງປະຊຸມປຶກສາຫາລືພາກລັດ ແລະ ເອກະຊົນຍີ່ປຸ່ນ-ລາວ ຄັ້ງທໍາອິດໄດ້ຖືກຈັດຂຶ້ນໃນເດືອນທັນວາປີ 2007 ໂດຍມາຈາກການ “ຖະແຫຼງການຮ່ວມ ລາວ – ຍີ່ປຸ່ນ” ທີ່ຖືກຈັດຂຶ້ນຫຼັງກອງປະຊຸມສຸດຍອດ ລາວ – ຍີ່ປຸ່ນລະ ຫວ່າງ ພະນະ ທ່ານ ບົວສອນ ບຸບຜາວັນ, ອະດີດນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ຊິນໂສ ອາເບະ, ອະດີດນາຍົກ ລັດຖະມົນຕີປະເທດຢີ່ປຸ່ນ.

ກອງປະຊຸມ ປຶກສາຫາລື ລະຫວ່າງ ພາກລັດ ແລະ ເອກະຊົນ ລາວ-ຍີ່ປຸ່ນ ຄັ້ງທີ 15, ເປັນກອງປະຊຸມທີ່ມີຄວາມຫມາຍຄວາມສໍາຄັນຫຼາຍເພື່ອສົ່ງເສີມການລົງທຶນຂອງສອງປະເທດ ລາວ-ຍີ່ປຸ່ນ. ຈຸດປະສົງຂອງການຈັດກອງປະຊຸມດັ່ງກ່າວ ແມ່ນ ເພື່ອຮັບຟັງບັນຫາ ແລະ ຂໍ້ສະເຫນີຂອງບັນດານັກລົງທຶນ ເພື່ອປຶກສາຫາລື, ຄົ້ນຄວ້າ ແລະ ຊອກຫາວິທີການແກ້ໄຂ ບັນຫາທີ່ຕິດພັນກັບການດໍາເນີນທຸລະກິດຂອງບັນດານັກລົງທຶນຍີ່ປຸ່ນ ຢູ່ ສປປ ລາວ ແລະ ເພື່ອປັບປຸງສະພາບແວດລ້ອມການ ລົງທຶນຢູ່ ສປປ ລາວ ໃຫ້ດີຂຶ້ນ ໂດຍສອດຄອງກັບທິດທາງຂອງລັດຖະບານທີ່ໄດ້ ເອົາໃຈໃສ່ວຽກງານການອໍານວຍຄວາມສະດວກໃຫ້ແກ່ນັກລົງທຶນ ແລະ ສອດຄອ່ງກັບຄໍາຫມາຍຫມັ້ນທີ່ລັດຖະບານລາວ ມີໃຫ້ແກ່ບັນດາຄູ່ຮ່ວມໃນເວທີພາກພື້ນ ແລະ ສາກົນໃນການສຸມການປັບປຸງ 3 ຫນ້າວຽກໃຫຍ່ຄື: 1) ການປັບປຸງການເຂົ້າເຖິງຂໍ້ມູນຂ່າວສານການລົງທຶນ, ການຍືນສະເຫນີຂໍ ລົງທຶນທີ່ສະດວກວ່ອງໄວ ແລະ ມາດຕະການການຈັດຕັ້ງປະຕິບັດວຽກງານການລົງທຶນທີ່ໂປ່ງໃສ, 2) ການປັບປຸງ ແລະ ຕັດຂອດຂັ້ນການຍື່ນສະເຫນີຂໍລົງທຶນໃຫ້ກະລັດຫັດ ແລະ 3) ການສ້າງເງື່ອນໄຂທີ່ເອື້ອອໍານວຍຄວາມສະດວກໃຫ້ແກ່ການ ລົງທຶນ. ປີນີ້ກອງປະຊຸມໄດ້ແບ່ງອອກເປັນສອງກຸ່ມໃຫຍ່ກໍ່ຄືທຸລະກິດການຄ້າ, ການຂົນສົ່ງ ແລະ ສິ່ງກີດຂວາງໃຫ້ແກ່ການເຂົ້າມາລົງທຶນຂອງທຸລະກິດໃຫມ່ໃນປະເທດລາວ. ພ້ອມນີ້, ໃນຂະນະທີ່ຜົນກະທົບຈາກພະຍາດ Covid-19 ຍັງສືບຕໍ່ມີແຜ່ລະບາດນີ້, ມັນເປັນສິ່ງສໍາຄັນເປັນ ຢ່າງຍິ່ງທີ່ພາກລັດຈະຊ່ວຍຊຸກຍູ້ຕິດຕາມ ແລະ ແກ້ໄຂບັນຫາຂອງພາກທຸລະກິດເວົ້າລວມ, ເວົ້າສະເພາະກໍ່ແມ່ນບໍລິສັດຍີ່ປຸ່ນ ເນື່ອງຈາກຈະເປັນການດຶງດູດການລົງທຶນ ອັນໃຫມ່ທີ່ຄາດວ່າຈະເກີດຂຶ້ນ ໃນໄລຍະການຟື້ນໂຕຂອງເສດຖະກິດຫຼັງ Covid-19. ນອກຈາກນີ້, ລັດຖະບານລາວຍັງໄດ້ລາຍງານຄວາມຄືບຫນ້າຂອງການຈັດຕັ້ງປະຕິບັດວຽກງານ “ຂໍ້ສະເຫນີດ້ານນະໂຍບາຍ” ທີ່ຮ່າງໂດຍລັດຖະບານຍີ່ປຸ່ນເພື່ອແກ້ໄຂບັນຫາສໍາຄັນໃນໄລຍະກາງ ແລະ ໄລຍະຍາວເຊັ່ນ: ຄວາມໂປ່ງໃສ, ການປະເມີນຜົນຂອງ ກົດຫມາຍ ແລະ ລະບຽບການຕ່າງໆ, ການຂົນສົ່ງ, ເຂດເສດຖະກິດພິເສດ ແລະ ອື່ນໆ.

ປະຈຸບັນ, ຈໍານວນບໍລິສັດຍີ່ປຸ່ນໃນລາວແມ່ນມີທັງຫມົດ 164 ບໍລິສັດທີ່ກໍາລັງເດີນຫນ້າການລົງທຶນຢ່າງຫ້າວຫັນໂດຍ ສະເພາະໃນຂະແຫນງການອຸດສາຫະກໍາການຜະລິດ, ການລົງທຶນຂອງບໍລິສັດຍີ່ປຸ່ນໃນ ສປປ ລາວ ໄດ້ປະກອບສ່ວນເຂົ້າໃນການສ້າງວຽກເຮັດງານທໍາ, ແບ່ງປັນຄວາມຮູ້ໃນການບໍລິຫານຈັດການ ແລະ ເຕັກໂນໂລຢີການຜະລິດ, ປະກອບສ່ວນເຂົ້າໃນການ ່ຈະເລີນເຕີບໂຕຂອງເສດຖະກິດ ແລະ ການພັດທະນາຂອງປະເທດລາວ.

ຕໍ່ຈາກນີ້ໄປກໍ່ເຊັ່ນດຽວກັນ, ລັດຖະບານລາວຈະສືບຕໍ່ປະສານງານປຶກສາຫາລືຮ່ວມກັບຝ່າຍຍີ່ປຸ່ນເພື່ອແກ້ໄຂບັນຫາ ທີ່ຄົງຄ້າງ ແລະ ບັນຫາໃຫມ່ເພື່ອທີ່ຈະໄດ້ປັບປຸງສະພາບແວດລ້ອມການລົງທຶນໃຫ້ດີຍິ່ງຂຶ້ນ.