ກະຊວງແຜນການ ແລະ ການລົງທຶນ ໄດ້ຈັດກອງປະຊຸມປຶກສາຫາລືຮ່ວມກັບພາກເອກະຊົນ ກ່ຽວກັບ ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ໃນວັນທີ 30 ສິງຫາ 2024 ທີ່ກະຊວງແຜນການ ແລະ ການລົງທຶນ ໂດຍການເປັນປະທານຂອງ ທ່ານ ນາງ. ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ປອ. ຄໍາແສນ ສີສະວົງ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ມີບັນດາທ່ານຜູ້ອຳນວຍການບໍລິສັດ, ຮອງອຳນວຍການບໍລິສັດ ແລະ ບັນດາທ່ານຫົວໜ້າໜ້າກົມ, ຮອງຫົວໜ້າກົມ ແລະ ວິຊາການທີ່ກ່ຽວຂ້ອງ ເຂົ້າຮ່ວມຈຳນວນ 53 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອປຶກສາຫາລື ແລະ ປະກອບຄໍາເຫັນຕໍ່ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ໃຫ້ມີຄວາມສອດຄ່ອງກັບສະພາບຕົວຈິງ, ທັງເປັນການຜັນຂະຫຍາຍມະຕິ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່.
ທ່ານ ນາງ. ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ປະທານ ກອງປະຊຸມ ໄດ້ມີຄຳເຫັນເນັ້ນໜັກວ່າ ໃນການສ້າງແຜນພັດທະນາເສດຖະກິດ-ສັງຄົມແຫ່ງຊາດ ໂດຍການມີ ສ່ວນຮ່ວມຂອງ ທຸກພາກສ່ວນຢ່າງກວ້າງຂວາງແມ່ນມີຄວາມສໍາຄັນຫຼາຍ ລວມທັງພາກເອກະຊົນ. ໃນໄລຍະ ຜ່ານມາ ການລົງທຶນຂອງພາກເອກະຊົນພາຍໃນ ແລະ ການລົງທຶນໂດຍກົງຈາກຕ່າງປະເທດ ໄດ້ກວມອັດຕາສ່ວນຫຼາຍກວ່າໝູ່ໃນ 4 ແຫຼ່ງທຶນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025), ທ່ານຍັງຮຽກຮ້ອງໃຫ້ພາກເອກະຊົນ ສືບຕໍ່ປະກອບສ່ວນເຂົ້າໃສ່ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ເນື່ອງຈາກແຜນການ 5 ປີຄັ້ງທີ X ມີຄວາມສຳຄັນຫຼາຍ ເພາະເປັນແຜນສືບຕໍ່ຜັນຂະຫຍາຍວິໄສທັດຮອດປີ 2030, ມະຕິ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່, ທັງເປັນການຜັນຂະຫຍາຍມະຕິຂອງກອງປະຊຸມໃຫຍ່ ຄັ້ງທີ XII ຂອງພັກ ເພື່ອເຮັດໃຫ້ເສດຖະກິດ-ການເງິນ, ການຜະລິດ ແລະ ບໍລິການ, ການຄຸ້ມຄອງບໍລິຫານລັດ ເພື່ອສ້າງພື້ນຖານໃຫ້ແກ່ການສ້າງເສດຖະກິດເອກະລາດ ເປັນເຈົ້າຕົນເອງ ໃຫ້ໄດ້ຮັບຜົນສຳເລັດ ແລະ ມີຄວາມໜັກແໜ້ນເທື່ອລະກ້າວ. ພ້ອມນັ້ນ, ທ່ານ ກໍໄດ້ຮຽກຮ້ອງ ໃຫ້ຜູ້ເຂົ້າຮ່ວມກອງປະຊຸມ ຈົ່ງພ້ອມກັນປະກອບຄໍາຄິດຄໍາເຫັນ ຢ່າງກົງໄປກົງມາ ແລະ ດ້ວຍຄວາມຮັບຜິດຊອບສູງ ເພື່ອເປັນພື້ນຖານໃນການປັບປຸງຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ໃຫ້ມີຄວາມສອດຄ່ອງກັບສະພາບການພັດທະນາໃນໄລຍະໃໝ່, ເປັນແຜນທີ່ສາມາດຈັດຕັ້ງປະຕິບັດໄດ້ຢ່າງມີ ປະສິດທິຜົນສູງ.
ທ່ານ ປອ. ຄໍາແສນ ສີສະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໃນນາມປະທານຮ່ວມ ກໍໄດ້ມີຄໍາເຫັນຢັ້ງຢືນເຖິງບົດບາດຂອງພາກລັດໃນການກໍານົດແນວທາງ ແລະ ການຄຸ້ມຄອງ ມະຫາພາກ, ສ່ວນພາກເອກະຊົນ ມີບົດບາດໃນການຂັບເຄື່ອນເສດຖະກິດ. ທ່ານໄດ້ເນັ້ນໜັກວ່າ ການເຂົ້າຮ່ວມ ແລະ ປະກອບຄໍາເຫັນຕໍ່ຮ່າງແຜນພັດທະນາເສດຖະກິດ-ສັງຄົມແຫ່ງຊາດ ໃນ 5 ປີ ຕໍ່ໜ້າ ມີຄວາມສໍາຄັນຫຼາຍ ເພື່ອເຮັດໃຫ້ການພັດທະນາມີຜົນສໍາເລັດຫຼາຍກວ່າເກົ່າ ແລະ ເຮັດໃຫ້ການຄຸ້ມຄອງມະຫາພາກ ກໍຄືເສດຖະກິດ-ສັງຄົມດີຂຶ້ນກວ່າເກົ່າ.
