ວັນທີ 9 ສິງຫາ 2024, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມປຶກສາຫາລືກ່ຽວກັບຫົວຂໍ້ຄົ້ນຄວ້າວິທະຍາສາດ ເພື່ອຮັບໃຊ້ການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ຂື້ນ, ທີ່ຫ້ອງປະຊຸມໃຫຍ່ ຊັ້ນ 6 ກະຊວງແຜນການ ແລະ ການລົງທຶນ. ໂດຍການເປັນປະທານຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ, ມີບັນດາທ່ານ ຮອງລັດຖະມົນຕີ, ຮອງຫົວໜ້າອົງການທຽບເທົ່າກະຊວງ ພ້ອມດ້ວຍກົມກ່ຽວຈາກບັນດາຂະແໜງການຂັ້ນສູນກາງ ເຂົ້າຮ່ວມຈຳນວນ 80 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອປຶກສາຫາລື ແລະ ເອກະພາບຕໍ່ບັນດາຫົວຂໍ້ຄົ້ນຄ້ວາວິທະຍາສາດ, ການແບ່ງຄວາມຮັບຜິດຊອບການຄົ້ນຄ້ວາໃນແຕ່ລະຫົວຂໍ້ ແລະ ແຫຼ່ງທຶນ ເພື່ອມາຈັດຕັ້ງປະຕິບັດການຄົ້ນຄ້ວາຫົວຂໍ້ວິທະຍາສາດ ເພື່ອຮັບໃຊ້ໃຫ້ແກ່ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030).
ທ່ານ ນ. ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ປະທານກອງປະຊຸມ ໄດ້ມີຄຳເຫັນວ່າ ເພື່ອຮັບປະກັນໃຫ້ການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ມີລັກສະນະວິທະຍາສາດ, ສອດຄ່ອງກັບສະພາບເງື່ອນໄຂຕົວຈິງຂອງປະເທດ ກໍຄືຂອງຂະແໜງການ ແລະ ໃຫ້ສາມາດຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນສູງ ຕ້ອງໄດ້ມີການຄົ້ນຄວ້າໃຫ້ເລິກເຊິ່ງແຕ່ລະບັນຫາທີ່ເປັນບູລິມະສິດການພັດທະນາ ເພື່ອຊອກຫາວິທີການ ແລະ ມາດຕະການໃນການຈັດຕັ້ງປະຕິບັດທີ່ມີຄວາມສອດຄ່ອງ ໃຫ້ສາມາດບັນລຸເປົ້າໝາຍ ແລະ ຄາດໝາຍຕາມແຜນທີ່ວາງໄວ້.
ນອກຈາກນັ້ນ ປະທານກອງປະຊຸມ ຍັງໄດ້ສະເໜີໃຫ້ບັນດາທ່ານທີ່ເຂົ້າຮ່ວມ ຮີບຮ້ອນ ຄົ້ນຄວ້າສ້າງແຜນພັດທະນາຂອງຂະແໜງການຕົນໃຫ້ໄວຂຶ້ນ ເພື່ອຈະໄດ້ເປັນບ່ອນອີງໃຫ້ກະຊວງແຜນການ ແລະ ການລົງທຶນ ຄົ້ນຄ້ວາສັງລວມເຂົ້າໃນການສ້າງແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ X. ພາຍຫຼັງກອງປະຊຸມໃນຄັ້ງນີ້, ກະຊວງແຜນການ ແລະ ການລົງທຶນ ຈະໄດ້ລາຍງານຂໍທິດຊີ້ນຳທ່ານນາຍົກ ລັດຖະມົນຕີ ເພື່ອຕົກລົງແບ່ງຄວາມຮັບຜິດຊອບໃຫ້ແຕ່ລະພາກສ່ວນດຳເນີນການຄົ້ນຄ້ວາໃນແຕ່ລະຫົວຂໍ້ ເພື່ອໃຫ້ສາມາດນຳໃຊ້ຜົນການຄົ້ນຄວ້າເຂົ້າໃນການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ຕາມກຳນົດເວລາ.
