ກອງປະຊຸມປຶກສາຫາລື ລະຫວ່າງ ພາກລັດ ແລະ ເອກະຊົນ ລາວຍີ່ປຸ່ນ ຄັ້ງທີ 16

by | Jan 11, 2023 | ການເຄື່ອນໄຫວ, ຂ່າວເດັ່ນ | 0 comments

ໃນຕອນເຊົ້າ ຂອງວັນທີ 10 ມັງກອນ 2023, ກະຊວງແຜນການ ແລະ ການລົງທຶນ ແລະ ສະຖານທູດຍີ່ປຸ່ນປະຈໍາ ສປປ ລາວ ໄດ້​ຈັດ “ກອງປະຊຸມ​ປຶກສາຫາລື ລະຫວ່າງ ພາກລັດ ແລະ ເອກະຊົນຍີ່ປຸ່ນ-ລາວ​ຄັ້ງທີ 16” ຂຶ້ນທີ່ ກະຊວງແຜນການ ແລະ ການລົງທຶນ, ໂດຍໄດ້​ຮັບ ການຮ່ວມມືຈາກສະພາອຸດສາຫະກໍາ ແລະ ການຄ້າຍີ່ປຸ່ນປະຈໍາ ສປປ ລາວ (JCCIL), ອົງການສົ່ງ​ເສີມ​ການ​ຄ້າ​ຍີ່​ປຸ່ນປະຈໍານະຄອນຫຼວງວຽງຈັນ (JETRO), ອົງ​ການ​ຮ່ວມ​ມື​ສາ​ກົນ​ຍີ່​ປຸ່ນປະຈໍາລາວ (JICA), ​ຫ້ອງການທະນາຄານຮ່ວມມືສາກົນປະຈໍາບາງກອກ (JBIC) ແລະ ອົງການການເງິນສາກົນປະຈຳລາວ (IFC).

ກອງປະຊຸມໃນຄັ້ງນີ້ໄດ້ຮັບກຽດເປັນປະທານໂດຍ ທ່ານ ຄໍາເຈນ ວົງໂພສີ, ລັດຖະມົນຕີ ກະຊວງແຜນການ ແລະ ການລົງທຶນ ຮ່ວມກັບ ທ່ານ ໂຄບາຢາຊິ ເຄນອິຈິ, ເອກອັກຄະຣາຊະທູດຍີ່ປຸ່ນປະຈໍາ ສປປ ລາວ ໂດຍມີພາກ​ສ່ວນ​ກ່ຽວ​ຂ້ອງ​ຂອງ​ທັງ​ສອງ​ຝ່າຍ​​ເຂົ້າ​ຮ່ວມໃນຫ້ອງປະຊຸມ ແລະ ເຂົ້າຮ່ວມຜ່ານລະບົບທາງໄກ (Virtual Meeting).

ກອງປະຊຸມປຶກສາຫາລືພາກລັດ ແລະ ເອກະຊົນຍີ່ປຸ່ນ-ລາວ ຄັ້ງທໍາອິດໄດ້ຖືກຈັດຂຶ້ນໃນເດືອນທັນວາ ປີ 2007 ໂດຍເປັນການຜັນຂະຫຍາຍ “​ຖະ​ແຫຼງ​ການ​ຮ່ວມ​ ລາວ ​- ຍີ່​ປຸ່ນ” ທີ່ຖືກຈັດຂຶ້ນຫຼັງກອງປະຊຸມສຸດຍອດ ລາວ – ຍີ່ປຸ່ນ ລະຫວ່າງ ພະນະທ່ານ ບົວສອນ ບຸບຜາວັນ, ອະດີດນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ຊິນໂສ ອາເບະ, ອະ​ດີດນາຍົກ​ລັດຖະມົນຕີປະເທດຢີ່ປຸ່ນ.

ກອງປະຊຸມ ປຶກສາຫາລື ລະຫວ່າງ ພາກລັດ ແລະ ເອກະຊົນ ລາວ-ຍີ່ປຸ່ນ ຄັ້ງທີ 16 ເປັນກອງປະຊຸມທີ່ມີຄວາມໝາຍຄວາມສຳຄັນຫຼາຍເພື່ອສົ່ງເສີມການລົງທຶນຂອງສອງປະເທດ ລາວ-ຍີ່ປຸ່ນ. ຈຸດປະສົງຂອງກອງປະຊຸມ ແມ່ນເພື່ອປຶກສາຫາລື, ແລກປ່ຽນບົດຮຽນ ພ້ອມທັງຮັບການສະເໜີ ຂອງບັນດານັກລົງທຶນ ຍີ່ປຸ່ນທີ່ດຳເນີນທຸລະກິດ ຢູ່ ໃນ ສປປ ລາວ.  ກອງປະຊຸມໃນແຕ່ລະຄັ້ງ ແມ່ນໄດ້ປະກອບສ່ວນອັນສໍາຄັນ ໃຫ້ແກ່ພາກລັດ ກໍຄືຂະແໜງການກ່ຽວຂ້ອງ ໄດ້ທົບທວນຄືນບັນດານິຕິກໍາ, ລະບຽບການ, ລວມເຖິງການຈັດຕັ້ງປະຕິບັດວຽກງານທີ່ຕິດພັນກັບ ການສົ່ງເສີມ ແລະ ຄຸ້ມຄອງການລົງທຶນຂອງເອກະຊົນ ກໍ່ຄື ການອໍານວຍຄວາມສະດວກໃຫ້ແກ່ການດໍາເນີນທຸລະກິດ ຢູ່ ສປປ ລາວ ໃຫ້ນັບມື້ນັບດີຂຶ້ນ. ສໍາລັບຂໍສະເໜີທີ່ໄດ້ນໍາມາປຶກສາຫາລືກັນໃນຄັ້ງນີ້ ແມ່ນປະກອບມີ 3 ຫົວຂໍ ຄື: 1) ການສຶກສາກ່ຽວກັບ ການສົ່ງເສີມ ແລະ ຈັດຕັ້ງປະຕິບັດ ນະໂຍບາຍການເຊື່ອມຈອດ (Land link) ຂອງ ສປປ ລາວ ແລະ 2) ການປັບປຸງການອໍານວຍຄວາມສະດວກລະບົບແຈ້ງປະຕູດຽວແຫ່ງຊາດ (National Single window-LNSW) ແລະ AEO System ແລະ 3) ການປັບປຸງຂໍ້ກໍານົດວ່າດ້ວຍຂັ້ນຕອນການອອກໃບອະນຸຍາດຫ້ອງການຜູ້ຕາງໜ້າ.

ປະຈຸບັນ, ຈໍານວນບໍລິສັດຍີ່ປຸ່ນໃນລາວແມ່ນມີທັງໝົດ 164 ບໍລິສັດທີ່ກໍາລັງເດີນໜ້າການລົງທຶນຢ່າງຫ້າວຫັນໂດຍສະເພາະໃນຂະແໜງການອຸດສາຫະກໍາການຜະລິດ. ການລົງທຶນຂອງບໍລິສັດຍີ່ປຸ່ນໃນ ສປປ ລາວ ໄດ້ປະກອບສ່ວນເຂົ້າໃນການສ້າງວຽກເຮັດງານທໍາ, ແບ່ງປັນຄວາມຮູ້ໃນການບໍ​ລິ​ຫານຈັດການ ແລະ ເຕັກໂນໂລຢີການຜະລິດ,​ ປະ​ກອບ​ສ່ວນ​ເຂົ້າ​ໃນການຈະເລີນເຕີບໂຕຂອງເສດ​ຖະ​ກິດ ແລະ ການພັດທະນາຂອງປະເທດ​ລາວ.