ໃນວັນທີ 2 ມີນາ 2022, ທີ່ກະຊວງແຜນການ ແລະ ການລົງທຶນ, ຈັັດກອງປະຊຸມປືກສາຫາລື ແລະ ເຮັດວຽກຮ່ວມກັບຄະນະນຳແຂວງຈຳປາສັກ ເພື່ອຄົ້ນຄວ້າ ແລະ ປຶກສາຫາລືບາງບັນຫາທີ່ສຳຄັນ ຕິດພັນກັບການຈັດຕັ້ງປະຕິບັດແຜນການລົງທຶນແຫ່ງລັດ ປະຈຳປີ 2022 ແລະ ຜັນຂະຫຍາຍຈັດຕັງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງແຂວງຈຳປາສັກ, ໂດຍການເປັນປະທານຂອງທ່ານ ຄຳເຈນ ວົງໂພສີ ກຳມະການສູນກາງພັກ, ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ປອ. ວິໄລວົງ ບຸດດາຄຳ ກຳມະການສູນກາງພັກ, ເຈົ້າແຂວງແຂວງຈຳປາກສັກ, ພ້ອມດຽວກັນກໍ່ຍັງມາທ່ານ ຮອງລັດຖະມົນຕີ, ຫົວໜ້າສູນສະຖິຕິແຫ່ງຊາດ, ບັນດາທ່ານຫົວໜ້າກົມ, ທຽບເທົ່າກົມ, ວ່າການຫົວໜ້າຫ້ອງການ, ຫົວໜ້າພະແນກແຜນການ ແລະ ການລົງທຶນແຂວງຈຳປາສັກ ພ້ອມດ້ວຍການນຳຈາກຂະແໜງການທີ່ກຽ່ວຂ້ອງຂອງແຂວງຈຳປາສັກກໍ່ໄດ້ເຂົ້າຮ່ວມ.
ໂອກາດນີ້, ທ່ານ ຄຳເຈນ ວົງໂພສີ ໄດ້ໃຫ້ຮູ້ວ່າ: ກະຊວງແຜນການ ແລະ ການລົງທຶນໄດ້ເອົາໃຈໃສ່ໃນການຈັດຕັ້ງປະຕິບັດວາລະແຫ່ງຊາດດັ່ງກ່າວ ແຕ່ປີ 2021-2023 ສະເພາະຢູ່ພາຍໃນກະຊວງ ໄດ້ລົງເລີກໃນ 5 ວຽກຄື: (1) ວຽກງານປັບປຸງສະພາບແວດລ້ອມ ແລະ ແກ້ໄຂຄວາມຫຍຸ້ງຍາກດ້ານການດຳເນີນທຸລະກິດ; (2) ວຽກງານສົ່ງເສີມການຜະລິດເພື່ອທົດແທນການນຳເຂົ້າ ແລະ ສົ່ງອອກ; (3) ວຽກງານການຄຸ້ມຄອງ ແລະ ການແກ້ໄຂໜີ້ສິນການລົງທຶນ; (4) ວຽກງານປັບປຸງຄຸນນະພາບການບໍລິຫານລັດໃຫ້ກະທັດຮັດ, ການປະຢັດມັດທະຍັດ ແລະ ມີປະສິດທິພາບ. (5) ວຽກງານຍົກສູງປະສິດທິພາບການຄຸ້ມຄອງລັດດ້ວຍກົດໝາຍ.
ພ້ອມນີ້, ທ່ານ ວິໄລວົງ ບຸດດາຄໍາ ກໍໄດ້ລາຍງານໂດຍຫຍໍ້ກ່ຽວກັບການຈັດຕັ້ງແຜນພັດທະນາເສດຖະກິດ-ສັງຄົມ ຕິດພັນກັບການການຈັດຕັ້ງປະຕິບັດວາລະແຫ່ງຊາດ ວ່າດ້ວຍແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ, ທິດທາງແຜນການ ແລະ ຄາດໝາຍສູ້ຊົນປະຈຳປີ 2022, ສຳລັບການລົງທຶນລະອຽດກ່ຽວກັບການຈັດຕັ້ງປະຕິບັດວຽກງານຕາມພາລະບົດບາດຂອງຕົນ ໂດຍສະເໜີບັນຫາທີ່ພົ້ນເດັ່ນ, ຂໍ້ຫຍຸ້ງຍາກ, ຂໍ້ສະດວກ ແລະ ຂໍ້ສະເໜີຕ່າງໆຕໍ່ກະຊວງແຜນການ ແລະ ການລົງທຶນ, ພ້ອມນີ້ທ່ານ ເຈົ້າແຂວງແຂວງຈຳປາສັກກໍ່ໄດ້ສະແດງຄວາມຂອບໃຈຕໍ່ທ່ານ ລັດຖະມົນຕີ ກະຊວງແຜນການ ແລະ ການລົງທຶນ ທີ່ໄດ້ມີທິດນຳພາ-ຊີ້ນຳ ແລະ ຈະນຳໄປຈັດຕັ້ງປະຕີບັດໃຫ້ໄດ້ຮັບຜົນດີສູງສຸດ.
