ໃນຕອນເຊົ້າວັນທີ 25 ກັນຍາ 2024 ທີ່ກະຊວງແຜນການ ແລະ ການລົງທຶນ ໄດ້ຈັດຝືກອົບຮົມສ້າງຄວາມເຂັ້ມແຂງກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ຂອງຂະແໜງແຜນການ ແລະ ການລົງທຶນ ໃນຂອບເຂດທົ່ວປະເທດ, ໂດຍໃຫ້ກຽດເປັນປະທານຂອງ ທ່ານ ນາງ ພອນວັນ ອຸທະວົງ, ຮອງເລຂາຄະນະບໍລິຫານງານພັກກະຊວງ, ປະທານຄະນະກວດກາພັກ, ຮອງລັດຖະມົນຕີກະຊວງແຜນການ ແລະ ການລົງທຶນ, ມີທ່ານ ຮອງປະທານຄະນະກວດກາພັກ, ຫົວໜ້າກົມກວດກາ ກະຊວງແຜນການ ແລະ ການລົງທຶນ, ປະທານກວດກາ ແລະ ຜູ້ຮັບຜິດຊອບວຽກງານກວດກາຢູ່ບັນດາກົມ, ຫ້ອງການ, ສູນສະຖິຕິແຫ່ງຊາດ, ສະຖາບັນຄົ້ນຄວ້າວິໄຈ ການພັດທະນາ ແລະ ສູນຝຶກອົບຮົມ, ຂະແໜງກວດກາ ຈາກພະແນກແຜນການ ແລະ ການລົງທຶນແຂວງ, ນະຄອນຫຼວງ ເຂົ້າຮ່ວມທັງໝົດ 60 ທ່ານ, ຍິງ 24 ທ່ານ.
ທ່ານ ນາງ ພອນວັນ ອຸທະວົງ, ຮອງເລຂາຄະນະບໍລິຫານງານ, ປະທານຄະນະກວດກາພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວວ່າ: ພັກ-ລັດ ເຮົາຍາມໃດກໍ່ໃຫ້ຄວາມສຳຄັນ ແລະ ໃຫ້ທັດສະນະຕໍ່ວຽກງານຕ້ານການສໍ້ລາດບັງຫຼວງ ວ່າ ການຕິດຕາມກວດກາ ການສໍ້ລາດບັງຫຼວງ ແມ່ນໜຶ່ງໃນພາລະບົດບາດຕົ້ນຕໍແຫ່ງການນຳພາຂອງພັກ ຖ້າບໍ່ມີການກວດກາ ກໍ່ໝາຍຄວາມວ່າບໍ່ມີການນຳພາ ວຽກງານຕິດຕາມກວດກາແມ່ນວຽກງານທີ່ສອດຫ້ອຍເຂົ້າທຸກຂົງເຂດວຽກງານ ເປັນວຽກທີ່ຕ້ອງໄດ້ເຮັດເປັນປົກກະຕິ ແລະ ຂາດບໍ່ໄດ້ ສຳລັບການນຳພາຂອງພັກ ແລະ ການຄຸ້ມຄອງການບໍລິຫານຂອງລັດ. ການນຳພາຂອງພັກ ໃນເງື່ອນໄຂໃໝ່ ການກວດກາຍິ່ງມີບົດບາດພົ້ນເດັ່ນ ເພາະວ່າມັນຊ່ວຍໃຫ້ພວກເຮົາສາມາດຊອກເຫັນຂຸດຄົ້ນ ແລະ ເສີມຂະຫຍາຍດ້ານຕັ້ງໜ້າ ແລະ ປັດໄຈໃໝ່ທີ່ກ້າວໜ້າໄດ້ໄວ ທັງຊ່ວຍສະກັດກັ້ນ ແກ້ໄຂປະກົດການຫຍໍ້ທໍ້ ການເຊື່ອມເສຍຕ່າງໆ ທີ່ຈະສົ່ງຜົນກະທົບ ທີ່ເປັນໄພອັນຕະລາຍຮ້າຍແຮງ ຕໍ່ການພັດທະນາເສດຖະກິດ-ສັງຄົມ ເກີດຂຶ້ນຢ່າງແຜ່ຫລາຍ ເຊິ່ງໄດ້ກາຍເປັນບັນຫາ ທ້າທາຍ, ເປັນໄພຂົ່ມຂູ່ຕໍ່ສະຖຽນລະພາບ ແລະ ເປັນບັນຫາໜື່ງທີ່ກະທົບເຖິງບົດບາດການນຳພາຂອງພັກ, ຄຸ້ມຄອງຂອງລັດ ແລະ ລະບອບການເມືອງ, ການຕິດຕາມປະເມີນຜົນການຈັດຕັ້ງປະຕິບັດວຽກງານສະກັດກັ້ນຕ້ານການສໍ້ລາດບັງຫຼວງ. ສະນັ້ນ, ການສ້າງຄວາມເຂັ້ມແຂງວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ທີ່ໄດ້ຈັດຂຶ້ນໃນຄັ້ງນີ້ ແມ່ນມີຄວາມສຳຄັນຫຼາຍ ເພື່ອຍົກລະດັບຄວາມສາມາດ, ເສີມຂະຫຍາຍສະຕິປັນຍາຂອງຜູ້ ທີ່ເຮັດວຽກງານກວດກາ, ເປັນການຮຽນຮູ້ຊຶ່ງກັນ ແລະ ກັນ, ພວກເຮົາຈະໄດ້ຄົ້ນຄວ້າຮໍ່າຮຽນເຊື່ອມຊືມເອກະສານກ່ຽວກັບວຽກງານສະກັດກັ້ນ ນຳວິທະຍາກອນທີ່ມາຈາກຄະນະກວດກາສູນກາງພັກ ທີ່ມີບົດຮຽນປະສົບການທາງດ້ານທິດສະດີ ແລະ ພຶດຕິກຳຕົວຈິງມາແລ້ວ, ສໍາມະນາກອນທີ່ມາຮ່ວມ ກໍ່ແມ່ນ ຜູ້ທີ່ຮັບຜິດຊອບວຽກງານກວດກາ ຂອງຂະແໜງແຜນການ ແລະ ການລົງທຶນ ໃນຂອບເຂດທົ່ວປະເທດ ແລະ ບັນດາໜ່ວຍພັກກົມ, ທຽບເທົ່າກົມ ແລະ ຄະນະພັກຮາກຖານພາຍໃນກະຊວງແຜນການ ແລະ ການລົງທຶນ ມາຮຽນຮູ້ເອົາບົດຮຽນ ເພື່ອໄປນຳໃຊ້ເຂົ້າໃນການປະຕິບັດໜ້າທີ່ຂອງຕົນ.
