ກອງປະຊຸມພົບປະລະຫວ່າງ ພາກລັດ ແລະ ນັກລົງທຶນຫວຽດນາມ ປະຈຳປີ 2022

by | Dec 12, 2022 | Uncategorized @lo-la | 0 comments

ໃນຕອນບ່າຍຂອງວັນທີ 9 ທັນວາ 2022, ທີ່ໂຮງແຮມເມືອງແທ່ງ ນະຄອນຫລວງວຽງຈັນ ໄດ້ເປີດກອງປະຊຸມພົບປະລະຫວ່າງ ພາກລັດ ແລະ ນັກລົງທຶນຫວຽດນາມ ປະຈຳປີ 2022, ຕາງໜ້າໃຫ້ຄະນະຜູ້ແທນຝ່າຍລາວ ໂດຍ ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະການລົງທຶນ, ປະທານຄະນະກຳມະການຮ່ວມມື ລາວ-ຫວຽດນາມ ແລະ ຝ່າຍຫວຽດນາມ ໂດຍ ທ່ານ ເຈິນ ກວັກ ເຟືອງ ຮອງລັດຖະມົນຕີກະຊວງແຜນການ ແລະ ການລົງທຶນ ສສ ຫວຽດນາມ ຮອງປະທານຄະນະກຳມະການຮ່ວມມືຫວຽດນາມ-ລາວ ແລະ ທ່ານ ຫງວຽນ ບ່າ ຮຸ່ງ, ເອກອັກຄະລັດຖະທູດ ຫວຽດນາມ ປະຈໍາ ສປປ ລາວ, ມີບັນດາທ່ານ ຮອງລັດຖະມົນຕີ, ວິສາຫະກິດສອງປະເທດ ແລະ ວິຊາການ ຂອງສອງປະເທດ ເຂົ້າຮ່ວມ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອຜັນຂະຫຍາຍການຮ່ວມມືໃນການສົ່ງເສີມການລົງທຶນ ແລະ ຊຸກຍູ້ການແກ້ໄຂບັນຫາຊ່ວຍພາກທຸລະກິດ ເພື່ອໃຫ້ໄດ້ຮັບຄວາມສະດວກໃນການດຳເນີນທຸລະກິດຢູ່ ສປປ ລາວ ແລະ

ແມ່ນກິດຈະກຳໜື່ງ ຂອງປີ ສາມາຄີມິດຕະພາບ ລາວ-ຫວຽດນາມ ແລະ ປະຕິບັດຜັນຂະຫຍາຍຂໍ້ຕົກລົງແຜນການຮ່ວມມືຂອງສອງລັດຖະບານ ລາວ ແລະ ຫວຽດນາມ ປີ 2022, ເຊິ່ງໄດ້ປະກອບສ່ວນອັນສໍາຄັນ ໃນການເສີມຂະຫຍາຍສາຍພົວພັນອັນດີ ໃຫ້ແກ່ສອງພັກ ກໍ່ຄືສອງລັດຖະບານ ລາວ ແລະ ຫວຽດນາມ. ພ້ອມນີ້, ຍັງເປັນເວທີເປີດກ້ວາງໃຫ້ພາກທຸລະກິດຈາກ ສສ ຫວຽດນາມ ໄດ້ມີຄໍາເຫັນຕໍ່ກັບສະພາບການດໍາເນີນທຸລະກິດຢູ່ ລາວ, ໂດຍລົງເລິກແລກປ່ຽນຂໍ້ຄິດເຫັນຊຶ່ງກັນ ແລະ ກັນ ລວມເຖິງບັນຫາຂໍ້ຫຍຸ້ງຍາກ ແລະ ຂໍ້ສະເໜີແນະຕ່າງໆ ເພື່ອເຮັດໃຫ້ຂະແໜງການກ່ຽວຂ້ອງຂອງພາກລັດ ໄດ້ຮັບຊາບສະພາບຂໍ້ຫຍຸ້ງຍາກ ແລະ ພິຈາລະນາທົບທວນ, ທັງຄົ້ນຄວ້າ ແລະ ແກ້ໄຂບັນຫາຕ່າງໆ ທີ່ຕັ້ງຂຶ້ນໃຫ້ເປັນຮູບປະທໍາ, ນອກນັ້ນ ໃນກອງປະຊຸມຄັ້ງນີ້ ຍັງຮັບຟັງການລາຍງານ ກ່ຽວກັບສະພາບການລົງທຶນຂອງຫວຽດນາມຢູ່ ສປປ ລາວ, ຈາກນັ້ນຈະໄດ້ຮັບຟັງການລາຍງານຂອງພາກທຸລະກິດຫວຽດ ນາມ ຕໍ່ກັບສະພາບການດໍາເນີນທຸລະກິດ ຢູ່ ສປປ ລາວ ໂດຍປະກອບມີທັງໝົດ 4 ຫົວຂໍ້ໃຫຍ່ຄື: 1) ວຽກງານການລົງທຶນໃນຂະແໜງໄຟຟ້າ; 2) ຂະແໜງບໍ່ແຮ່; 3) ຂະແໜງກະສິກຳ ແລະ  4) ຂະແໜງການບໍລິການ.

ໃນຕອນທ້າຍຂອງກອງປະຊຸມພົບປະແລກປ່ຽນ ລະຫວ່າງ ພາກລັດ ແລະ ນັກລົງທຶນຫວຽດນາມ ປະຈຳປີ 2022 ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະ ການລົງທຶນ ຂອງ ລາວ ໄດ້ກ່າວ ສະແດງຄວາມເປັນເອກະພາບສູງຕໍ່ການສັງລວມ ແລະ ການປະກອບຄໍາເຫັນຂອງ ທ່ານ ຮອງລັດຖະມົນຕີກະຊວງແຜນການ ແລະ ການລົງທຶນຫວຽດນາມ ທີ່ມີຄວາມເນື້້ອໃນສົມບູນ ແລະ ເນັ້ນໜັກຄວາມສໍາຄັນໃນແຕ່ຂົງເຂດວຽກງານຢ່າງຮອບດ້ານ ຕໍ່ກັບເນື້້ອໃນຂໍ້ສະເໜີ ແລະ ບັນຫາ ທີ່ໄດ້ຍົກຂຶ້້ນມາ ເພື່ອປຶກສາຫາລື ກັບພາກລັດຖະບານໃນຄັ້ງນີ້ ແມ່ນລ້ວນແລ້ວແຕ່ ສ່ອງແສງໃຫ້ເຫັນເຖິງສະພາບການຕົວຈິງ ທີ່ທາງວິສາຫະກິດຫວຽດນາມ ໄດ້ປະສົບພົບພໍ້ໃນການດໍາເນີນທຸລະກິດຢູ່ ສປປ ລາວ, ຊຶ່ງພາກລັດຖະບານເອງ ກໍ່ມີຄວາມຍີນດີທີ່ສຸດ ໃນການຮັບເອົາຄໍາຄິດເຫັນ ແລະ ບັນຫາຕ່າງໆ ແລະ ຈະນໍາເອົາຂໍ້ສະເໜີ ແລະ ບັນຫາຕ່າງໆນັ້ນໄປຄົ້ນຄວ້າພິຈາລະນາ ຫາທາງແກ້ໄຂເພື່ອຊ່ວຍເຫຼືອນັກລົງທຶນຂອງ ສສ ຫວຽດນາມ ດ້ວຍຄວາມຮັບຜິດຊອບສູງ ເພື່ອໃຫ້ສາມາດຈັດຕັ້ງປະຕິບັດວຽກງານ ກໍ່ຄືການບໍລິຫານທຸລະກິດຂອງຕົນເອງໃຫ້ສາມາດດໍາເນີນໄປສູ່ຜົນສໍາເລັດດີ ແລະ ທ່ານ ລັດຖະມົນຕີ ກະຊວງແຜນການ ແລະ ການລົງທຶນຂອງລາວໄດ້ມີຄໍາເຫັນຕື່ມບາງຈຸດຕໍ່ຜົນຂອງກອງປະຊຸມ ດັ່ງນີ້:

  1. ຕໍ່ກັບການກົນໄກການຕິດຕາມຄວາມຄືບໜ້າການແກ້ໄຂບັນຫາຕ່າງໆ ມອບໃຫ້ກົມສົ່ງເສີມການລົງທຶນ ຮ່ວມກັບຫ້ອງການຄະນະກຳມະທິການຮ່ວມມືລາວ-ຫວຽດນາມ ສົມທົບກັບພະແນກກ່ຽວຂ້ອງຂອງສະຖານທູດຫວຽດນາມ ໃນການຈັດກອງປະຊຸມວິຊາການ ໃນທຸກ 6 ເດືອນ ເພື່ອຕິດຕາມຄວາມຄືບໜ້າ ການແກ້ໄຂບັນຫາຂອງແຕ່ລະຂະແໜງການກ່ຽວຂ້ອງ ແລະ ໃຫ້ມີການລາຍງານເປັນແຕ່ລະໄລຍະ.
  2. ເນື່ອງຈາກເຫັນໄດ້ເຖິງຄວາມສໍາຄັນ ວຽກງານການບໍລິການຂອງພາກລັດ ຕໍ່ການຮັບຟັງ, ຕິດ ຕາມແກ້ໄຂຂໍ້ຫຍຸ້ງຍາກ ແລະ ຂ້ອງຄາຂອງບັນດາວິສາຫະກິດເອກະຊົນພາຍໃນ ແລະ ຕ່າງປະເທດ ທີ່ກໍາລັງດໍາເນີນ ຢູ່ ສປປ ລາວ. ສະນັ້ນ, ກະຊວງແຜນການ ແລະ ການລົງທຶນ ກໍາລັງກະກຽມອອກຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນ ຂອງຄະນະແກ້ໄຂຂໍ້ຫຍຸ້ງຍາກ ແລະ ຂ້ອງຄາ ຂອງວິສາຫະກິດເອກະຊົນ ທີ່ດໍາເນີນທຸລະກິດ ຢູ່ ສປປ ລາວ.