ໃນວັນທີ 21 ຫາ 22 ກຸມພາ 2024 ຫ້ອງການຄະນະກຳມະການຮ່ວມມື ລາວ-ຈີນ ກະຊວງແຜນການ ແລະ ການລົງທຶນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານການຮ່ວມມືດ້ານເສດຖະກິດ ການຄ້າ ແລະ ເຕັກນິກ ລະຫວ່າງ ລາວ-ຈີນ ປະຈຳປີ ແລະ ກຳນົດທິດທາງແຜນການ ປີ 2024, ໂດຍມີຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະ ຊວງການຕ່າງປະເທດ ຜູ້ຊີ້ນຳວຽກງານຮ່ວມມືລາວ-ຈີນ, ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ທັງເປັນປະທານຄະນະກຳມະການຮ່ວມມື ລາວ-ຈີນ (ຄລຈ), ບັນດາທ່ານຮອງລັດຖະມົນຕີຈາກກະຊວງ ແລະ ອົງການລັດທຽບເທົ່າ, ຮອງເຈົ້າຄອງ ນະຄອນຫລວງວຽງຈັນ, ຮອງເຈົ້າແຂວງ ພ້ອມຜູ້ຕາງໜ້າຈາກຂະແໜງການຂັ້ນສູນກາງ ແລະ ທ້ອງຖິ່ນເຂົ້າຮ່ວມ.
ໃນກອງປະຊຸມ ທ່ານ ຄໍາເຈນ ວົງໂພສີ ໄດ້ຍົກໃຫ້ເຫັນເຖິງບາງຜົນງານທີ່ພົ້ນເດັ່ນໃນໜຶ່ງປີຜ່ານມາ ໂດຍສັງເຂບ ເປັນຕົ້ນ ແມ່ນການປະຕິບັດໂຄງການຊ່ວຍເຫຼືອລ້າ ແມ່ນໄດ້ປະຕິບັດສໍາເລັດໂຄງການທີ່ສໍາຄັນຫຼາຍໂຄງການ ການຮ່ວມມືດ້ານການຄ້າ ເຫັນວ່າຕົວເລກມູນຄ່າການຄ້າສອງຝ່າຍເພີ່ມຂຶ້ນຢ່າງກ້າວກະໂດດສາມາດບັນລຸໄດ້ 7,09 ຕື້ໂດລາ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 26,6% (ປີ 2022 ແມ່ນ 5,68 ຕື້ໂດລາ) ການດຶງດູດການລົງທຶນ ສາມາດດຶງດູດການລົງທຶນຈາກ ສປ ຈີນ ໄດ້ຈຳນວນ 17 ໂຄງການ ລວມມູນຄ່າການລົງທຶນປະມານ 986 ລ້ານໂດລາ ສໍາລັບ ການຮ່ວມມືພັດທະນາຊັບພະຍາ ກອນມະນຸດ ສປ ຈີນ ຍັງສືບຕໍ່ໃຫ້ການຊ່ວຍເຫຼືອຢ່າງຕໍ່ເນື່ອງ ສະເພາະການຊ່ວຍເຫຼືອເຝິກອົບຮົມ ແລະ ສໍາມະນາໄລຍະສັ້ນ ແມ່ນມີສືບຕໍ່ປະຕິບັດຢ່າງປົກກະຕິໃນແຕ່ລະປີ ທັງໃນຮູບແບບຫຼາຍຝ່າຍ ແລະ ສອງຝ່າຍ ຢູ່ພາຍໃນລາວ ແລະ ຢູ່ຈີນ.
ໂອກາດນີ້ ທ່ານ ສະເຫຼີມໄຊ ກົມມະສິດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານຂອງບັນດາ ການນຳທຸກຂັ້ນ ແລະ ພະນັກງານຮັບຜີດຊອບວຽກງານການຮ່ວມມື ລາວ-ຈີນ ຢູ່ຂັ້ນສູນກາງ ກໍຄືທົ່ວປະເທດ ຄຽງຄູ່ກັບຜົນງານທີ່ຍາດມາໄດ້ນັ້ນ ກໍເຫັນວ່າຍັງມີຈຸດອ່ອນ ຂໍ້ຄົງຄ້າງຈຳນວນໜຶ່ງທີ່ຕ້ອງໄດ້ເອົາໃຈ ໃສ່ປັບປຸງແກ້ໄຂຕື່ມ ເຊິ່ງທ່ານໄດ້ມີຄໍາເຫັນເພີ່ມເຕີມບາງຈຸດ ເພື່ອເປັນທິດທາງລວມ ແລະ ລົງເລິກໃນບາງບັນຫາທີ່ເປັນອັນສະເພາະໃນການສືບຕໍ່ຜັນຂະຫຍາຍການຮ່ວມມືກັບ ສປ ຈີນ ໃນຕໍ່ໜ້າ ດັ່ງນີ້: ໃຫ້ ຄລຈ ສືບຕໍ່ເປັນເຈົ້າການເອົາໃຈໃສ່ຕິດຕາມແນວທາງນະໂຍບາຍ ໃນການຊ່ວຍເຫຼືອຕໍ່ຕ່າງປະເທດຂອງຈີນຢ່າງໃກ້ຊິດ ເຊິ່ງໃນໄລຍະຫຼັງໆມານີ້ ທຶນການຊ່ວຍເຫຼືອລ້າຈາກ ສປ ຈີນ ເຫັນວ່າຈໍາກັດ ຮຽກຮ້ອງໃຫ້ຂະແໜງການ ແລະ ທ້ອງຖິ່ນກ່ຽວຂ້ອງຕ້ອງນໍາໃຊ້ຢ່າງມີປະສິດທິຜົນ ຕ້ອງເປັນເຈົ້າການຄົ້ນຄວ້າ ແລະ ຄັດເລືອກເອົາໂຄງການທີ່ດີ ເພື່ອນໍາສະເຫນີຂໍການຊ່ວຍເຫຼືອຈາກຝ່າຍຈີນ, ວຽກງານການຄ້າ ອີງຕາມຕົວເລກການຄ້າໃນປີ 2023 ມູນຄ່າການຄ້າ ລາວ-ຈີນ ສາມາດບັນລຸໄດ້ 7 ຕື້ ກວ່າໂດລາ ເຊິ່ງເປັນຕົວເລກທີ່ໃກ້ຄຽງທີ່ສຸດກັບມູນຄ່າການຄ້າກັບປະເທດທີ່ເປັນຄູ່ຄ້າອັນດັບໜຶ່ງຂອງລາວ (ຄືລາວ-ໄທ) ອີງຕາມສະຖິຕິນີ້ ຄາດວ່າອີກບໍ່ດົນປະເທດຈີນກໍຈະກາຍເປັນຄູ່ຄ້າອັນດັບໜຶ່ງຂອງລາວ ໃນອານາຄົດອັນໃກ້ນີ້; ສະນັ້ນ ຕໍ່ກັບສິນຄ້າທີ່ຈະສົ່ງອອກ ໃຫ້ເອົາໃຈໃສ່ຜະລິດສິນຄ້າທີ່ໄດ້ມາດຕະຖານ ພ້ອມທັງມີປະລິມານທີ່ແນ່ນອນ ພິເສດ ສິນຄ້າກະສິກຳຕ້ອງເອົາໃຈໃສ່ຍາດແຍ່ງໃຫ້ໄດ້ເຊັນສັນຍາ SPS ຫຼາຍຂຶ້ນ ເພື່ອສ້າງເງື່ອນໄຂໃຫ້ສິນຄ້າກະສິກໍາຂອງເຮົາສາມາດເຂົ້າສູ່ຕະຫຼາດຈີນໄດ້ສະດວກຂຶ້ນ ຂໍໃຫ້ຂະແໜງ ການກ່ຽວຂ້ອງ ເອົາໃຈໃສ່ຊຸກຍູ້ ແລະ ສົ່ງເສີມວຽກງານດັ່ງກ່າວນີ້ ໃຫ້ປະຕິບັດໄດ້ຢ່າງມີປະສິທິຜົນສູງຂຶ້ນຕື່ມ ໃຫ້ສົມກັບທ່າແຮງທີ່ເຮົາມີ ແລະ ເງື່ອນໄຂສະດວກ.
