ວັນທີ 28 ກຸມພາ ຫາ 01 ມີນາ 2023 ຄະນະກໍາມະການຮ່ວມມືລາວ-ຫວຽດນາມ ແລະ ຄະນະກໍາມະການຮ່ວມມືລາວ-ຈີນ ໄດ້ ຮ່ວມກັນຈັດກອງປະຊຸມສະຫຼຸບຕີລາ ການຈັດຕັ້ງປະຕິບັດວຽກງານຂອງ ຄະນະກຳມະການຮ່ວມມືລາວ-ຫວຽດນາມ, ລາວ-ຈີນ ປະຈໍາປີ 2022 ແລະ ທິດທາງແຜນການ ປີ 2023. ກອງປະຊຸມດັ່ງກ່າວໄດ້ດຳເນີນເປັນເວລາ 02 ວັນ, ໂດຍການເປັນປະທານກອງປະຊຸມຂອງ ທ່ານ ຄຳເຈນ ວົງໂພສີ, ລັດຖະມົນຕີ ກະຊວງ ແຜນການ ແລະ ການລົງ, ທັງເປັນປະທານ ຄະນະກຳມະການຮ່ວມມືລາວ-ຫວຽດນາມ (ຄລຫວ) ແລະ ປະທານຄະນະກຳມະການຮ່ວມມື ລາວ-ຈີນ (ຄລຈ). ມີບັນດາ ທ່ານ ຮອງລັດຖະມົນຕີ ຈາກ ກະຊວງ ແລະ ອົງການລັດທຽບເທົ່າ, ທ່ານຮອງເຈົ້າຄອງນະຄອນຫຼວງວຽງຈັນ, ບັນດາທ່ານ ຮອງເຈົ້າແຂວງ ທີ່ປະກອບເປັນຄະນະກຳມະການຮ່ວມມືລາວ-ຫວຽດນາມ, ລາວ-ຈີນ ແລະ ຕາງໜ້າຈາກຂະແໜງການຂັ້ນສູນກາງ ແລະ ທ້ອງຖິ່ນ ທີ່ກ່ຽວຂ້ອງ ເຂົ້າຮ່ວມ.
ກອງປະຊຸມ ໄດ້ເຫັນດີຕໍ່ການສະຫຼຸບຕີລາຄາ ແລະ ໝາກຜົນຂອງການຮ່ວມມືຮອບດ້ານ ກັບ ສສ ຫວຽດນາມ ໃນປີ 2022 ຜ່ານມາ ອັນທີ່ພົ້ນເດັ່ນແມ່ນສາມາດຈັດຕັ້ງປະຕິບັດສໍາເລັດ 07 ໂຄງການ ມີ: ໂຮງຮຽນນາຍສິບທະຫານແຂວງໄຊສົມບູນ; ປັບປຸງ, ຍົກລະດັບອະນຸສອນສະຖານ ປະ ທານໂຮ່ຈິມິນ ຢູ່ແຂວງຄຳມ່ວນ; ໂຄງການແບ່ງເຂດກະສິກໍາ ຢູ່ສອງແຂວງຫົວພັນ ແລະ ຊຽງຂວາງ; ການປ່ຽນໃໝ່ອຸປະກອນເຕັກໂນໂລຊີ ຢູ່ສະຖານີວິທະຍຸກະຈາຍສຽງແຫ່ງຊາດລາວ; ໂຄງການກໍ່ສ້າງສະຖາບັນການເງິນດົງຄໍາຊ້າງ ໄລຍະ 3; ໂຄງການຊ່ວຍໜູນສະຖາບັນຍຸຕິທໍາລາວ; ຍົກລະດັບ ແລະ ສ້ອມແປງໂຄງການຊົນລະປະທານນໍ້າລ້ອງ, ເມືອງສົບເບົາ, ແຂວງຫົວພັນ. ຄຽງຄູ່ກັນນັ້ນ, ໂຄງການໂຮງຮຽນວິຊາຊີບຄໍາມ່ວນ (ຂອງຂັວນຂອງປະທານປະເທດ ຫງວຽນ ຊັວນ ຟຸກ) ເຊິ່ງເຖິງ ວ່າຫາ ກໍ່ລົງມືກໍ່ສ້າງໃນຕົ້ນປີ 2022 ແຕ່ມີຄວາມຄືບໜ້າໄວ, ທັນມອບ-ຮັບ ພາຍໃນປີ. ສໍາລັບການຈັດຕັ້ງປະຕິບັດວຽກງານຮ່ວມມື ດ້ານເສດຖະກິດ, ການຄ້າ ແລະ ເຕັກນິກ ລະຫວ່າງ ສປປ ລາວ ກັບ ສປ ຈີນ ໃນປີ 2022 ກໍ່ໄດ້ມີຜົນສຳເລັດໃນຫລາຍດ້ານ ເປັນຕົ້ນ ມີໂຄງການຊ່ວຍເຫຼືອລ້າທີ່ຈັດຕັ້ງປະຕິບັດສໍາເລັດທັງໝົດ 5 ໂຄງການ; ມີໂຄງການທີ່ພວມດໍາເນີນການກໍ່ສ້າງ ຫຼື ພວມຈັດຕັ້ງປະຕິບັດ ທັງໝົດ 23 ໂຄງການ; ແລະ ມີໂຄງການທີ່ໄດ້ສະເໜີຂໍການພິຈາລະນາອະນຸມັດນໍາຝ່າຍຈີນແລ້ວ ທັງໝົດ 17 ໂຄງການ. ນອກນັ້ນ ໃນປີ 2022 ກໍຍັງມີການຮ່ວມມືໃນການຈັດຝຶກອົບຮົມຜ່ານລະບົບທາງໄກ ລວມທັງໝົດ 17 ຫົວຂໍ້ເຊິ່ງມີແກ່ພະນັກງານຫຼັກແຫຼ່ງ ຈາກ ບັນດາກະຊວງຂະແໜງການຂັ້ນສູນກາງ ແລະ ທ້ອງຖິ່ນທີ່່ກຽວຂ້ອງ ເຂົ້າຮ່ວມ ລວມທັງໝົດ 289 ເທື່ອຄົນ. ບັນດາຜົນສໍາເລັດດັ່ງກ່າວ ໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ໂດຍສະເພາະແມ່ນດ້ານການສ້າງຊັບພະຍາກອນມະນຸດໃຫ້ແກ່ ສປປ ລາວ;
ພ້ອມນັ້ນ, ໃນຕອນບ່າຍ ຂອງ ວັນທີ 01 ມີນາ 2023 ທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ, ຜູ້ຊີ້ນຳວຽກງານຄະນະກຳມະການຮ່ວມມື ລາວ-ຫວຽດນາມ ແລະ ລາວ-ຈີນ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາ ຕໍ່ກອງປະຊຸມ, ໂດຍທ່ານໄດ້ເນັ້ນໃສ່ວຽກຈຸດສຸມຈໍານວນໜຶ່ງ ເພື່ອໃຫ້ ສອງ ຄະນະກຳມະການຮ່ວມມື ນໍາໄປຈັດຕັ້ງຜັນຂະຫຍາຍ ໃນຕໍ່ໜ້າ ຄື:
- ເອົາໃຈໃສ່ການເປັນເສນາທິການໃຫ້ແກ່ສູນກາງພັກ, ລັດຖະບານ ໃນການຄົ້ນຄວ້າ, ຊີ້ນໍາ ແລະ ປະສານກັບບັນດາກະຊວງ, ອົງການທຽບເທົ່າຂັ້ນສູນກາງ ແລະ ອໍານາດການປົກຄອງທ້ອງຖິ່ນທີ່ກ່ຽວຂ້ອງ ກ່ຽວກັບວຽກງານຮ່ວມມືດ້ານເສດຖະກິດ, ການຄ້າ ແລະ ເຕັກນິກລະຫວ່າງ ລາວ-ຫວຽດນາມ ແລະ ລາວ-ຈີນ.
- ເອົາໃຈໃສ່ສົມທົບ ແລະ ຊຸກຍູ້ພາກສ່ວນກ່ຽວຂ້ອງ ເພື່ອພ້ອມກັນຜັນຂະຫຍາຍ ຜົນສໍາເລັດ ກອງປະຊຸມ ຄັ້ງທີ 45 ຂອງ ຄະນະກຳມະການຮ່ວມມື ລະຫວ່າງ ສອງລັດຖະບານ ລາວ ແລະ ຫວຽດນາມ; ແລະ ຜັນຂະຫຍາຍຜົນສຳເລັດຂອງການຢ້ຽມຢາມລັດຖະກິດ ຢູ ສປ ຈີນ ທ້າຍປີ 2022 ຂອງ ສະຫາຍເລຂາທິການໃຫຍ່, ປະທານປະເທດ ສປປ ລາວ ໃຫ້ເກີດຜົນເປັນຈິງ.
- ເອົາໃຈໃສ່ວຽກງານດຶງດູດການລົງທຶນຈາກ ສສ ຫວຽດນາມ ແລະ ສປ ຈີນໃຫ້ດີ. ສສ ຫວຽດນາມ ແລະ ສປ ຈີນມີທ່າແຮງຫລາຍດ້ານ ບໍ່ວ່າຈະເປັນທາງດ້ານທຶນຮອນກໍ່ຄືປະສົບການ. ໃນປະຈຸບັນທັງສອງປະເທດ ພວມດຳເນີນການປັບປຸງໂຄງການສ້າງເສດຖະກິດ ໂດຍເລັ່ງໃສ່ ເຕັກໂນໂລຊີທີ່ທັນສະໄໝ, ມີການປະດິດ ສ້າງ ແລະ ເລັ່ງໃສ່ນະວັດຕະກຳໃຫມ່ຫລາຍຂຶ້ນ.
- ເອົາໃຈໃສ່ ການຮ່ວມມືດ້ານການຄ້າ. ສປ ຈີນ ແລະ ສສ ຫວຽດນາມ, ມີປະຊາກອນຫລາຍ, ກຳລັງຊື້ກໍ່ຫລາຍ ແລະ ມີຄວາມຕ້ອງການນໍາເຂົ້າສິນຄ້າຫລາຍປະເພດເປັນຈໍານວນຫຼາຍ. ພ້ອມນັ້ນ, ຕໍ່ກັບສິນຄ້າສົ່ງອອກຈາກປະເທດ ລາວ ແມ່ນພວກເພິ່ນພ້ອມທີ່ຈະສະໜັບສະໜູນ ແລະ ເປີດໄຟຂຽວໃຫ້. ສະນັ້ນ ພວກເຮົາຄວນເອົາໃຈໃສ່ຂຸດຄົ້ນທ່າແຮງດ້ານນີ້ຂອງເຮົາຕື່ມ ໂດຍສະເພາະການສົ່ງອອກສິນຄ້າກະສິກຳສະອາດ, ພະລັງງານ ບໍ່ແຮ່ ແລະ ອື່ນໆ.
- ເອົາໃຈໃສ່ຕິດຕາມຊຸກຍູ້ ສົ່ງເສີມວຽກງານການທ່ອງທ່ຽວໃຫ້ດີ. ພາຍຫລັງທີ່ ສປ ຈີນ ເປີດປະເທດເຫັນວ່າເປັນໂອກາດດີ ທີ່ນັກທ່ອງທ່ຽວຈີນຈະເດີນທາງມາທ່ຽວລາວ, ໃນອະນາຄົດອັນໄກ້ນີ້ ລົດໄຟລາວ-ຈີນ ຈະສາມາດຂົນສົ່ງໂດຍສານຈາກ ຄຸນມິງ ຫາ ນະຄອນຫຼວງວຽງຈັນ ຍິ່ງຈະອຳນວຍຄວາມສະດວກໃຫ້ນັກທ່ອງທ່ຽວຈາກຈີນມາລາວ ນັບມື້ນັບຫຼາຍຂຶ້ນ.
- ໃຫ້ ຄະນະກຳມະການຮ່ວມມື ລາວ-ຫວຽດນາມ ແລະ ຄະນະກຳມະການຮ່ວມມື ລາວ-ຈີນ ເປັນເຈົ້າການເອົາໃຈໃສ່ ຕິດຕາມກວດກາ ເພື່ອຊຸກຍຸ້ ບັນດາໂຄງການຮ່ວມມື ລົງທຶນ ລະຫວ່າງ ລາວ-ຫວຽດນາມ ແລະ ລາວ-ຈີນ ໃຫ້ສຳເລັດຕາມທີ່ສອງຝ່າຍ ໄດ້ຕົກລົງກັນ.
- ເອົາໃຈໃສ່ຍົກລະດັບບຸກຄະລາກອນ ທີ່ມີຢູ່ໃນປັດຈຸບັນ ໃຫ້ມີຄວາມຮູ້ຄວາມສາມາດທີ່ຮັບໃຊ້ແກ່ການພົວພັນຮ່ວມມືສອງຝ່າຍໃຫ້ນັບມື້ນັບສູງຂຶ້ນ, ໂດຍ ຍາດແຍ່ງເອົາບົດຮຽນ, ທຶນຮອນໄປຝຶກອົບຮົມແລກປ່ຽນບົດຮຽນກັບສະຫາຍ ສສ ຫວຽດນາມ ແລະ ສປ ຈີນ ແລະ ນຳເອົາບົດຮຽນມາໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ການເມືອງຂອງຕົນໃຫ້ມີປະສິດທິຜົນນັບມື້ນັບສູງຂື້ນ.
