ກອງປະຊຸມສະຫຼຸບວຽກງານ ປີ 2020 ແລະ ແຜນວຽກຈຸດສຸມປີ 2021 ຂອງ ກຜທ ໄຂຂຶ້ນຢ່າງຈົບງາມ

by | Jan 22, 2021 | ການເຄື່ອນໄຫວ | 0 comments

ກອງປະຊຸມສະຫຼຸບສະພາບການຈັດຕັ້ງປະຕິບັດວຽກງານພົ້ນເດັ່ນປະຈຳປີ 2020 ແລະ ແຜນວຽກຈຸດສຸມປະຈໍາປີ 2021 ຂອງ ກະຊວງ ແຜນການ ແລະ ການລົງທຶນ ໄດ້ຈັດຂຶ້ນໃນວັນທີ 19 ມັງກອນ 2021 ທີ່ ສະໂມສອນ ກະຊວງແຜນການ ແລະ ການລົງທຶນ ໂດຍການເປັນປະທານຂອງ ທ່ານ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ເລຂາຄະນະບໍລີຫານງານພັກ, ລັດຖະມົນຕີ ກະຊວງແຜນການ ແລະການລົງທຶນ ພ້ອມນັ້ນຍັງມີບັນດາ ຮອງລັດຖະມົນຕີ, ທ່ານຫົວໜ້າສູນສະຖິຕິແຫ່ງຊາດ, ທ່ານຮອງປະທານ ຄະນະກໍາມະການຮ່ວມມືລາວ-ຫວຽດນາມ, ທ່ານຮອງປະທານ ຄະນະກໍາມະການຮ່ວມມືລາວ-ຈີນ, ທ່ານຮອງຫົວໜ້າສູນສະຖິຕິແຫ່ງຊາດ, ບັນດາທ່ານຫົວໜ້າກົມ, ຫົວໜ້າຫ້ອງການ, ຮອງຫົວໜ້າກົມ, ຮອງຫົວໜ້າຫ້ອງການ, ຫົວໜ້າພະແນກ-ຮອງຫົວໜ້າພະແນກ ແລະ ພະນັກງານຫຼັກແຫຼ່ງທີ່ກ້ຽວຂ້ອງເຂົາຮ່ວມຫຼາຍກວ່າ 300 ທ່ານ.

ກອງປະຊຸມຄັ້ງນີ້ໄດ້ຮັບຮັບກຽດຮັບຟັງການເຜີຍແຜ່ເອກະສານສຳຄັນຂອງພັກ ແລະ ຂອງລັດ ໂດຍ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກຜທ ແລະ ການສະຫຼຸບຕີລາຄາການຈັດຕັ້ງປະຕິບັດວຽກງານພົ້ນເດັ່ນປະຈຳປີ 2020 ແລະ ແຜນວຽກຈຸດສຸມປະຈໍາປີ 2021ຍັງ ໂດຍ ທ່ານ ນາງ ຄຳຈັນ ວົງແສນບູນ, ຮອງລັດຖະມົນຕີ ກະຊວງແຜນການ ແລະການລົງທຶນ ເຊິ່ງໄດ້ຕີລາຄາວ່າ ກຜທ ຍາມໃດ ກໍ່ຖືສໍາຄັນວຽກງານການເມືອງແນວຄິດຂອງສະມາຊິກພັກ-ພະນັກງານເປັນຫຼັກໃນການຈັດຕັ້ງປະຕິບັດວຽກງານ, ສຶກສາອົບຮົມນຳພາແນວຄິດສະມາຊິກພັກ-ພະນັກງານ ທີ່ຢູ່ໃນຄວາມຮັບຜິດຊອບຂອງຕົນເປັນປົກກະຕິໂດຍສຸມໃສ່ການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ, ນອກນັ້ນຍັງໄດ້ປັບປຸງກົງຈັກການຈັດຕັ້ງ ເພື່ອໃຫ້ສອດຄ່ອງແທດເໝາະກັບໜ້າທີ່ການເມືອງ ໃນໄລຍະໃໝ່ ໂດຍໄດ້ຍົກສູງຄຸນນະພາບການເຄື່ອນໄຫວຂອງກົງຈັກການຈັດຕັ້ງໃຫ້ກະທັດຮັດ. ໃນປີ 2020 ກຜທ ໄດ້ເອົາໃຈໃສ່ຈັດຕັ້ງປະຕິບັດວຽກງານຂອງຕົນຕາມພາລະບົດບາດ ແລະ ຕາມການມອບໝາຍຂອງພັກ ແລະ ລັດຖະບານດ້ວຍຄວາມຮັບຜິດຊອບສູງ ທ່າມກາງສະພາບແວດລ້ອມຫຼາຍຢ່າງທີ່ບໍ່ເອື້ອອໍານວຍເທົ່າທີ່ຄວນເນື່ອງມາຈາກ ສະພາບຂອງສາກົນມີການປ່ຽນແປງໄປຢ່າງສັບສົນ ປະກອບກັບ ສະພາບພາຍໃນປະເທດທີ່ຍັງມີຄວາມທ້າທາຍຫຼາຍດ້ານ, ໂດຍສະເພາະການລະບາດຂອງພະຍາດໂຄວິດ-19 ທີ່ໄດ້ກາຍເປັນໄພຄຸກຄາມອັນຮ້າຍກາດຕໍ່ກັບ ສະເຖຍລະພາບທາງດ້ານ ການເມືອງ, ເສດຖະກິດ ແລະ ສັງຄົມ ທີ່ສົ່ງຜົນກະທົບໄປທົ່ວໂລກ ລວມເຖິງ ສປປ ລາວ.

ປີ 2021 ເປັນປີທີ່ມີຄວາມໝາຍຄວາມສຳຄັນເພາະເປັນປີເລີ່ມຕົ້ນແຫ່ງການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ,ແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ IX (2021-2025) ແລະ ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງ ຜທ. ທ່ານ ສອນໄຊ ສີພັນດອນ ໄດ້ເນັ້ນໜັກໃຫ້ ໃຫ້ຄະນະນໍາ ແລະ ພະນັກງານທັງໝົດ ພ້ອມກັນ ເປັນເຈົ້າການປັບປຸງຄຸນນະພາບວຽກງານ ຕາມຄວາມຮັບຜິດຊອບຂອງຕົນໃຫ້ເປັນຮູບປະທຳ ແລະ ເປັນຂະບວນການທີ່ຟົດຟື້ນ.  ພະນັກງານ ກະຊວງ ແຜນການ ແລະ ການລົງທຶນ ທັງໝົດຕ້ອງພ້ອມກັນ ຄົ້ນ ຄວ້າ, ເຊື່ອມຊຶມ ແລະ ກໍາແໜ້ນ ມະຕິ, ຄໍາສັ່ງ, ກົດໝາຍ ແລະ ນິຕິກໍາ ທີ່ກ່ຽວຂ້ອງກັບການປະຕິບັດວຽກງານວິຊາສະເພາະຂອງຕົນ ເພື່ອພ້ອມກັນ ຈັດຕັ້ງປະຕິບັດຄໍາຂັວນກອງປະຊຸມໃຫຍ່ຂອງ ອົງຄະນະພັກກະຊວງ ຄື: “ເພີ່ມທະວີການນຳພາວຽກງານແຜນການ ແລະ ການລົງທຶນ ໃຫ້ມີການຫັນປ່ຽນໃໝ່ ຢ່າງມີຈຸດສຸມ, ມີຄຸນນະພາບ ແລະ ທັນສະໄໝ”