ກອງປະຊຸມສະຫຼຸບວຽກງານ 9 ເດືອນ ແລະ ແຜນເຄື່ອນໄຫວ3 ເດືອນທ້າຍປີ ຂອງສະຫະພັນກຳມະບານ ກະຊວງແຜນການ ແລະ ການລົງທຶນ

by | Sep 9, 2022 | Uncategorized @lo-la, ການເຄື່ອນໄຫວ, ຂ່າວເດັ່ນ | 0 comments

ໃນວັນທີ 8 ກັນຍາ 2022, ທີ່ກະຊວງແຜນການ ແລະ ການລົງທຶນ ໄດ້ເປີດກອງປະຊຸມສະຫຼຸບວຽກງານການເຄື່ອນໄຫວ 9 ເດືອນ ແລະ ແຜນການເຄື່ອນໄຫວ 3 ເດືອນທ້າຍປີ ແລະ ພິທີມອບໃບຢັ້ງຢືນ 5 ເປັນເຈົ້າ ປະຈໍາປີ 2021 ຂອງສະຫະພັນກໍາມະບານ ກະຊວງແຜນການ ແລະ ການລົງທຶນ  ໂດຍການເປັນປະທານຮ່ວມຂອງທ່ານ ນາງ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກກະຊວງ,​ຮອງລັດຖະມົນຕີ ກະຊວງແຜນການ ແລະ ການລົງທຶນ,ຜູ້ຊີ້ນຳວຽກງານສາມອົງການຈັດຕັ້ງ,  ທ່ານ ຟອງສະມຸດ ຄຳວານວົງສາ ປະທານກຳມະບານ ກະຊວງແຜນການ ແລະ ການລົງທຶນ ພ້ອມດ້ວຍເລຂາບໍລິຫານງານຊາວໜຸ່ມກະຊວງແຜນການ ແລະ ການລົງທຶນ ແລະ ປະທານສະຫະພັນແມ່ຍິງກະຊວງແຜນການ ແລະ ການລົງທຶນ ມີບັນດາຄະນະພັກ, ຄະນະນຳ ພ້ອມດ້ວຍ ບັນດາສະມາຊິກກຳມະບານ ພາຍໃນກະຊວງ ຜທ ເຂົ້າຮ່ວມ.

ທ່ານ ຟອງສະມຸດ ຄຳວານວົງສາ ປະທານກຳມະບານກະຊວງ ແຜນການ ແລະ ການລົງທຶນ ໄດ້ຍົກໃຫ້ເຫັນຜົນງານ ແລະ ຜົນສຳເລັດ, ຂໍ້ດີ, ຂໍ້ຄົງຄ້າງ, ບົດຮຽນທີ່ຖອດຖອນ ໄດ້ ໃນການ ເຄື່ອນໄຫວວຽກງານ ໃນໄລຍະ 9 ເດືອນຜ່ານມາ ຂອງສະຫະພັນກຳມະບານ ກະຊວງ ແຜນການ ແລະ ການລົງທຶນ ເຊິ່ງໄດ້ເຄື່ອນ ໄຫວວຽກງານ ຕາມພາລະບົດ ບາດເປັນເສນາທິການໃຫ້ແກ່ ຄະນະບໍລິຫານງານພັກ ກະຊວງ ຜທ. ປັດຈຸບັນ ສະຫະພັນກຳມະບານ ກະຊວງ ຜທ ມີຄະນະບໍລິຫານງານສະຫະພັນກຳມະບານ 17 ສະຫາຍ, ມີກຳມະບານຮາກຖານ 15 ໜ່ວຍຮາກຖານ, ມີສະມາຊິກກຳມະບານທັງໝົດ 602 ສະຫາຍ, ຍິງ 245 ສະຫາຍ, ໃນໄລຍະ 9ເດືອນຜ່ານມາ ໄດ້ມີສະມາຊິກກຳມະບານ ຍົກຍ້າຍ ໄປປະຈໍາການບ່ອນໃໝ່ຈໍານວນ 12 ສະຫາຍ, ໄດ້ຮັບສະມາຊິກທີ່ຍົກຍ້າຍມາຈາກພາກສ່ວນອື່ນ ຈຳນວນ 5 ສະຫາຍ ແລະ ຍົກຍ້າຍໜ່ວຍພາຍໃນກະຊວງ ຫລາຍສະຫາຍ ຍ້ອນມີການປັບປຸງການຈັດຕັ້ງ ແລະ ຊັບຊ້ອນບຸກຄະລາກອນພາຍໃນກະຊວງ.

ຄະນະບໍລິຫານງານສະຫະພັນກຳມະບານ ກະຊວງ ຜທ ຍາມໃດກໍຖືສຳຄັນວຽກງານການເມືອງແນວຄິດຂອງສະມາຊິກກຳມະບານ, ໄດ້ເປັນເຈົ້າການຊຸກຍູ້ສະມາຊິກກຳມະບານ ເຂົ້າຮ່ວມ ໃນການເຊື່ອມ ຊຶມປຸກລະດົມ, ໂຄສະນາເຜີຍແຜ່ແນວທາງຂອງພັກ-ລັດໃນວັນສຳຄັນຕ່າງໆຂອງພັກ-ລັດ ແລະ ສາກົນ. ພ້ອມນັ້ນ, ການເຄື່ອນໄຫວຂະບວນ ການ ຂອງ ກຳມະບານແມ່ນນອນໃນກອບການເຄື່ອນໄຫວລວມ ຂອງ ວຽກງານ 3 ອົງການຈັດຕັ້ງມະຫາຊົນ ກະຊວງ ຜທ ຊຶ່ງປະຕິບັດໄປຕາມທິດຂອງພັກ ແລະ ລັດຖະບານ ກໍຄື ໃນຂະບວນການແຂ່ງຂັນຮັກຊາດ ແລະ ພັດທະນາແລະ ໄປຕາມທິດປະຢັດມັດທະຍັດ, ຊຸກຍູ້ໃຫ້ມີການແຂ່ງຂັນການຈັດຕັ້ງປະຕິບັດ ວຽກງານວິຊາສະເພາະເປັນຫລັກ, ຂະ ບວນການອານາໄມ, ຮັກສາຄວາມສະອາດ, ຄວາມສະຫງົບ, ເປັນລະບຽບຮຽບຮ້ອຍ, ປອດໄພສຳນັກງານ.