ໃນຕອນບ່າຍ, ວັນທີ 23 ສິງຫາ 2024, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມເຜີຍແຜ່ແນະນໍາ, ຊຸກຍູ້ ແລະ ຕິດຕາມຄວາມຄືບໜ້າ ການສ້າງແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນການລົງທຶນຂອງລັດປະຈໍາປີ 2025 ຂື້ນ ທີ່ຫ້ອງປະຊຸມໃຫຍ່ ຊັ້ນ 6 (B6-1) ໂດຍພາຍໃຕ້ການເປັນປະທານຂອງທ່ານ ປອ. ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ, ມີທ່ານ ຮອງລັດຖະມົນຕີ, ທ່ານ ຮອງຫົວໜ້າອົງການທຽບເທົ່າກະຊວງ, ທ່ານ ຫົວໜ້າກົມ, ທ່ານ ຮອງຫົວໜ້າກົມ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມ ແມ່ນເພື່ອຊຸກຍູ້ແນະນໍາຈິດໃຈຕົ້ນຕໍຂອງລັດຖະບານໃນການສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການລົງທຶນຂອງລັດ ປະຈໍາປີ 2025 ແລະ ຮັບຟັງການລາຍງານຄວາມຄືບໜ້າໃນການສ້າງແຜນຕົວຈິງລວມທັງບັນຫາຕ່າງໆທີ່ພົບພໍ້. ເຊິ່ງໃນໄລຍະຜ່ານມາ, ກົມກ່ຽວຂ້ອງຂອງກະຊວງແຜນການ ແລະ ການລົງທຶນ ກໍ່ໄດ້ຈັດກອງປະຊຸມປຶກສາຫາລືຄົ້ນຄ້ວາເນື້ອໃນສໍາຄັນຕ່າງໆຂອງການສ້າງແຜນການ ປີ 2025 ຮ່ວມກັບ ພາກສ່ວນຕ່າງໆ ໂດຍອີງໃສ່ແຈ້ງການຂອງກະຊວງແຜນການ ແລະ ການລົງທຶນ, ສະບັບເລກທີ 1577/ກຜທ.ກຜ3, ລົງວັນທີ 3 ກໍລະກົດ 2024 ກ່ຽວກັບການກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການລົງທຶນຂອງລັດ ປະຈຳປີ 2025.
ໂອກາດດຽວກັນນີ້, ກອງປະຊຸມກໍ່ໄດ້ຮັບຟັງການສະເໜີ ແລະ ເຜີຍແຜ່ຄຳສັ່ງຂອງນາຍົກ ລັດຖະມົນຕີ ແຫ່ງ ສປປ ລາວ ວ່າດ້ວຍການສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ປະຈຳປີ 2025 ໂດຍທ່ານ ນາງ ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ຮັບຟັງການສະເໜີຮ່າງຄຳແນະນຳຂອງກະຊວງແຜນການ ແລະ ການລົງທຶນ ກ່ຽວກັບ ການສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການລົງທຶນ ຂອງລັດ ປະຈຳປີ 2025 ຈາກທ່ານ ໄພເລີດ ພົນບູລົມ, ຫົວໜ້າກົມແຜນການ, ກະຊວງແຜນການ ແລະ ການລົງທຶນ.
