ກອງປະຊຸມ ຄະນະກຳມະການຮ່ວມມື ລາວ – ຈີນ ປະຈໍາ ປີ 2019-2020 ໄດ້ຈັດຂຶ້ນໃນໄລຍະ ວັນທີ 7-8 ກໍລະກົດ 2020 ທີ່ຫ້ອງປະຊຸມຂອງ ກະຊວງ ແຜນການ ແລະການລົງທຶນ ໂດຍຜ່ານຮູບແບບກອງປະຊຸມທາງໄກ (Video conference) ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ປະທານຄະນະກຳມະການ ຮ່ວມມື ລາວ – ຈີນ ແລະ ໄດ້ຮັບກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ. ລັດຖະມົນຕີ ກະຊວງ ແຜນການ ແລະ ການລົງທຶນ. ກອງປະຊຸມ ມີຈູດປະສົງເພື່ອສະຫຼຸບຕີລາຄາ ແລະ ຖອດຖອນບົດຮຽນການຈັດຕັ້ງປະຕິບັດວຽກງານການຮ່ວມມືທາງ ດ້ານເສດຖະກິດ – ການຄ້າ ແລະ ເຕັກນິກ ລະຫວ່າງ ສປປ ລາວ ແລະ ສປ ຈີນ ໃນໄລຍະຜ່ານມາ ແລະ ວາງທິດທາງໃນການຮ່ວມມືໃນຕໍ່ໜ້າ.
ກອງປະຊຸມ ໄດ້ແບ່ງອອກເປັນ 2 ລະດັບ ຄື: ລະດັບວິຊາການ ແລະ ກອງປະຊຸມຂັ້ນສູງ. ກອງປະຊຸມລະດັບວິຊາການໄດ້ລົງເລິກແນະນໍາ ແລະ ປະກອບຄໍາຄິດຄໍາເຫັນກ່ຽວກັບການປະຕິບັດຂັ້ນຕອນການຂໍການຊ່ວຍເຫຼືອ ແລະກູ້ຢືມຈາກ ສປ ຈີນ, ກົນໄກການປະສານງານ ແລະ ແບບແຜນວິທີເຮັດວຽກລະຫວ່າງຫ້ອງການ ຄະນະກຳມະການຮ່ວມ ມື ລາວ-ຈີນ ກັບຈຸດປະສານງານຂອງຕົນທີ່ມີຢູ່ໃນ ກົມແຜນການ ຫຼື ກົມຮ່ວມມືສາກົນ ຂອງແຕ່ລະກະຊວງ – ອົງການຢູ່ຂັ້ນສູນກາງ ແລະ ຢູ່ຂະແໜງຮ່ວມມືຂອງພະແນກແຜນການ ແລະ ການລົງທຶນ ແຂວງ ແລະ ນະຄອນຫຼວງ ໃນທົ່ວປະເທດ. ກອງປະຊຸມຂັ້ນສູງວຽກງານການຮ່ວມມືລາວ – ຈີນ ປະຈໍາປີ 2019-2020 ໄດ້ລົງເລິກທົບທວນຜົນງານ ການຮ່ວມມືດ້ານເສດຖະກິດ, ການຄ້າ ແລະເຕັກນິກລະຫວ່າງ ລາວ – ຈີນ ໃນໄລຍະ 1 ປີກ່ວາ ຜ່ານມາ ແລະວາງທິດ ທາງແຜນການຮ່ວມມືໃນຕໍ່ໜ້າ, ນອກຈາກນີ້ຍັງໄດ້ຮັບຟັງການສະເໜີກ່ຽວກັບການສ້າງຄູ່ຮ່ວມຊະຕາກໍາລາວ – ຈີນ ແລະການສ້າງແລວທາງເສດຖະກິດ ລາວ – ຈີນ ແລະການພັດທະນາເສດຖະກິດຕາມແລວທາງລົດໄຟ ລາວ – ຈີນ ທີ່ເປັນຂອບການຮ່ວມມືທີ່ສໍາຄັນຂອງສອງປະເທດ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງ ແຜນການ ແລະການລົງທຶນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຮ່ວມມືດ້ານເສດຖະກິດ, ການຄ້າ ແລະເຕັກນິກລະຫວ່າງລາວ – ຈີນ ໃນໜຶ່ງປີກວ່າຜ່ານມາໂດຍພາຍໃຕ້ການຊີ້ນໍາ – ນໍາພາຂອງສູນກາງພັກ ແລະລັດຖະບານ ແລະການຮ່ວມມື ສະໜັບສະໜູນຈາກທຸກພາກສ່ວນນັບທັງສູນກາງ ແລະທ້ອງຖິ່ນ ໃນນີ້ມີຄະນະກຳມະການຮ່ວມ ມື ລາວ – ຈີນ ໃນນາມທີ່ເປັນເສນາທິການໃຫ້ແກ່ສູນກາງພັກ ແລະລັດຖະບານໄດ້ເປັນກຳລັງຫຼັກໃນການຊຸກຍູ້, ປະສານງານ ແລະຂັບເຄື່ອນການຈັດຕັ້ງປະຕິບັດການເຄື່ອນໄຫວວຽກງານຮ່ວມມືລາວ – ຈີນ ໂດຍສະເພາະການຮ່ວມມືດ້ານເສດຖະກິດ-ການຄ້າ ແລະເຕັກນິກໄດ້ສືບຕໍ່ຂະຫຍາຍຕົວ ແລະຮັບຜົນສຳເລັດຢ່າງດີ. ຜົນງານອັນພົ້ນເດັ່ນໃນປີທີ່ຜ່ານມາແມ່ນການພົວພັນຮ່ວມມືຂອງສອງປະເທດໄດ້ຮັບການຍົກລະດັບຂຶ້ນອີກບາດກ້າວໜຶ່ງຄືບົນພື້ນຖານການເປັນຄູ່ຮ່ວມມືຍຸດທະສາດ ຮອບດ້ານບົນຈິດໃຈ 4 ດີ (ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະຄູ່ຮ່ວມມືທີ່ດີ) ມາເປັນຄູ່ຮ່ວມ ຊາຕາກຳ ລາວ – ຈີນ.
ການຮ່ວມມື ລະຫວ່າງ ລາວ – ຈີນ ໄດ້ນໍາເອົາຜົນປະໂຫຍດຕົວຈິງມາໃຫ້ປະເທດຊາດ ແລະປະຊາຊົນສອງຊາດຢ່າງ ຫຼວງຫຼາຍ ໂດຍສະເພາະການລົງທຶນ ຂອງ ສປ ຈີນ ຍັງສືບຕໍ່ຮັກສາການຂະຫຍາຍຕົວຢ່າງຕໍ່ເນື່ອງ, ສະເພາະປີ 2019 ການລົງທຶນຈາກ ສປ ຈີນ ມີມູນຄ່າຫຼາຍກວ່າ 12 ຕື້ໂດລາ ແລະ ຂະແໜງການຕົ້ນຕໍແມ່ນ ຂະແໜງພະລັງງານໄຟຟ້ານໍ້າຕົກ, ບໍ່ແຮ່, ການກໍ່ສ້າງພື້ນຖານໂຄງລ່າງ ແລະອື່ນໆ. ໂຄງການກໍ່ສ້າງທາງລົດໄຟ ລາວ – ຈີນ ຮອດເດືອນ 6 ປີ 2020 ສໍາເລັດແລ້ວ 89,45% ແລະ ຕາມແຜນຄາດວ່າຈະສູ້ຊົນໃຫ້ສໍາເລັດໃນເດືອນ ທັນວາ 2021 ແລະໂຄງການກໍ່ສ້າງທາງດ່ວນ ວຽງ ຈັນ – ວັງວຽງ ຮອດ ເດືອນ ທັນວາ 2020 ຈະໃຫ້ສໍາເລັດຕາມແຜນການ. ພ້ອມດຽວກັນນັ້ນ, ການຄ້າສອງຝ່າຍ ລາວ – ຈີນ ໃນປີ 2019 ບັນລຸໄດ້ 3,92 ຕື້ໂດລາເພີ່ມຂຶ້ນ 22,12%, ໃນນັ້ນມູນຄ່າ ການສົ່ງອອກໄປຈີນບັນລຸ 2,1 ຕື້ໂດລາ ແລະມູນຄ່າການນຳເຂົ້າຈາກຈີນບັນລຸ 1,76 ຕື້ໂດລາຊຶ່ງເຮັດໃຫ້ ສປ ຈີນ ເປັນຄູ່ຮ່ວມການຄ້າໃຫຍ່ອັນດັບສອງຂອງລາວ. ພິເສດໃນປີ 2019-2020 ລັດຖະບານ ຈີນຍັງໄດ້ອະນຸມັດໂກຕ້າການສົ່ງອອກເຂົ້າສານຂອງລາວໄປຈີນຈໍານວນ 50.000 ໂຕນ ແລະ ແຂວງ ຢຸນນານ ສປ ຈີນ ໄດ້ໃຫ້ໂກຕ້າສົ່ງອອກ ງົວ-ຄວາຍ ຂອງ ລາວ ໄປ ຈີນ.