ກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານ ກາງສະໄໝ ໃນໄລຍະສົກປີ 2019-2022 ແລະ ທິດທາງແຜນວຽກຈຸດສຸມ ໄລຍະທ້າຍສະໄໝແຕ່ປີ 2023-2024 ຂອງໜ່ວຍພັກ ຫ້ອງການຄະນະກຳມະການຮ່ວມມື ລາວ-ຫວຽດນາມ ກຜທ.

by | May 2, 2023 | ການເຄື່ອນໄຫວ, ຂ່າວເດັ່ນ | 0 comments

ໂດຍປະຕິບັດຕາມມະຕິຕົກລົງ ຂອງຄະນະປະຈຳພັກກະຊວງແຜນການ ແລະ ການລົງທຶນ ສະບັບເລກທີ 079/ຄຈພ.ກຜທ, ລົງວັນທີ 21 ເມສາ 2023 ວ່າດ້ວຍການອະນຸມັດດໍາເນີນກອງປະຊຸມກາງສະໄໝ ຄັ້ງທີ IV ຂອງໜ່ວຍພັກຫ້ອງການຄະນະກໍາມະການຮ່ວມມື ລາວ-ຫວຽດນາມ; ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ພວມອອກແຮງແຂ່ງຂັນກັນ ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ຄັ້ງທີ IX (2021-2025) ຂອງລັດຖະບານ ໃຫ້ປະກົດຜົນເປັນຈິງ ແລະ ອອກແຮງແຂ່ງຂັນກັນສ້າງຜົນງານ ເພື່ອຂໍ່ານັບຮັບຕ້ອນ ວັນບຸນທີ່ສຳຄັນຂອງຊາດ, ກະກຽມໃຫ້ແກ່ກອງປະຊຸມກາງສະໄໝ ຄັ້ງທີ IV ຂອງອົງຄະນະພັກກະຊວງແຜນການ ແລະ ການລົງທຶນ.

ໜ່ວຍພັກຫ້ອງການຄະນະກໍາມະການຮ່ວມມື ລາວ-ຫວຽດນາມ ໄດ້ເປີດກອງປະຊຸມກາງສະໄໝ ຄັ້ງທີ IV ຢ່າງເປັນທາງການຂື້ນ, ພາຍໃຕ້ການເປັນປະທານກອງປະຊຸມຂອງ ສະຫາຍ ນາງ ຄຳຈັນ ວົງແສນບູນ, ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງແຜນການ ແລະ ການລົງທຶນ, ພ້ອມທັງໃຫ້ກຽດເຜີຍແຜ່, ເຊື່ອມຊືມເອກະສານຄໍາສັ່ງຂອງຄະນະເລຂາທິການສູນກາງພັກ ແລະ ຄຳແນະນຳ ຂອງຄະນະຈັດຕັ້ງສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ, ໂດຍມີ ເລຂາ, ຮອງເລຂາ ແລະ  ຄະນະໜ່ວຍພັກ, ຄະນະຫ້ອງການຜູ້ຕາງໜ້າຈາກໜ່ວຍພັກ ກົມຈັດຕັ້ງ ແລະ ພະນັກງານ ແລະ ໜ່ວຍພັກກົມກວດກາ, ມີບັນດາສະຫາຍສະມາຊິກພັກສົມບູນ ແລະ ສຳຮອງພາຍໃນໜ່ວຍພັກຫ້ອງການຄະນະກຳມະການຮ່ວມມື ລາວ-ຫວຽດນາມ ເຂົ້າຮ່ວມທັງໝົດ 17​ສະຫາຍ, ຍິງ 5 ສະຫາຍ.

ກອງປະຊຸມ ໄດ້ດຳເນີນໄປດ້ວຍບັນຍາກາດຟົດຟື້ນ ແລະ ມີຄວາມຮັບຜິດຊອບສູງຂອງບັນດາສະຫາຍສະມາຊິກພັກ ເຊິ່ງມີເນື້ອໃນສຳຄັນດັ່ງນີ້: (1) ຜ່ານສະຫລຸບຕີລາຄາການຈັດຕັ້ງປະຕິບັດວຽກງານກາງສະໄໝຂອງໜ່ວຍພັກ ໄລຍະແຕ່ປີ 2019-2022 ແລະ ທິດທາງແຜນວຽກຈຸດສຸມ ໄລຍະທ້າຍສະໄໝແຕ່ປີ 2023-2024; (2) ຜ່ານບົດສໍາຫລວດການນໍາພາລວມຂອງໜ່ວຍພັກ; (3) ເຊື່ອມຊືມເອກະສານທີ່ກຳນົດໄວ້ໃນກົດລະບຽບພັກ ສະໄໝທີ XI ຂອງພັກ; (4) ດຳເນີນການປ່ອນບັດທາບທາມຄວາມໄວ້ວາງໃຈ ແລະ (5) ຜ່ານໃບສຳຫລວດບຸນໃນຄະນະໜ່ວຍພັກ ແລະ ແຈ້ງຜົນການສັງລວມຄວາມໄວ້ວາງໄຈ. ໃນທ້າຍກອງປະຊຸມ ສະຫາຍ ປະທານກອງປະຊຸມ ຍັງໄດ້ໃຫ້ກຽດຢ່າງສູງ ໂອ້ລົມ ແລະ ມີຄຳເຫັນຊີ້ນໍາທີ່ສຳຄັນໃຫ້ແກ່ການນຳພາ ແລະ ຈັດຕັ້ງປະຕິບັດໜ້າທີ່ວຽກງານຂອງໜ່ວຍພັກຫ້ອງການຄະນະກຳມະການຮ່ວມມື ລາວ-ຫວຽດນາມ ໃຫ້ເກີດຜົນເປັນຈິງໃນຕໍ່ໜ້າ ໂດຍຮຽກຮ້ອງໃຫ້ທຸກສະຫາຍ ສະມາຊິກພັກພາຍໃນ   ໜ່ວຍຈົ່ງພ້ອມກັນສຸມຈິດ-ສຸມໃຈ ຜ່ານຜ່າຂໍ້ຫຍຸ້ງຍາກນາໆປະການ ເພື່ອປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຂອງຕົນ ໃຫ້ປະກົດຜົນເປັນຈິງ, ສ້າງໃຫ້ເປັນໜ່ວຍພັກປອດໄສ, ເຂັ້ມແຂງ,​ ໜັກແຫນ້ນ, ເປັນກໍາລັງແຮງປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ.