ໃນວັນທີ 22 ກຸມພາ 2022, ທີ່ສະໂມສອນຂອງກະຊວງແຜນການ ແລະ ການລົງທຶນ, ໄດ້ຈັດປະຖະກະຖາວັນສ້າງຕັ້ງສະຫະພັນກຳມະບານລາວ ຄົບຮອບ 66 ປີ ແລະ ວັນສ້າງຕັ້ງພັກກອມມູນິດຫວຽດນາມ ຄົບຮອບ 92 ປີ, ໂດຍການເປັນປະທານຮ່ວມຂອງທ່ານ ນາງ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ນາງ ອາລີ ວົງໜໍ່ບຸນທຳ ກຳມະການສູນກາງພັກ, ປະທານສູນກາງສະຫະພັນກຳມະບານ ລາວ, ພ້ອມດຽວກັນກໍ່ຍັງມີຄະນະປະຈຳພັກ, ຄະນະບໍລິຫານງານພັກກະຊວງ, ເລຂາ, ຮອງເລຂາໜ່ວຍພັກ ແລະ ຄະນະໜ່ວຍພັກຕະຫຼອດຮອດສະມາຊິກພັກ-ພະນັກງານຫຼັກແຫຼ່ງກໍ່ໄດ້ເຂົ້າຮ່ວມຮັບຟັງ.
ທ່ານ ນາງ ອາລີ ວົງໜໍ່ບຸນທຳ ໄດ້ກ່າວວ່າ: ເພື່ອເປັນການທົບທວນ ແລະ ຫວນຄືນເຖິງມູນເຊື້ອປະຫວັດສາດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ກໍຄືໄລຍະການຕໍ່ສູ້ກູ້ຊາດຂອງຊົນຊັ້ນກຳມະກອນຜູ້ອອກແຮງງານ ໄດ້ມີຄວາມນັບຮູ້ເຂົ້າໃຈກ່ຽວກັບມູນເຊື້ອ ແລະ ການເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ທີ່ຕິດພັນກັບມູນເຊື້ອແຕ່ໄລຍະການຕໍ່ສູ້ກູ້ຊາດມາເຖິງປະຈຸບັນຂອງປະຊາຊົນ, ຂອງຊົນຊັ້ນກຳມະກອນລາວ ແລະ ຜົນງານການປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອແນ່ໃສ່ປຸກລະດົມ ແລະ ສ້າງຈິດສຳນຶກໃຫ້ແກ່ສະມາຊິກກຳມະບານ ຫວນຄືນມູນເຊື້ອອັນອົງອາດກ້າຫານຂອງສະຫະພັນກຳມະບານ.
ພ້ອມດຽວກັນນີ້, ທ່ານ ນາງ ຄຳຈັນ ວົງແສນບູນ ໄດ້ກ່າວວ່າ: ວັນສ້າງຕັ້ງພັກກອມມູນິດຫວຽດນາມ ຄົບຮອບ 92 ປີ (03 ກຸມພາ 1930), ໃນປີ 1929 ຫວຽນອາຍກວັກ ໄດ້ສ້າງຕັ້ງພັກກອມມູນິດອິນດູຈີນຂື້ນ ແລະ ຕໍ່ມາກໍ່ໄດ້ຮັບການມອບໝາຍຈາກສາກົນກອມມູນິດໃຫ້ຈັດຕັ້ງພັກກອມມູນິດຫວຽດນາມຂື້ນ ໃນວັນທີ 03 ກຸມພາ 1930 ທີ່ກິວລອງ (ປະເທດຈີນ), ປະເທດຫວຽດນາມ ກ້າວເຂົ້າສູ່ການສ້າງສາລັດທິສັງຄົມນະຍົມ ແຕ່ກໍ່ພົບຄວາມຫຍຸ້ງຍາກຫຼາຍປະການເຊັ່ນ: ຕ້ອງໄດ້ຮຳບາດແຜສົງຄາມທີ່ແກ່ຍາວມາເປັນເວລາ 30 ປີ ສົງຄາມຊາຍແດນຍັງເກີດຂື້ນ ບັນດາອິດທິກຳລັງປໍລະປັກ ຍັງສຶບຕໍ່ມ້າງເພທຳລາຍໂດຍສະເພາະດ້ານເສດຖະກິດ ບັນດາປະເທດສັງຄົມນີຍົມພົບຄວາມຫຍຸ້ງຍາກນາໆປະການ.
