ກະຊວງແຜນການ ແລະ ການລົງທືນເປີດກອງປະຊຸມສະຫຼຸບຜົນຂອງການປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງປະຈໍາ ປີ 2022.

by | Apr 4, 2023 | ການເຄື່ອນໄຫວ, ຂ່າວເດັ່ນ | 0 comments

  

 

 

 

 

 

 

 

 

 

 

ໃນວັນທີ 30 ມີນາ 2023 ທີ່ສະໂມສອນກະຊວງແຜນການ ແລະ ການລົງທຶນ ໄດ້ເປີດກອງປະຊຸຸຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ແລະ ກອງປະຊຸມສະຫຼຸບວຽກງານກວດການ ປະຈຳປີ 2022 ແລະ ທິດທາງແຜນການ ປີ 2023, ໂດຍການເປັນປະທານຂອງທ່ານ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກ,ທ່ານ ປອ. ດາວບົວລະພາ ບາວົງເພັດ ກຳມະການຄະນະປະຈຳພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ, ຮອງລັດຖະມົນຕີກະຊວງແຜນການ ແລະ ການລົງທື, ມີທ່ານ ພູວົງ ພິລາເພັດ ກຳມະການຄະນະພັກ, ຫົວໜ້າຫ້ອງການຄະນະຈັດຕັ້ງສູນກາງພັກ, ທ່ານ ບຸນມີ ວິໄລຈິດ ຫົວໜ້າກົມຈັດຕັ້ງ ແລະ ພະນັກງານ, ທ່ານ ພູວົງ ພິມມະສອນ ຫົວໜ້າກົມກວດກາ, ມີບັນດາສະຫາຍຄະນະປະຈໍາພັກ, ຄະນະບໍລິຫານງານພັກ,ເລຂາໜ່ວຍພັກ, ຮອງເລຂາໜ່ວຍພັກ ແລະ ສະມາຊິກພັກສົມບູນ, ສອງເຂົ້າຮວ່ມ ທັງໝົດ 193 ທ່ານ, ຍິງ 74 ທ່ານ.

ໃນໄລຍະ 1 ປີຜ່ານມາຄະນະພັກກະຊວງແຜນການ ແລະ ການລົງທືນໄດ້ຖືສຳຄັນຕໍ່ກັບວຽກງານ ກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງເຊີ່ງແມ່ນວຽກໜຶ່ງ ທີ່ເປັນຍຸດທະສາດຂອງພັກ, ເປັນປັດໄຈຕັດສິນຜົນໄດ້-ຜົນເສຍໃນການຈັດຕັ້ງປະຕິບັດແນວທາງແຜນນະໂຍບາຍຂອງພັກ, ແຜນພັດທະນາເສດຖະກິດສັງຄົມຂອງລັດໃນແຕ່ລະໄລຍະ;ພ້ອມນີ້ກໍ່ໄດ້ເອົາໃຈໃສ່ວຽກງານດັ່ງກ່າວ​ເປັນຈຸດຫຼັກເນື່ອງຈາກ​ວຽກ​ງານມີຄວາມ​ສໍາຄັນ ແລະ ​​​ເປັນ​ພື້ນຖານ​ອັນ​ໜັກ​ແໜ້ນ ​ໃຫ້​ແກ່​ການ​ເຮັດ​ສໍາ​ເລັດ​ໜ້າ​ທີ່​ວິຊາ​ສະ​ເພາະຂອງວຽກງານແຜນການ ແລະ ການລົງທືນ​,ຄະນະພັກກະຊວງໄດ້ປັບປຸງກໍ່ສ້າງ​​ບັນດາຮາກຖານພັກໃຫ້ກາຍເປັນໜ່ວຍພັກປອດໃສ,ເຂັ້ມແຂງ,ໜັກແໜ້ນ;ຖັນແຖວພະນັກງານ-ສະມາຊິກພັກກໍ່ມີການຂະຫຍາຍຕົວທັງດ້ານປະລິມານ ແລະ ຄຸນນະພາບດີຂື້ນເປັນກ້າວ; ພ້ອມດຽວກັນກໍ່ໄດ້ມີການເຜີຍແຜ່ມະຕິຕ່າງໆຂອງຂັ້ນເທີງວາງອອກໃນແຕ່ລະໄລຍະໃຫ້ພະນັກງານ-ລັດຖະກອນທີ່ຢູ່ໃນຄວາມຮັບຜິດຊອບຂອງຕົນໄດ້ຮັບຮູ້-ເຂົ້າໃຈ ແລະ ພ້ອມກັນຈັດຕັ້ງປະຕິບັດໃຫ້ໄດ້ຮັບໝາກຜົນຕາມລະດັບຄາດໝາຍເປັນຕົ້ນແມ່ນ:ມະຕິຂອງກົມການເມືອງສູນກາງພັກວ່າດ້ວຍການຕີລາຄາພະນັກງານ,ຄຳສັ່ງຂອງຄະນະເລຂາທິການສູນກາງພັກວ່າດ້ວຍການດໍາເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ,ຄຳແນະນຳຂອງຄະນະຈັດຕັ້ງສູນກາງພັກກ່ຽວກັບການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ,ບົດໂອ້ລົມຂອງຫົວໜ້າຄະນະຈັດຕັ້ງສູນກາງພັກຕໍ່ກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງພັກທົ່ວປະເທດ ປະຈຳ ປີ 2022 ແລະ ທິດທາງໜ້າທີ່ ປະຈຳ ປີ 2023, ບົດສະຫຼຸບຕີລາຄາສະພາບວຽກງານ ກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງກະຊວງແຜນການ ແລະ ການລົງທືນ ປະຈຳ ປີ 2022 ແລະ ທິດທາງແຜນການ ປີ 2023, ບົດສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງ ໄລຍະຜ່ານມາ ແລະ ທິດທາງແຜນການຮອດປີ 2025, ຄໍາເຫັນໂອ້ລົມຂອງເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ.

ໃນກອງປະຊຸມຄັ້ງນີ້ຜູ້ເຂົ້າຮ່ວມໄດ້ປະກອບຄຳຄິດເຫັນ ແລະ ປະສົບການຮ່ວມກັນໂດຍສະເພາະ ແມ່ນເນື້ອໃນບົດສະຫຼຸບຕີລາຄາສະພາບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຂອງກະຊວງແຜນການ ແລະ ການລົງທືນປະຈຳ ປີ 2022 ແລະ ທິດທາງແຜນການປີ 2023 ໃຫ້ເລິກເຊິ່ງ ເພື່ອເສີມຂະຫຍາຍດ້ານຕັ້ງໜ້າ ແລະ ຊອກຫາວິທີການແກ້ໄຂຂໍ້ຄົງຄ້າງ,ທັງນີ້ແມ່ນເພື່ອແນໃສ່ ເຮັດໃຫ້ກອງປະຊຸມວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງກະຊວງແຜນການ ແລະ ການລົງທືນປະຈຳປີ 2022 ສາມາດນໍາໄປຈັດຕັ້ງປະຕິບັດຢ່າງສອດຄ່ອງກັບສະພາບຕົວຈິງ ແລະ ໄດ້ຮັບໝາກຜົນດີກວ່າເກົ່າ.

ໃນຕອນທ້າຍປະທານກອງປະຊຸມໄດ້ຮຽກຮ້ອງໃຫ້ບັນດາຜູ້ແທນກອງປະຊຸມຈົ່ງພ້ອມກັນຕັດສິນໃຈ, ອົດທົນພະຍາມຜ່ານຜາອຸປະສັກ ແລະ ມີຄວາມເປັນເອກະພາບສູງ ຕໍ່ການຈັດຕັ້ງປະຕິບັດວຽກງານຈັດຕັ້ງ ແລະ ວຽກງານກວດກາ ຢູ່ຂົງເຂດຂະແໜງແຜນການ ແລະ ການລົງທຶນ ຂອງພວກເຮົາ, ເຮັດແນວໃດເພື່ອບໍ່ໃຫ້ມີປະກົດການຫຍໍ້ທໍ້ຕ່າງໆ ທີ່ຈະເກີດຂຶ້ນໃນວຽກງານກໍ່ສ້າງພັກ-ພະນັກງານ; ເພື່ອສ້າງຄວາມເຊື່ອໝັ້ນໃນການປ່ຽນແປງໃໝ່ຢ່າງຕັ້ງໜ້າ, ສູ້ຊົນປະຕິບັດຄາດ    ໝາຍທີ່ມະຕິກອງປະຊຸມໃຫຍ່ ຄັ້ງທີ XI ຂອງພັກ, ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ແລະ ມະຕິກອງປະຊຸມຄັ້ງທີ IV ຂອງອົງຄະນະພັກ ກະຊວງແຜນການ ແລະ ການລົງທຶນ ໃຫ້ປະກົດຜົນເປັນຈິງ.