ກະຊວງແຜນການ ແລະ ການລົງທຶນ ເປີດກອງປະຊຸມຄົບຄະນະບໍລິຫານງານພັກ ກະຊວງ ແຜນການ ແລະການລົງທຶນ ເປີດກວ້າງ ຄັ້ງທີ 10, ສະໄໝທີ IV.

Feb 14, 2024 | ການເຄື່ອນໄຫວ, ຂ່າວເດັ່ນ

ໃນວັນທີ 14 ກຸມກາ 2024 ຢູ່ທີ່ ກະຊວງແຜນການ ແລະການລົງທຶນ ໄດ້ເປີດກອງປະຊຸມຄົບຄະນະບໍລິຫານງານພັກ ກະຊວງ ແຜນການ ແລະການລົງທຶນ ເປີດກວ້າງ ຄັ້ງທີ 10 ສະ ໄໝທີ IV  ຂຶ້ນ​ຢ່າງ​ເປັນ​ທາງການ. ​ພາຍໃຕ້ການເປັນປະທານຂອງ ສະຫາຍ ຄຳເຈນ ວົງໂພສີ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງແຜນການ ແລະການລົງທຶນ ມີຄະນະບໍລິຫານງານພັກ ກະຊວງ ແລະ ບັນດາສະຫາຍເລຂາ, ຮອງເລຂາ, ຄະນະໜ່ວຍພັກ ແລະ ຄະນະກົມທົ່ວກະຊວງ ຜທ ເຂົ້າຮ່ວມ.

ສະຫາຍ ຄຳເຈນ ວົງໂພສີ ກຳມະການສູນກາງພັກ ລັດຖະມົນຕີ ກະຊວງ ແຜນການ ແລະ ການລົງທຶນໄດ້ເນັ້ນໃຫ້ ບັນດາສະຫາຍກຳມະການພັກກະຊວງ ແລະ ຄະນະໜ່ວຍພັກ ສືບຕໍ່ການເປັນເສນາທິການໃຫ້ແກ່ ຄະນະພັກ-ຄະນະນໍາກະຊວງ ຜທ ໃນດ້ານວຽກງານວິຊາສະເພາະເປັນຕົ້ນ ການຄົ້ນຄວ້ານະໂຍບາຍ ແລະ ມາດຕະການຕ່າງໆ ໃຫ້ສອດຄ່ອງກັບສະພາບເສດຖະກິດ-ສັງຄົມ ຂອງປະເທດ ເພື່ອເຮັດໃຫ້ຜົນການຄົ້ນຄວ້າສາມາດປະກອບສ່ວນຢ່າງຕັ້ງໜ້າ ໃຫ້ແກ່ການສ້າງ ແລະ ຊຸກຍູ້ ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ໃນແຕ່ລະໄລຍະ.ສືບຕໍ່ປັບປຸງກົນໄກການປະເມີນຜົນໂຄງການລົງທຶນຂອງລັດທັງ 4 ໄລຍະໃຫ້ຖືກຕ້ອງສອດຄ່ອງ, ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ, ເປັນເຈົ້າການໃນການຊຸກຍູ້ ຊ່ວຍເຫຼືອບັນດາແຂວງ ແລະ ກະຊວງ ໃນການປະກອບເອກະ ສານໂຄງການໃຫ້ຄົບຖ້ວນ ຕາມກົດໝາຍວ່າດ້ວຍການລົງທຶນຂອງລັດ, ປະສານສົມທົບກັບໂຄງການ PIMCAP ໃນການຈັດຕັ້ງປະຕິບັດວຽກງານໃນແຕ່ລະໄລຍະ; ສືບຕໍ່ສ້າງ ແລະ ປັບປຸງບັນຊີຮຽກການລົງທຶນທີ່ມີຄຸນນະພາບ ເພື່ອດຶງດູດການລົງທຶນ, ຫັນເປັນທັນສະ ໄໝລະບົບ ບໍລິການ-ການລົງທຶນປະຕູດຽວ ເພື່ອອຳນວຍຄວາມສະດວກແກ່ການດຶງດູດ ແລະ ສົ່ງເສີມການລົງທຶນຢ່າງມີປະສິດທິພາບ, ລວມທັງເພີ່ມຄວາມເຂັ້ມແຂງໃນການຈັດຕັ້ງປະຕິບັດ ຄຳສັ່ງ 02/ນຍ ຕາມຫຼັກການ “Be Ready” ແລະ ຄໍາສັ່ງ 03/ນຍ; ສືບຕໍ່ຄົ້ນຄວ້ານະໂຍບາຍ ແລະ ຜັນຂະຫຍາຍນິຕິກຳທີ່ມີ ເພື່ອສຸມໃສ່ພັດທະນາຊົນນະບົດ, ພັດທະນາບັນດາຈຸດສຸມ ແລະ ລຶບລ້າງຄວາມທຸກຍາກໃນຂອບເຂດທົ່ວປະເທດໃຫ້ໄດ້ຢ່າງໜັກແໜ້ນ, ປັບປຸງກົນໄກການຄຸ້ມຄອງສູນສະຖິຕິແຫ່ງຊາດ, ປັບປຸງກົນໄກການປະສານງານ, ຕິດ

ຕາມ, ກວດກາ, ລາຍງານຂໍ້ມູນສະຖິຕິໃຫ້ເປັນລະບົບ ແລະ ທັນເວລາ; ສືບຕໍ່ຈັດຕັ້ງປະຕິບັດກົນໄກປະຕູດຽວ, ສ້າງນິຕິກຳຕ່າງໆໃຫ້ເປັນລະບົບຄົບຊຸດ, ປັບປຸງລະບອບລະ ບຽບການ, ແບບແຜນການເຄື່ອນໄຫວວຽກງານປະຕູດຽວ ຮ່ວມກັບບັນດາຂະແໜງການທີ່ ກ່ຽວຂ້ອງ ໃຫ້ຈະແຈ້ງຕັດເວລາລົງຕື່ມ ແລະ ມີປະສິດທິພາບກວ່າເກົ່າ, ຮ່ວມມືກັນ ແລະ ມີຄວາມເປັນເອກະພາບສູງໃນການຄົ້ນຄວ້າປະຕິບັດນະໂຍບາຍ, ກົນໄກການສົ່ງເສີມ ແລະ ຄຸ້ມຄອງການລົງທຶນພາຍໃນ ແລະ ຕ່າງປະເທດ ແລະ ບັນດາເຂດເສດຖະກິດພິເສດ ໃຫ້ມີຄວາມວ່ອງໄວ, ໂປ່ງໃສ ແລະ ຍຸຕິທຳ, ນໍາເອົາຜົນປະໂຫຍດລວມຂອງຊາດເປັນພື້ນຖານ. ພ້ອມກັນນີ້, ກໍສະເໜີໃຫ້ຄະນະບໍລິຫານງານພັກ, ຄະນະນໍາ, ບັນດາສະຫາຍຄະນະໜ່ວຍພັກ ເອົາໃຈໃສ່ຄົ້ນຄວ້າປະກອບສ່ວນໃນການແກ້ໄຂບັນຫາຄວາມຫຍຸ້ງຍາກດ້ານງົບປະມານ ແລະ ປະກອບສ່ວນເຂົ້າໃນການແກ້ໄຂຄວາມທຸກຍາກຂອງປະຊາຊົນ ຕາມແນວທາງນະໂຍບາຍ ຂອງພັກ ແລະ ລັດຖະບານຊີ້ນຳແຕ່ລະໄລຍະ.

ພ້ອມນີ້ ໃຫ້ສືບຕໍ່ສຸມໃສ່ສ້າງ ແລະ ປັບປຸງນິຕິກຳຕ່າງໆ ຂອງຂະແໜງແຜນການ ແລະ ການລົງທຶນ ເຊັ່ນ: ກົດໝາຍ, ດຳລັດ, ນິຕິກຳລຸ່ມດຳລັດ ໃຫ້ເປັນລະບົບຄົບຊຸດ ແລະ ຮັດກຸມບົນຈິດໃຈບຸກທະລຸ ເພື່ອເປັນເຄື່ອງມືໃນການຄຸ້ມຄອງເສດຖະກິດມະຫາພາກ ຕາມພາລະບົດບາດຂອງກະຊວງແຜນການ ແລະ ການລົງທຶນ ໃຫ້ມີຄວາມໜັກແໜ້ນ-ເຂັ້ມແຂງ, ຈໍາກັດບັນດາຊ່ອງວ່າງ ແລະ ຂໍ້ຄົງຄ້າງທີ່ພວກສະຫາຍໄດ້ຕີລາຄາໃນບົດສຳຫຼວດການນໍາພາລວມໃຫ້ຫຼຸດໜ້ອຍຖອຍລົງ.