ໃນວັນທີ 26 ເມສາ 2021, ກະຊວງແຜນການ ແລະ ການລົງທຶນ ໄດ້ຈັດຂະບວນການສັກວັກຊີນ ເພື່ອປ້ອງກັນພະຍາດໂຄວິດ-19 ໃຫ້ແກ່ພະນັກງານ-ລັດຖະກອນໃນທົ່ວກະຊວງ (ເຂັມທຳອິດ) ຈໍານວນ 400 ກວ່າຄົນ ແນໃສ່ຫລຸດຜ່ອນຄວາມສ່ຽງໃນການຕິດເຊື້ອພະຍາດດັ່ງກ່າວ.
ໂອກາດນີ້, ທ່ານ ປອ. ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ໃຫ້ສຳພາດວ່າ: ການສັກວັກຊີນນີ້ ເປັນມາດຕາການທີ່ສຳຄັນຫລາຍ ເຊິ່ງພວກເຮົາຈະຕ້ອງໄດ້ພ້ອມກັນປະຕິບັດ ເນື່ອງຈາກວ່າເປັນທາງອອກທີ່ສຳຄັນ, ຖ້າຫາກວ່າພວກເຮົາໄດ້ຮັບວັກຊີນຢ່າງທົ່ວເຖິງ ກໍຈະສ້າງພູມຄຸ້ມກັນໃຫ້ແກ່ຊຸມຊົນຂອງພວກເຮົາໄດ້ເປັນຢ່າງດີ. ກະຊວງແຜນການ ແລະ ການລົງທຶນ ໄດ້ປຸກລະດົມໃຫ້ພະນັກງານ-ລັດຖະກອນ ທັງໝົດພາຍໃນກະຊວງຂອງຕົນ ໃຫ້ມາສັກວັກຊີນຢ່າງທົ່ວເຖິງ ແລະ ຄົບຕາມກຳນົດ ໂດຍບໍ່ໄດ້ເສຍຄ່າ. ພ້ອມກັນນັ້ນ ກໍໄດ້ຮຽກຮ້ອງໃຫ້ຜູ້ທີ່ໄດ້ສັກແລ້ວເຂັມທີ່ໜຶ່ງ ໃຫ້ປະຕິບັດຕາມຄຳແນະນຳຂອງແພດ-ໝໍຢ່າງເຄັ່ງຄັດ ແລະ ໃຫ້ສືບຕໍ່ມາສັກເຂັມທີສອງໃຫ້ຄົບຕາມກຳນົດເວລາ ເພື່ອໃຫ້ຮ່າງການສາມາດສ້າງພູມຄຸ້ມກັນ ແລະ ເຮັດໃຫ້ຢາທີ່ສັກໄປແລ້ວນັ້ນ ມີປະສິດທິຜົນສູງສຸດ. ທ່ານ ປອ. ກິແກ້ວ ຈັນທະບູຣີ ໂດຍຕາງໜ້າໃຫ້ຄະນະນໍາກະຊວງ ໄດ້ຮຽກຮ້ອງມາຍັງພະນັກ ງານ-ລັດຖະກອນ ທັງໝົດພາຍໃນກະຊວງແຜນການ ແລະ ການລົງທຶນ ເຖິງວ່າຈະສັກວັກຊີນແລ້ວກໍດີ, ຜູ້ທີ່ບໍ່ໄດ້ສັກກໍດີ ໃຫ້ສືບຕໍ່ປະຕິບັດມາດຕະການປ້ອງກັນຕ່າງໆທີ່ວາງອອກຢ່າງເຂັ້ມງວດ ເປັນຕົ້ນ ການຮັກສາໄລຍະຫ່າງ, ລ້າງມືໃສ່ເຈວ ຫລື ສະບູ, ໃສ່ຜ້າປິດປາກ-ດັງ, ຫ້າມບໍ່ໃຫ້ມີການຊຸມແຊວ ແລະ ຖ້າບໍ່ຈຳເປັນກໍໃຫ້ຢູ່ເຮືອນ ເພື່ອຫລຸດຜ່ອນຄວາມສ່ຽງໃນການຕິດເຊື້ອ ຫລື ແຜ່ເຊື້ອພະຍາດໂຄວິດ-19.
