ກະຊວງ ແຜນການ ແລະ ການລົງທຶນ ຈັດກິດຈະກຳປູກຕົ້ນໄມ້ ຕ້ອນຮັບກອງປະຊຸມໃຫຍ່ ຄັ້ງທີ IV ຂອງອົງຄະນະພັກ

by | Aug 13, 2020 | Uncategorized @lo-la, ການເຄື່ອນໄຫວ | 0 comments

ໃນວັນທີ 11 ກໍລະກົດ 2020 ທີ່ບ້ານດົງໝາກຄາຍ ເມືອງໄຊທານີ ນະຄອນຫຼວງວຽງຈັນ, ກະຊວງແຜນການ ແລະການລົງທຶນ ໄດ້ຈັດກິດຈະກຳປູກຕົ້ນໄມ້ຂື້ນເພື່ອສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ IV      ຂອງອົງຄະນະພັກກະຊວງ ແຜນການ ແລະ ການລົງທຶນ (ກຜທ) ໂດຍມີຄະນະພັກ, ຄະນະນຳ ແລະ ພະນັກງານໃນກະຊວງເຂົ້າຮ່ວມຢ່າງຟົດຟື້ນ.

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກຜທ ໄດ້ມີຄຳເຫັນວ່າ: ພວກເຮົາມາເຕົ້າໂຮມກັນເພື່ອປູກຕົ້ນໄມ້ໃນມື້ນີ້ແມ່ນເພື່ອພ້ອມກັນຫວນຄືນເຖິງຄວາມສຳຄັນ ແລະຄວາມເອົາໃຈໃສ່ຂອງການນຳພັກ-ລັດ ຕໍ່ການພັດທະນາ ແລະຄຸ້ມຄອງຊັບພະຍາກອນປ່າໄມ້ຢູ່ປະເທດເຮົາ. ປ່າໄມ້ ແລະຊັບພະຍາກອນປ່າໄມ້ແມ່ນມີຄວາມໝາຍຄວາມສຳຄັນຫລາຍຕໍ່ກັບການພັດທະນາເສດຖະກິດ-ສັງຄົມຂອງຊາດ, ການປົກປັກຮັກສາສິ່ງແວດລ້ອມກໍຄືການປັບປຸງຊີວິດການເປັນຢູ່ ແລະແກ້ໄຂຄວາມທຸກຍາກຂອງປະຊາຊົນບັນດາເຜົ່າ. ຂະບວກການປູກຕົ້ນໄມ້ໃນຄັ້ງນີ້ ແມ່ນປີທໍາອິດທີ່ພວກເຮົາປູກຕົ້ນໄມ້ຢູ່ໃນຂອບເຂດພື້ນທີ່ໄດ້ຮັບການແບ່ງປັນໃຫ້ຄຸ້ມຄອງ-ນຳໃຊ້ຂອງກະຊວງ ຜທ ທີ່ ບ້ານດົງໝາຍຄາບ ແລະ ເປັນອີກກິດຈະກຳໜຶ່ງ ທີ່ມີຄວາມສຳຄັນເພື່ອສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ກຜທ ທີ່ຈະມາເຖິງໃນມໍ່ໆນີ້.