ໃນວັນທີ 20 ມີນາ 2024 ທີ່ສະໂມສອນຂອງ ກະຊວງແຜນການ ແລະ ການລົງທຶນ ໄດ້ຈັດພິທີສະເຫຼີມສະຫຼອງ ວັນສ້າງຕັ້ງພັກປະຊາຊົນປະຕິວັດລາວ 22 ມີນາ 1955 (ຄົບຮອບ 69 ປີ); ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບ ຮອບ 78 ປີ ໂດຍໃຫ້ກຽດເປັນ ປະທານ ແລະ ປາຖະກະຖາຂອງ ສະຫາຍ ຄຳເຈນ ວົງໂພສີ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີ ກະຊວງ ຜທ; ມີບັນດາສະຫາຍກໍາມະການຄະນະບໍລິຫານງານພັກ, ມີບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີປາຖະກະຖາຄັ້ງນີ້, ຈະໄດ້ຮັບຟັງການເຜີຍແຜ່ເຊື່ອມຊຶມ 3 ເອກະສານ ຄື:1. ເຜີຍແຜ່ເຊື່ອມຊຶມ ແລະຜັນຂະຫຍາຍ ທິດຊີ້ນຳຂອງສະຫາຍເລຂາ ທິການໃຫຍ່ ຄະນະບໍລິຫານງານສູນກາງພັກ ຕໍ່ກັບວຽກງານການເງິນທົ່ວປະເທດ. 2. ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ, 3. ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ ການປາຖະກະຖານີ້, ກໍເພື່ອທົບທວນຫວນຄືນມູນເຊື້ອ ແລະ ໄຊຊະນະປະຫວັດສາດ ຂອງພາລະກິດແຫ່ງການຕໍ່ສູ້ປົດປ່ອຍຊາດ ໃນເມື່ອກ່ອນ ແລະ ຜົນສໍາເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນໍາພາ ຂອງພັກປະຊາຊົນ ປະຕິວັດລາວ ຕະຫຼອດໄລຍະ 69 ປີຜ່ານມາ; ຖືເອົາວັນສ້າງຕັ້ງພັກປະຊາຊົນ ປະຕິວັດລາວ ເພື່ອຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ; ເພື່ອປຸກລະດົມນໍ້າໃຈຮັກຊາດ, ຮັກລະບອບໃໝ່, ເປັນເຈົ້າຕົ້ນເອງ, ສ້າງຄວາມເຂັ້ມແຂງດ້ວຍຕົນເອງ, ເຊີດຊູບົດບາດການນໍາພາຂອງພັກ ໄປພ້ອມກັບການປຸກລະດົມຂະບວນການແຂ່ງຂັນ “ຮັກຊາດ ແລະ ພັດທະນາ” ໂດຍຕິດພັນກັບການຍູ້ແຮງຂະບວນການດ້ານຕ່າງໆ ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໃນຕໍ່ໜ້ານີ້ ໃຫ້ບັນລຸຕາມຄາດໝາຍທີ່ວາງໄວ້.
ພ້ອມນີ້, ກໍເພື່ອສືບຕໍ່ບຸກທະລຸທາງດ້ານແນວຄິດ ຈິນຕະນາການ, ສ້າງໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ, ສ້າງຄວາມຮັບຮູ້ດ້ານແນວຄິດ ແລະ ການກະທໍາ, ສົ່ງເສີມດ້ານດີ, ແກ້ໄຂບັນດາຂໍ້ຄົງຄ້າງ ແລະ ສິ່ງທ້າທາຍຕ່າງໆທີ່ເກີດຂຶ້ນ, ສ້າງຄວາມເຊື່ອໝັ້ນຂອງພະນັກງານສະມາຊິກພັກ ແລະ ປະຊາຊົນບັນດາເຜົ່າຕໍ່ການນໍາພາ ຂອງພັກ, ການຄຸ້ມຄອງຂອງລັດ, ເພື່ອສ້າງຄວາມຮັບຮູ້ຢ່າງເລິກເຊິ່ງ ເຖິງຄວາມປີຊາສາມາດ ແລະ ຄວາມສະຫຼາດຫຼັກແຫຼມຂອງພັກເຮົາໃນການນໍາພາຂະບວນການຕໍ່ສູ້ປົດປ່ອຍຊາດ ກໍຄືການນໍາພາປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດສັງຄົມນິຍົມ.
ຄຽງຄູ່ກັນນັ້ນ, ເພື່ອພ້ອມກັນລະນຶກເຖິງຄຸນງາມຄວາມດີ ແລະ ນໍ້າໃຈເສຍສະຫຼະອັນສູງສົ່ງ ຂອງບັນດານັກຮົບທີ່ໄດ້ອຸທິດ ເພື່ອປະເທດຊາດ ໃນຂະບວນການຕໍ່ສູ້ປົດປ່ອຍຊາດ ທີ່ມີຫຼາຍເຫດການປະຫວັດສາດ ຊຶ່ງປວງຊົນລາວທັງຊາດບໍ່ມີວັນລືມ.
ການປາຖະກະຖາຄັ້ງນີ້, ສະຫາຍ ຄຳເຈນ ວົງໂພສີ ໄດ້ຍົກໃຫ້ເຫັນເຖິງເງື່ອນໄຂຂອງການກຳເນີດຂຶ້ນຂອງພັກປະຊາຊົນ ປະຕິວັດລາວ, ທາດແທ້ ແລະ ອຸດົມການຂອງພັກ; ພາລະກິດອັນພົ້ນເດັ່ນຂອງພັກ ຕະຫຼອດໄລຍະ 69 ປີຜ່ານມາ, ນັບແຕ່ໄດ້ຮັບການສ້າງຕັ້ງໃນໄລຍະນໍາພາຕໍ່ສູ້ປົດປ່ອຍຊາດ, ນໍາພາປົກປັກຮັກສາ ແລະ ສ້າງສາປະເທດຊາດ, ນໍາພາຈັດຕັ້ງປະຕິບັດແນວທາງປ່ຽນແປງໃໝ່ ຈົນມາຮອດປັດຈຸບັນ; ພ້ອມນີ້, ກໍໄດ້ເນັ້ນໃຫ້ເສີມຂະຫຍາຍມູນເຊື້ອ, ທາດແທ້ ຂອງພັກ ເຂົ້າໃນການຈັດຕັ້ງປະຕິບັດພາລະກິດປ່ຽນແປງໃໝ່ ໃຫ້ປະກົດຜົນເປັນຈິງ ແລະ ຍັງຮຽກຮ້ອງໃຫ້ບັນດາສະຫາຍຄະນະປະຈຳພັກ, ຄະນະບໍລິຫານງານພັກ, ຄະນະນໍາ ກະຊວງ, ບັນດາເລຂາໜ່ວຍພັກ, ຮອງເລຂາໜ່ວຍພັກ, ຄະນະໜ່ວຍພັກ ພ້ອມດ້ວຍສະມາຊິກພັກພະນັກງານທຸກສະຫາຍ ຈົ່ງພ້ອມກັນຍົກສູງຄວາມຮັບຜິດຊອບໃນການຮໍ່າຮຽນ, ເຊື່ອມຊຶມ, ກຳແໜ້ນ ບັນດາເນື້ອໃນເອກະສານຕ່າງໆຢ່າງເລິກເຊິ່ງ, ຖືເອົາພິທີປາຖະກະຖາຄັ້ງນີ້ ເປັນເວທີແຫ່ງການຮຽນຮູ້, ປັບປຸງທັດສະນະແນວຄິດໃນດ້ານຕັ້ງໜ້າ, ບຸກທະລຸດ້ານແນວຄິດຈິນຕະນາການຢ່າງເລິກເຊິ່ງ, ປະປ່ອຍແນວຄິດຮີດເກົ່າຄອງເດີມ, ກ້າວໄປຕາມການວິຖີດຳລົງຊີວິດແບບໃໝ່ ຢ່າງມີໄຊ.
