ວັນທີ 23 ມີນາ 2022 ການນໍາຂອງ ສອງ ກະຊວງແຜນການ ແລະ ການລົງທຶນ ຂອງລາວ- ຫວຽດນາມ ພ້ອມດ້ວຍຄະນະລົງເຄຶ່ອນໄຫວວຽກງານ ແລະ ຢ້ຽມຢາມໂຄງການສວນອຸທິຍານມິດຕະພາບລາວ- ຫວຽດນາມ, ໂຄງການກໍ່ສ້າງສະຖາບັນເສດຖະກິດ – ການເງິນດົງຄໍາຊ້າງ ແລະ ຢ້ຽມຢາມດ່ານສານກົນສິນຄ້າທ່າບົກທ່ານາແລ້ງ ແລະ ເຂດໂລຈິດສະຕິກນະຄອນຫຼວງວຽງຈັນ ເຊິ່ງຄະນະນຳ ສສ ຫວຽດນາມນຳໂດຍທ່ານ ຫງວຽນ ຈີ້ ຢຸງ ລັດຖະມົນຕີກະຊວງແຜນການ ແລະ ການລົງທຶນ ສສ ຫວຽດນາມ ແລະ ປະທານຄະນະກຳມະການຮ່ວມມືຫວຽດນາມ-ລາວ ແລະ ຄະນະນໍາກະຊວງແຜນການ ແລະ ການລົງທຶນຂອງລາວ ທ່ານວຽງສະຫວັນ ວິໄລພອນ ຮອງປະທານຄະນະກໍາມະການຮ່ວມມືລາວ – ຫວຽດນາມ ພ້ອມຄະນະ ໃນການລົງຢ້ຽມຢາມໂຄງການກໍ່ສ້າງສະຖາບັນເສດຖະກິດ – ການເງິນດົງຄໍາຊ້າງ ໃຫ້ຕ້ອນຮັບໂດຍທ່ານ ຟອງສີສຸພັນ ພົມມະວົງ ຮອງຫົວໜ້າສະຖາບັນເສດຖະກິດ – ການເງິນ ພ້ອມຄະນະ, ເຊິ່ງໂຄງການກໍ່ສ້າງສະຖາບັນເສດຖະກິດ – ການເງິນ ເປັນໂຄງການທີ່ລັດຖະບານ ສສ ຫວຽດນາມໃຫ້ທຶນຊ່ວຍເຫຼືອລ້າແກ່ລັດຖະບານລາວ ເພື່ອປະກອບສ່ວນເພີ່ມທະວີຄວາມສາມັກຄີມິດຕະພາບເລິກເຊີ່ງລະຫວ່າງສອງພັກ, ສອງລັດຖະບານ ແລະ ປະຊາຊົນສອງປະເທດຫວຽດນາມ ແລະ ລາວ.
ນອກຈາກນັ້ນຄະນະນຳທັງສອງກະຊວງກໍໄດ້ໄປຢ້ຽມຢາມດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຈິດສະຕິກ ນະຄອນຫຼວງວຽງຈັນ ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ໃຫ້ການຕ້ອນຮັບໂດຍທ່ານ ຈັນທອນ ສິດທິໄຊ ປະທານບໍລິສັດ ພີທີແອວໂຮນດິ້ງ ຈໍາກັດ ທັງເປັນປະທານບໍລິສັດ ວຽງຈັນໂລຈິດສະຕິກພາກ ຈຳກັດ ໃນໂອກາດນີ້ຍັງໄດ້ຮັບຟັງ ທ່ານ ຈັນທອນ ສິດທິໄຊ ໄດ້ລາຍງານຫຍໍ້ກ່ຽວກັບກຸ່ມບໍລິສັດ ພີທີແອວໂຮນດິ້ງ ຫຼື ກຸ່ມບໍລິສັດ ພົງສະຫວັນ ມີເຄືອຂ່າຍທຸລະກິດຫຼາຍຂະແໜງການເຊັ່ນ: ທະນາຄານ ສາຍການບິນ ພະລັງງານ ໂລຈິດສະຕິກ ບໍລິສັດຂາອອກ-ຂາເຂົ້າ ປະກັນໄພ ແລະ ບໍ່ແຮ່ ມີ 10 ກວ່າບໍລິສັດໃນເຄືອທີ່ໄດ້ດຳເນີນງານຢູ່ໃນປັດຈຸບັນ ແລະ ໃນນັ້ນຍັງມີ ໂຄງການພັດທະນາ Laos Logistics Link (LLL) ເຊິ່ງປະກອບມີ 5 ໂຄງການໃຫຍ່ຄື: 1.ໂຄງການທ່າບົກທ່ານາແລ້ງ ແລະ ເຂດໂລຈິດສະຕິກນະຄອນ ຫຼວງວຽງຈັນ 2. ທ່າເຮືອຫວຸ້ງອ່າງ ສສ ຫວຽດນາມ 3. ເສັ້ນທາງລົດໄຟລາວ-ຫວຽດນາມ 4. ໂຮງງານຜະລິດໄຟຟ້າດ້ວຍຖ່ານຫີນ 2.000 MV ທີ່ແຂວງຄຳມ່ວນ ແລະ 5. ເຂດໂລຈິດສະຕິກຢູ່ແຂວງຄຳມ່ວນ, ໂຄງການພັດທະນາ ທ່າບົກທ່ານາແລ້ງ ສ້າງຂຶ້ນເພື່ອຜັນຂະຫຍາຍນະໂຍບາຍຂອງລັດຖະບານແຫ່ງ ສປປ ລາວ ໃນການຫັນປ່ຽນ ສປປ ລາວ ໃຫ້ເປັນສູນກາງແຫ່ງການເຊື່ອມຈອດ ແລະ ເຊື່ອມໂຍງອະນຸພາກພື້ນ ແລະ ສາກົນ ເຊິ່ງຈຸດທີ່ຕັ້ງຍຸດທະສາດຈະເຮັດໜ້າທີ່ເປັນສູນກາງຂອງການຂະຫຍາຍການຄ້າລະຫວ່າງອາຊຽນ-ສປຈີນ-ເອີຮົບ ໂດຍນໍາໃຊ້ໂຄງການເສັ້ນທາງລົດໄຟ ລາວ-ຈີນ.
ໂຄງການທ່າບົກທ່າແລ້ງ ແລະ ເຂດໂລຈິດສະຕິກ ກໍແມ່ນໜຶ່ງໂຄງການທີ່ຕັ້ງຢູ່ເຂດທີ່ສໍາຄັນ ແລະ ເປັນແຫຼ່ງລົງທຶນທີ່ໜ້າສົນໃຈທີ່ສຸດແຫ່ງໜຶ່ງ ທີ່ອຳນວຍຄວາມສະດວກ ບໍ່ວ່າທາງດ້ານໂຄງຮ່າງພື້ນຖານດ້ານການຄົມມະນາຄົມ ທີ່ມີການເຊື່ອມຕໍ່ກັບທ່າບົກ ເສັ້ນທາງລົດໄຟ ລາວ-ໄທ ແລະ ລາວ-ຈີນ ທາງຫຼວງແຫ່ງຊາດ ສະໜາມບິນ ແລະ ສາມາດເຊື່ອມຕໍ່ກັບທ່າເຮືອຫວຸ້ງອ່າງ ສສ.ຫວຽດນາມ ໃນອານາຄົດ ແລະ ໂຄງການຍັງເປັນເຂດໂລຈິດສະຕິກຄົບວົງຈອນຂອງນະຄອນຫຼວງວຽງຈັນພຽງແຫ່ງດຽວທີ່ລວມເອົາ 5 ເຂດສຳຄັນໄວ້ໃນຈຸດດຽວກັນ. ແລະ ໂຄງການດັ່ງກ່າວມີຄວາມໝາຍຄວາມສຳຄັນຕໍ່ການພັດທະນາເສດຖະກິດ-ສັງຄົມ ຂອງ ສປປ ລາວ ຈະນຳເອົາຜົນປະໂຫຍດສູງມາໃຫ້ປະເທດລາວ.
