ໃນວັນທີ 13 ມິຖຸນາ 2024 – ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສາທາລະນະລັດ ຝຣັ່ງ ໄດ້ຮ່ວນກັນເປີດໂຄງການໃໝ່ ໃນມູນຄ່າ 13.6 ລ້ານເອີໂຣ ທີ່ກະຊວງແຜນການ ແລະ ການລົງທຶນ, ຊຶ່ງເປັນການສະໜັບສະໜູນຈາກລັດຖະບານຝຣັ່ງໂດຍຜ່ານ ອົງການຝຣັ່ງເພື່ອການພັດທະນາ (AFD) ປະຈໍາ ສປປ ລາວ. ໂຄງການດັ່ງກ່າວ ແນໃສ່ການປົກປ້ອງ ແລະ ເພີ່ມມູນຄ່າໃຫ້ແກ່ມໍລະດົກທາງດ້ານວັດທະນະທໍາ ພ້ອມທັງສະໜັບສະໜູນ ການປະຕິບັດພັນທະພາສີອາກອນ ຕິດພັນກັບສັນຍາສໍາປະທານໃນ ສປປ ລາວ. ໃນພິທີເປີດໂຄງການ ໄດ້ໃຫ້ກຽດເຂົ້າຮ່ວມໂດຍ ທ່ານ ນາງ ພອນວັນ ອຸທະວົງ, ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ນາງ ສິບເລັງ ຈຸອໍ, ເອກອັກຄະລັດຖະທູດແຫ່ງ ສາທາລະນະລັດຝຣັ່ງ ປະຈໍາ ສປປ ລາວ ແລະ ທ່ານ ຊອງປິແອ ມາກເຊອີ, ຜູ້ອໍານວຍການພາກພື້ນຮັບຜິດຊອບອາຊີຕາເວັນອອກສຽງໃຕ້ ຂອງອົງການຝຣັ່ງເພື່ອການພັດທະນາ ພ້ອມທັງຜູ້ຕາງໜ້າຈາກກະຊວງ, ຂະແໜງການ ແລະ ອົງການ ທີ່ກ່ຽວຂ້ອງ.
ໃນມູນຄ່າ 13.6 ລ້ານເອີໂຣ ປະກອບມີ: (1), ມູນຄ່າ 5 ລ້ານເອີໂຣ ແມ່ນສະໜັບສະໜູນ ການປົກປັກຮັກສາມໍລະດົກ ແລະ ສ້າງຄວາມເຂັ້ມແຂງໃຫ້ແກ່ການເພີ່ມຄວາມດຶດູດຂອງເຂດມໍລະດົກໂລກວັດພູຈໍາປາສັກ ແລະ ເມືອງເກົ່າຂອງແຂວງສະຫວັນນະເຂດ ເພື່ອສົ່ງເສີມການທ່ອງທ່ຽວ ແລະ ຍົກລະດັບຊີວິດການເປັນຢູ່ຂອງປະຊາຊົນ; (2), 8 ລ້ານເອີໂຣ ແມ່ນການສົມທົບທຶນຈາກສະຫະພາບເອີຣົບ ຊຶ່ງແນໃສ່ຍົກລະດັບຄຸນນະພາບຂອງການພັດທະນາຂະແໜງກາເຟ ແລະ ໃບຊາ ໂດຍຜ່ານການສົ່ງເສີມການມີສ່ວນຮ່ວມຂອງຊຸມຊົນ, ການສ້າງຄວາມທົນທານຕໍ່ການປ່ຽນແປງດິນຟ້າອາກາດ ແລະ ການພັດທະນາຕ່ອງໂສ້ສິນຄ້າ ໂດຍຄໍານຶງເຖິງການຊຸກຍູ້ຄວາມສະເໝີພາບທາງດ້ານບົດບາດຍິງຊາຍ ແລະ ສິດທິມະນຸດ; (3), 6 ແສນເອີໂຣ ແມ່ນສະໜັບສະໜູນ ການສ້າງຄວາມສາມາດດ້ານວິຊາການໂດຍ Expertise France ເພື່ອສະໜັບສະໜູນການປະຕິບັດພັນທະດ້ານພາສີອາກອນ ຕິດພັນກັບສັນຍາສໍາປະທານ ໃນ ສປປ ລາວ ໂດຍແນ່ໃສ່ການສ້າງເຄື່ອງມືວິເຄາະສັນຍາສໍາປະທານໃໝ່ ຈາກການລົງທຶນຂອງບໍລິສັດພາຍໃນ ແລະ ຕ່າງປະເທດ ໃນ ສປປ ລາວ ແລະ ກໍານົດກົນໄກການປະສານ ລະຫວ່າງພາກສ່ວນກ່ຽວຂ້ອງ ເພື່ອນໍາໄປສູ່ການນໍາໃຊ້ຊັບພະຍາກອນແບບຍືນຍົງ ແລະ ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ.
ພິທີເປີດໂຄງການໃນຄັ້ງນີ້ຈັດຂຶ້ນເນື່ອງໃນໂອກາດທີ່ ທ່ານ ຊອງປິແອ ມາກເຊອີ, ຜູ້ອໍານວຍການພາກພື້ນຮັບຜິດຊອບອາຊີຕາເວັນອອກສຽງໃຕ້ ຂອງອົງການຝຣັ່ງເພື່ອການພັດທະນາ ໄດ້ເດີນທາງມາຢ້ຽມຢາມ ສປປ ລາວ ໃນລະຫວ່າງວັນທີ 13-14 ມິຖຸນາ 2024 ເພື່ອພົບປະກັບ ບັນດາກະຊວງ ຂະແໜງການ ແລະ ພາກສ່ວນທີ່ກ່ຽວຂ້ອງ ຂອງການຮ່ວມມືລາວ-ຝຣັ່ງ ເພື່ອແລກປ່ຽນກ່ຽວກັບສິ່ງທ້າທາຍຂອງການຈັດຕັ້ງປະຕິບັດໂຄງການ ແລະ ກໍານົດຂົງເຂດ ແລະ ຂະແໜງບູລິມະສິດຂອງການພັດທະນາ ສປປ ລາວ.
