ໃນວັນທີ 09 ກັນຍາ 2022 ທີ່ຜ່ານມາ, ຄະນະກໍາມະການຮ່ວມມື ລາວ-ຫວຽດນາມ ຮ່ວມກັບສະຖານທູດ ສສ ຫວຽດນາມ ປະຈໍາລາວ ຈັດກິດຈະກໍາເຄື່ອນໄຫວແຂ່ງຂັນກິລາມິດຕະພາບຮ່ວມກັນຂຶ້ນ ຈຸດປະສົງເພື່ອຮັດແໜ້ນຄວາມສາມັກຄີ, ພົບປະແລກປ່ຽນກັນ ແນໃສ່ຊຸກຍູ້ຜັນຂະຫຍາຍບັນດາຂໍ້ຕົກລົງຂອງການນໍາຂັ້ນສູງສອງປະເທດ, ທັງເປັນການສ້າງຂະບວນການຢ່າງຟົດຟື້ນ ປະກອບສ່ວນເຂົ້າໃນການສະເຫຼີມສະຫຼອງປີສາມັກຄີ ມິດຕະພາບ ລາວ-ຫວຽດນາມ 2022 ກໍ່ຄື ວັນເຊັນສົນທີ່ສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18/7/1977 – 18/7/2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (05/9/1962 – 05/9/2022). ໂດຍການເຂົ້າຮ່ວມຂອງ ທ່ານ ຄໍາເຈນ ວົງໂພສີ, ລັດຖະມົນຕີກະຊວງແຜນການ ແລະ ການລົງທຶນ ປະທານຄະນະກໍາມະການຮ່ວມມື ລາວ-ຫວຽດນາມ; ທ່ານ ຫງວຽນ ບາ ຮຸ່ງ ເອກອັກຄະລັດຖະທູດ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ພ້ອມດ້ວຍບັນດາທ່ານ ຮອງລັດຖະມົນຕີ-ທຽບເທົ່າ, ບັນດາທ່ານຫົວໜ້າກົມ, ຫົວໜ້າຫ້ອງການ, ຮອງກົມ ແລະ ຜູ້ຕາງໜ້າຈາກກົມກອງທີ່ກ່ຽວຂ້ອງຂອງກະຊວງແຜນການ ແລະ ການລົງທຶນ, ພະນັກງານຈາກສະຖານ ທູດຫວຽດນາມ ແລະ ວິສາຫະກິດ ຈໍານວນໜຶ່ງເຂົ້າຮ່ວມ.
ໂອກາດດັ່ງກ່າວ, ທ່ານ ຄຳເຈນ ວົງໂພສີ ລັດຖະມົນຕີ ປະທານຄະນະກໍາມະການຮ່ວມມື ລາວ-ຫວຽດນາມ ແລະ ທ່ານເອກອັກຄະລັດຖະທູດຫວຽດນາມ ໄດ້ພ້ອມກັນຕີລາຄາສູງ ຕໍ່ການປະສານສົມທົບຂອງສອງພາສ່ວນໃນໄລຍະຜ່ານມາ ຊຶ່ງໄດ້ປະກອບສ່ວນເຮັດໃຫ້ການປະຕິບັດໜ້າທີ່ເປັນເສນາທິການໃຫ້ສອງພັກ-ສອງລັດ ມີປະສິທິຜົນສູງ ແລະ ຜົນສໍາເລັດຢ່າງຕັ້ງໜ້າ, ພ້ອມນັ້ນ ທັງສອງຝ່າຍໄດ້ໃຫ້ຄໍາໝັ້ນສັນຍາ ຈະສືບຕໍ່ປະສານສົມທົບກັນຢ່າງແໜ້ນແຟ້ນ ເພື່ອຊຸກຍູ້ວຽກງານການພົວພັນຮ່ວມມື ລາວ-ຫວຽດນາມ ໃຫ້ມີບາດກ້າວຂະຫຍາຍຕົວຍິງໆຂຶ້ນ ປະກອບສ່ວນເສີມຂະຫຍາຍສາຍພົວພັນມິດຕະພາບອັນຍິງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວແລະຫວຽດນາມໃຫ້ນັບມື້ແຕກດອກອອກຜົນ ແລະ ໝັ້ນຄົງຂະໜົງແກ່ນຕະຫຼອດກາລະນານ.