ທ່ານຮອງນາຍົກລັດຖະມົນຕີ, ລັດຖະມົນຕີ ກຜທ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊຸກຍູ້ການພັດທະນາ ເຂດເສດຖະກິດນິຄົມອຸດສາຫະກຳ ແລະ ການຄ້າ ວຽງຈັນໂນນທອງ (VITA PARK)

by | Aug 24, 2020 | ການເຄື່ອນໄຫວ | 0 comments

ທ່ານ  ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກຜທ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊຸກຍູ້ການພັດທະນາ ເຂດເສດຖະກິດນິຄົມອຸດສາຫະກຳ ແລະ ການຄ້າ ວຽງຈັນໂນນທອງ (VITA PARK) ໃນວັນທີ 22 ສິງຫາ 2020. ເຂດ VITA PARK ມີເນື້ອທີ່ 110 ເຮັກຕາ ແລະ ໄດ້ສ້າງຕັ້ງຂື້ນ ໃນປີ 2010 ພາຍໃຕ້ສັນຍາ ຮ່ວມມືພັດທະນາ ລະຫວ່າງລັດຖະບານແຫ່ງ ສປປ ລາວ (ຕາງໜ້າໂດຍກະຊວງອຸດສາຫະກຳ ແລະ ການຄ້າ) ແລະ ຜູ້ພັດທະນາ ຈາກ ໄຕ້ຫວັນ ສປ ຈີນ (ບໍລິສັດ ໝຳເວພັດທະນາ ຈຳກັດ). ມາຮອດປັດຈຸບັນ ໄດ້ອະນຸມັດການລົງທຶນໃຫ້ 67 ບໍລິສັັດ ເຊິ່ງມີທຶນຈົດທະບຽນ 72 ລ້ານກວ່າໂດລາສະຫະລັດ, ໃນນັ້ນ 32 ບໍລິສັດ ໄດ້ດໍາເນີນການຜະລິດ ແລະ ສົ່ງອອກສິນຄ້າຫຼາຍກວ່າ 206 ລ້ານ ໂດລາສະຫະລັດ. ນັກລົງທືນຕ່າງປະເທດມາຈາກ ສປ ຈີນ, ຍີ່ປຸ່ນ, ໄທ, ໄຕ້ຫວັນ, ຮົງກົງ ແລະ ເດັນມາກ. ສິນຄ້າສົ່ງອອກຕົ້ນຕໍແມ່ນ ເຄື່ອງນຸ່ງຫົ່ມ, ສິ້ນສ່ວນອຸປະກອນເອເລັກໂຕຼນິກ, ສາຍໄຟສຳລັບປະກອບນຳ້ອຸ່ນ, ສາຍໄຟແອເຢັນ, ທູບຈອດ, ເຄື່ອງມື ອຸປະກອນການຜະລິດເຕັກນິກ ແລະ ຜະລິດຕະພັນປຸງແຕ່ງອາຫານອຶ່ນໆ. ເຂດ VITA Park ໄດ້ ສ້າງວຽກເຮັດງານທຳໃຫ້ປະຊາຊົນອ້ອມຂ້າງ 3,500ກວ່າ ຄົນ (ໃນນັ້ນຕ່າງປະເທດ 85 ຄົນ)  ແລະ ຄາດວ່າໃນປີ 2021 ຈະສາມາດສ້າງວຽກເຮັດງານທໍາໃຫ້ປະຊາຊົນລາວໄດ້ 4,000-5,000 ຄົນ ແລະ ໄດ້ມອບພັນທະອາກອນ 2 ຕື້ກວ່າກີບ ໃຫ້ແກ່ ນະຄອນຫຼວງວຽງຈັນ (ປີ 2019) ແລະ ໄດ້ປະກອບສ່ວນໃນການປັບປຸງພື້ນຖານໂຄງລ່າງ ແລະ ສິ່ງອຳນວຍຄວາມສະດວກເຊັ່ນ ນໍ້າປະປາ ແລະ ໄຟຟ້າ. ໃນອະນາຄົດເຂດ VITA PARK ມີແຜນ ພັດທະນາໂຄງການ ໄລຍະທີ2 ໃນເນື້ອທີ່ 142 ຮຕ.

ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍຕໍ່ ເຂດເສດຖະກິດນິຄົມອຸດສາຫະກຳ ແລະ ການຄ້າວຽງຈັນໂນນທອງ ທີ່ໄດ້ປະກອບສ່ວນອັນສຳຄັນເຂົ້າໃນການສ້າງວຽກເຮັດງານທຳຂອງປະຊາຊົນ ທີ່ສຳຄັນເປັນເຂດ 1 ໃນບັນດາເຂດເສດຖະກິດທີ່ມີການພັດທະນາດີ ແລະ ສາມາດດຶງດູດການລົງທຶນຂອງຕ່າງປະເທດເຂົ້າມາເຂດດັ່ງກ່າວນັບມື້ນັບຫຼາຍຂຶ້ນ. ທ່ານຮອງນາຍົກ ໄດ້ເນັັ້ນໜັກໃຫ້ ເອົາໃຈໃສ່ການພັດທະນາທີ່ທັນສະໄໝແຕ່ໃຫ້ເປັນມິດກັບສິ່ງແວດລ້ອມ ໂດຍສະເພາະໃຫ້ເນັ້ນໃສ່ອຸດສາຫະກຳສີຂຽວ ຕາມທິດການພັດທະນາແບບຍືນຍົງ.