ທ່ານ ຄຳເຈນ ວົງໂພສີ ຕ້ອນຮັບເອກອັກຄະລັດຖະທູດ ຍີ່ປຸ່ນ ປະຈຳ ສປປ ລາວ ເຂົ້າຢ້ຽມຂໍ່ານັບ

by | Mar 7, 2022 | ການເຄື່ອນໄຫວ | 0 comments

ໃນວັນທີ 4 ມີນາ 2022, ທີ່ກະຊວງແຜນການ ແລະ ການລົງທຶນ, ທ່ານ ຄຳເຈນ ວົງໂພສີ ກຳມະການສູນກາງພັກ, ລັດຖະມົນຕີ ກະຊວງແຜນການ ແລະ ການລົງທຶນ,ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂຄບາຢາຊິ ເຄນອິຈິ ເອກອັກຄະລັດຖະທູດວິຊາມັນຜູ້ມີອຳນາດເຕັມ ແຫ່ງ ປະເທດຍີ່ປຸ່ນ ປະຈຳ ສປປ ລາວ ເນື່ອງໃນໂອກາດ ທີ່ມາດຳລົງຕຳແໜ່ງ ເປັນເອກອັກຄະລັດຖະທູດ ຍີ່ປຸ່ນ ປະຈຳ ສປປ ລາວ ຄົນໃໝ່.

ໃນໂອກາດນີ້, ທ່ານ ຄຳເຈນ ວົງໂພສີ ໄດ້ສະແດງຄວາມຍີນດີຕ້ອນຮັບ ແລະ ຊົມເຊີຍ ພ້ອມທັງຕີລາຄາສູງຕໍ່ທ່ານ ໂຄບາຢາຊິ ເຄນອິຈິ ທີ່ໄດ້ປະຕິບັດໜ້າທີ່ການທູດ ຢູ່ ສປປ ລາວ ເຊີ່ງເປັນການປະກອບສ່ວນອັນສຳຄັນ ເຂົ້າໃນການຮ່ວມມື ລະຫວ່າງ ສອງປະເທດໃຫ້ມີຄວາມແໜ້ນແຟ້ນຍິ່ງຂື້ນ, ພ້ອມນີ້, ໄດ້ສະແດງຄວາມຂອບໃຈ ຕໍ່ການຮ່ວມມືຊ່ວຍເຫຼືອໃນໄລຍະຜ່ານມາ ໂດຍສະເພາະ ແມ່ນການຊ່ວຍເຫຼືອ ທາງດ້ານການຝຶກອົບຮົມຕ່າງໆ ເພື່ອພັດທະນາດ້ານຊັບພະຍາກອນມະນຸດ ຢູ່      ສປປ ລາວ.

ໂອກາດນີ້, ທ່ານ ໂຄບາຢາຊິ ເຄນອິຈິ ກໍໄດ້ສະແດງຄວາມຂອບໃຈຕໍ່ທ່ານ ລັດຖະມົນຕີ ກະຊວງແຜນການ ແລະ ການລົງທຶນ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້ ແລະ ຈະສືບຕໍ່ຊຸກຍູ້ການຮ່ວມມືໃນຕໍ່ໜ້າ ໂດຍສະເພາະວຽກງານແຜນການ ແລະ ການລົງທຶນ, ໃຫ້ໄດ້ຮັບການເສີມຂະຫຍາຍຍິ່ງຂື້ນເລື້ອຍໆ.