ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະ ການລົງທຶນໃຫ້ສຳພາດເນື່່ອງໃນໂອກາດ ສະເຫຼີມສະຫຼອງ 2 ວັນປະຫວັດສາດ ລາວ-ຫວຽດນາມ (ວັນເຊັນສັນຍາມິດຕະພາບ ແລະ ການຮ່ວມມື ຄົບຮອບ 45ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ)

by | May 17, 2022 | ການເຄື່ອນໄຫວ, ຂ່າວເດັ່ນ | 0 comments

ໃນວັນທີ 13 ພຶດສະພາ 2022, ທີ່ກະຊວງແຜນການ ແລະ ການລົງທຶນ, ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ໄດ້ໃຫ້ສຳພາດເນື່ອງໃນໂອກາດສະເຫຼີມສະຫຼອງ 2 ວັນປະຫວັດສາດ ລາວ-ຫວຽດນາມ ສປປ ລາວ ແລະ ສສ ຫວຽດນາມເປັນສອງປະເທດເພື່ອນມິດຍຸດທະສາດ; ເປັນສອງປະເທດທີ່ມີສາຍພູຫຼວງ ເປັນເສັ້ນຊາຍແດນຕິດຈອດກັນ ຍາວຢຽດເຖິງ 2.067 ກິໂລແມັດ ຊຶ່ງມີຄວາມຜູກພັນອຸ້ມຊູຊ່ວຍເຫຼືອ ເຊີ່ງກັນ ແລະ ກັນຢ່າງສະໜິດແໜ້ນມາເປັນເວລາອັນຍາວນານ ແລະ ຮ່ວມມືຮອບດ້ານ ລະຫວ່າງສອງພັກ,ສອງລັດ ແລະ ປະຊາຊົນສອງຊາດລາວ ແລະ ຫວຽດນາມ ແມ່ນບໍ່ມີຍັງປ່ຽນແປງ ແລະ ສຳລັບໝາກຜົນຂອງການຮ່ວມມືຂອງສອງປະເທດໃຫ້ຮູ້ວ່າ ໃນປີ 2021 ທີ່ຜ່ານມາ ລາວ-ຫວຽດນາມໄດ້ຮ່ວມມືກັນ ໃນຫຼາຍວຽກງານ ໂດຍລັດຖະບານ ໄດ້ອະນຸຍາດການລົງທຶນໃຫ້ແກ່ວິສາຫະກິດຫວຽດນາມ 3 ໂຄງການ, ໃນນີ້ມີຂະແໜງບໍ່ແຮ່ 2 ໂຄງການ ແລະ ທະນາຄານ 1 ໂຄງການ. ພ້ອມນັ້ນ, ຍັງໄດ້ສືບຕໍ່ຮ່ວມກັນແກ້ໄຂຂໍ້ຫຍຸ້ງຍາກໃນການພັດທະນາໂຄງການຂະໜາດໃຫຍ່ຈຳນວນໜຶ່ງ ຂອງນັກລົງທຶນ ສອງຝ່າຍ ໃນຂົງເຂດພະລັງງານ, ແຮ່ທາດຕ່າງໆ, ໂຄງການສ້າງໂຄງລ່າງພື້ນຖານຕ່າງໆ, ການຜະລິດກະສິກຳ-ປ່າໄມ້ ເພື່ອສາມາດດຳເນີນຖືກຕ້ອງຕາມສັນຍາ ທີ່ໄດ້ເຊັນຮ່ວມກັນ. ສ່ວນດ້ານການຄ້າ, ໃນປີ 2021 ຜ່ານມາ ມູນຄ່າການຄ້າຂອງສອງປະເທດ ບັນລຸໄດ້ 1,37 ຕື້ໂດລາ, ເພີ່ມຂຶ້ນ 33,3% ເມື່ອທຽບໃສ່ປີ 2020 ແລະ ໃນປີ 2022 ສອງຝ່າຍ ຈະສູ້ຊົນຊຸກຍູ້ມູນຄ່າການຄ້າໃຫ້ເພີ່ມຂຶ້ນ 10-15% ຕາມທີ່ສອງຝ່າຍໄດ້ຕົກລົງກັນໃນໄລຍະ 2021-2025 ໂດຍສ້າງເງື່ອນໄຂຄວາມສະດວກໃຫ້ນັກທຸລະກິດ ແລະ ປະຊາຊົນ ຢູ່ເຂດຊາຍແດນຂອງສອງປະເທດ ໃຫ້ມີການແລກປ່ຽນການຄ້າ ໃຫ້ຫລາຍຂຶ້ນກວ່າເກົ່າ; ດ້ານຄົມມະນາຄົມ-ຂົນສົ່ງ ສອງຝ່າຍ ໄດ້ປະສານສົມທົບ, ສຶກສາຄົ້ນຄວ້າ ແລະ ຊຸກຍູ້ ຊອກຫາແຫລງທຶນເພື່ອຜັນຂະຫຍາຍ ບັນດາໂຄງການທີ່ສຳຄັນ ເຊັ່ນ: ໂຄງການກໍ່ສ້າງເສັ້ນທາງດ່ວນ ວຽງຈັນ-ຮ່າໂນ້ຍ ສອງຝ່າຍເຫັນດີ ເປັນເອກະພາບ ຈະນໍາໃຊ້ທຶນຊ່ວຍເຫລືອຂອງຍີປຸ່ນ 200 ລ້ານໂດລາສະຫະ ລັດ ເພື່ອຍົກລະດັບເສັ້ນທາງເລກ 8 ເບື້ອງລາວ, ຝ່າຍຫວຽດນາມ ເຫັນດີດ້ານຫລັກ ການ ພິຈາລະນາຕັດເສັ້ນທາງໄປຫາທ່າເຮືອຫວຸງອາງ ເປັນຈຸດສຸດທ້າຍ. ສ່ວນໂຄງ ການເສັ້ນທາງດ່ວນ ວຽງຈັນ-ຮ່າໂນ້ຍ ແມ່ນສືບຕໍ່ສະຫງວນໄວ້ ເພື່ອຊອກຫາແຫລ່ງທຶນອື່ນມາຈັດຕັ້ງປະຕິບັດ; ດ້ານອຸດສະຫະກຳ, ພະລັງງານ-ບໍ່ແຮ່ ສອງຝ່າຍລາວ-ຫວຽດ ນາມ ສືບຕໍ່ຈັດຕັ້ງປະຕິບັດສັນຍາ ວ່າດ້ວຍການຮ່ວມມືພັດທະນາ ໂຄງການພະລັງງານໄຟຟ້າ ແລະ ບໍ່ແຮ່ ທີ່ໄດ້ລົງນາມວັນທີ 24 ກຸມພາ 2019 ຜ່ານມາ ຢ່າງມີປະສິດທິຜົນ, ມາຮອດປັດຈຸບັນ ຝ່າຍລາວ ໄດ້ເຊັນສັນຍາຊື້-ຂາຍໄຟຟ້າ (PPA) ກັບ ລັດວິສາຫະກິດໄຟຟ້າຫວຽດນາມ (EVN) ທັງໝົດມີ 18 ສັນຍາ (25 ໂຄງການ) ລວມກໍາລັງຕິດຕັ້ງ 2.180 MW, ໃນນັ້ນ, ໂຄງການທີ່ໄດ້ຂາຍໄຟໄປຍັງຫວຽດນາມ ມີກໍາລັງຕິດຕັ້ງ 572 MW ຄື: ເຊຂະໝານ 1, ເຊຂະໝານຊານໄຊ, ປັດຈຸບັນ ພວມສ້ອມ ແປງ ໂຄງການເຊຂະໝານ 3 ຄາດວ່າຈະສໍາເລັດ ແລະ ສາມາດດໍາເນີນການຜະລິດກະແສໄຟຟ້າ ໃນໄຕມາດທີ II ປີນີ້.

ທ່ານ ຄຳເຈນ ວົງໂພສີ ຍັງໃຫ້ຮູ້ອີກວ່າ: ໃນປີ 2022 ນີ້, ສອງຝ່າຍ ຈະສືບ ຕໍ່ຊຸກຍູ້ໃຫ້ວິສາຫະກິດ ຂອງສອງປະເທດ ລາວ-ຫວຽດນາມ ຮ່ວມກັນພັດທະນາບັນດາໂຄງການໄຟຟ້າ ຢູ່ລາວ, ເພີ່ມທະວີການເຊື່ອມໂຍງລະບົບໄຟຟ້າ ແລະ ການຊື້ຂາຍໄຟຟ້າສອງຝ່າຍ. ພ້ອມກັນນັ້ນ, ສອງຝ່າຍ ຍັງໄດ້ເປັນເອກະພາບກັນໃນການຕີລາຄາ ແລະ ວິໄຈ ກາລະໂອກາດການລົງທຶນຢູ່ລາວ ໃຫ້ແກ່ບັນດາວິສາຫະກິດຫວຽດນາມ ຮອດປີ 2025, ກໍານົດທິດທາງຮອດປີ 2030, ເພີ່ມທະວີຊຸກຍູ້ໃຫ້ບຸລິມະສິດການລົງທຶນ ຂອງວິສາຫະກິດຫວຽດນາມ ທີ່ມີຄວາມສາມາດດ້ານການເງິນ, ດ້ານວິຊາການ, ເຂົ້າໃນຂົງເຂດກະສິກຳສະອາດ, ອຸດ ສາຫະກຳປຸງແຕ່ງການຜະລິດ, ຂົງເຂດທີ່ມີທ່າແຮງບົ່ມຊ້ອນລຽບຕາມຊາຍແດນ ລາວ-ຫວຽດນາມ.