ໃນຕອນເຊົ້າຂອງວັນທີ 13 ຕຸລາ 2020 ໄດ້ມີພິທີມອບ-ຮັບຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ.ນວ) ລະຫວ່າງ ຜຸ້ເກົ່າ ແລະ ຜູ້ໃໝ່ (ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ) ໂດຍການເຂົ້າຮ່ວມເປັນປະທານ ແລະ ສັກຂີພະຍານຂອງ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ອາດສະພັງທອງ ສີພັນດອນ ຮອງເຈົ້າຄອນນະຄອນຫຼວງວຽງຈັນ ພ້ອມທັງມີບັນດາທ່ານຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ ຈາກກະຊວງແຜນການ ແລະ ການລົງທຶນ, ຄະນະຈັດຕັ້ງ, ຫົວໜ້າພະແນກ, ຮອງຫົວໜ້າພະແນກ, ບັນດາທ່ານເຈົ້າເມືອງ, ຮອງເຈົ້າເມືອງ ຈາກນະຄອນຫຼວງວຽງຈັນ ເຂົ້າຮ່ວມ.
ທ່ານ ນາງ ທໍາມາ ເພັດວິໄຊ, ຫົວໜ້າກົມຈັດຕັ້ງພະນັກງານ, ກະຊວງແຜນກາ
ໃນໂອກາດນີ້ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວວ່າ ວຽກງານການພັດທະນາເຂດເສດຖະກິດພິເສດ ເປັນວຽກງານໜຶ່ງທີ່ໄດ້ຮັບການເອົາໃຈໃສ່ ແລະ ຊີ້ນໍາຢ່າງໃກ້ສິດຈາກພັກ ແລະ ລັດຖະບານ ເວົ້າລວມ, ເວົ້າສະເພາະ ກໍ່ຄືຄະນະນໍາກະຊວງແຜນການ ແລະ ການລົງທຶນ ແລະ ອົງການປົກຄອງນະຄອນຫຼວງວຽງຈັນ ເພື່ອເຮັດໃຫ້ວຽກງານພັດທະນາ ຂສພ ໄດ້ຮັບການປັບປຸງເຂົ້າສູ່ລະບົບດີຂຶ້ນເລື້ອຍໆ ແລະ ສາມາດປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນພັດທະນາເສດຖະກິດ-ສັງຄົມ ແຕ່ລະໄລຍະ ໂດຍສະເພາະແມ່ນການພັດທະນາພື້ນຖານໂຄງລ່າງ, ການດຶງດູດການລົງທຶນຂອງພາກເອກະຊົນພາຍໃນ ແລະ ຕ່າງປະເທດ, ການສ້າງວຽກເຮັດງານທຳ, ການຖ່າຍທອດເຕັກໂນໂລຊີ, ການປະຕິບັດພັນທະເຂົ້າງົບປະມານຂອງລັດ ແລະ ອື່ນໆ
