ທ່ານ ນາງ ຄໍາຈັນ ວົງແສນບູນ ເປັນປະທານພິທີເປີດຊຸດຝຶກອົບຮົມ ທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ XVI

by | Dec 28, 2020 | ການເຄື່ອນໄຫວ | 0 comments

ໃນວັນທີ 21 ທັນວາ 2020 ທີ່ກະຊວງແຜນການ ແລະ ການລົງທຶນ ໄດ້ຈັດພິທີເປີດຊຸດຝຶກອົບຮົມ ທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ XVI ປະຈໍາປີ 2020 ໂດຍການເປັນປະທານຂອງ ທ່ານ ນາງ ຄໍາຈັນ ວົງແສນບູນ, ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ ເຊິ່ງມີຜູ້ເຂົ້າຮ່ວມທັງໝົດຈໍານວນ 43 ທ່ານ, ຍິງ 13 ທ່ານ.

ໃນພິທີດັ່ງກ່າວ, ທ່ານ ນາງ ຄຳຈັນ ວົງແສນບູນ, ໄດ້ໃຫ້ຄຳໂອ້ລົມ ແລະ ທິດຊີ້ນຳ ພ້ອມທັງເໜັ້ນໜັກບາງດ້ານ ໂດຍໄດ້ຍົກໃຫ້ເຫັນເຖິງຄວາມສຳຄັນຂອງການຝຶກອົບຮົມຄັ້ງນີ້ ເຊິ່ງກໍແມ່ນການຜັນຂະຫຍາຍເນື້ອໃນກອງປະຊຸມຄະນະປະຈຳພັກ ກະຊວງແຜນການ ແລະ ການລົງທຶນ ແລະ ແຜນບຳລຸງ-ກໍ່ສ້າງສະມາຊິກພັກ, ພະນັກງານຫຼັກແຫຼ່ງ ຂອງຂະແໜງແຜນການ ແລະ ການລົງທຶນ ກໍຄື ເພື່ອເຮັດໃຫ້ການປະຕິບັດວຽກງານພາຍໃນຂອງ ກະຊວງແຜນການ ແລະ ການລົງທຶນ ໃຫ້ມີປະສິດທິຜົນສູງຂຶ້ນກວ່າເກົ່າ, ພ້ອມດຽວກັນນີ້, ກໍເພື່ອສ້າງໃຫ້ບັນດາສະມາຊິກພັກ, ພະນັກງານຫຼັກແຫຼ່ງ ມີທັດສະນະຫຼັກໝັ້ນຊົນຊັ້ນໜັກແໜ້ນ, ມີຄຸນສົມບັດ ສິນທຳປະຕິວັດ ແລະມີແນວຄິດອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ, ມີແບບແຜນດຳລົງຊີວິດປອດໃສ ແລະ ມີວິທີການເຮັດວຽກທີ່ຖືກຕ້ອງ, ນອກຈາກນັ້ນ, ກໍເພື່ອປະຕິບັດ ແຜນພັດທະນາຊັບພະຍາກອນມະນຸດ ຂອງ ກະຊວງກະຊວງແຜນການ ແລະ ການລົງທຶນ ໃຫ້ບັນລຸຕາມຄາດໝາຍທີ່ວາງໄວ້.

ນອກຈາກນັ້ນ, ຍັງໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບຊຸດຝຶກອົບຮົມຄັ້ງນີ້ ກໍຄື ກົມຈັດຕັ້ງ ແລະພະນັກງານ ແລະ ສູນຝຶກອົບຮົມພະນັກງານເສດຖະກິດແຜນການ ພ້ອມດ້ວຍຄູອາຈານທີ່ມາຈາກ ສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ເອົາໃຈໃສ່ໃນການກະກຽມຈັດຊຸດຝຶກອົບຮົມນີ້ຂຶ້ນ ເພື່ອເຮັດໃຫ້ສະມາຊິກພັກ, ພະນັກງານຫຼັກແຫຼ່ງ ສາມາດກຳໄດ້ພື້ນຖານທາງດ້ານທິດສະດີ, ຮູ້ໝູນໃຊ້ທິດສະດີເຂົ້າໃນການຈັດຕັ້ງປະຕິບັດ ແລະ ຜັນຂະຫຍາຍວຽກງານຂອງຕົນ ຢູ່ພາຍໃນກະຊວງແຜນການ ແລະ ການລົງທຶນ.