ກອງປະຊຸມທາບທາມ ເນື້ອໃນເອກະສານທີ່ສຳຄັນຂອງກອງປະຊຸມໃຫຍ່ຄັ້ງທີ XI ຂອງພັກ ໄດ້ຈັດຂຶ້ນໃນລະຫວ່າງວັນທີ 23-24 ພະຈິກ 2020 ທີ່ສະໂມສອນແຂວງຈຳປາສັກ ພາຍໃຕ້ການເປັນປະທານຂອງ ສະຫາຍ ຈັນສີ ໂພສີຄຳ, ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໂດຍມີບັນດາສະຫາຍທີ່ຢູ່ໃນອະນຸກຳມະການເນື້ອໃນ; ອະນຸກຳມະການກົດລະບຽບ-ບຸກຄະລາກອນຂອງກອງປະຊຸມໃຫຍ່ຄັ້ງທີ XI ຂອງພັກ ແລະ ບັນດາສະຫາຍເລຂາພັກແຂວງ, ຮອງເລຂາພັກແຂວງ, ຄະນະພັກແຂວງ, ເລຂາພັກເມືອງ-ເຈົ້າເມືອງ, ຫົວໜ້າພະແນກການ ຈາກ 5 ແຂວງພາກໃຕ້ເຂົ້າຮ່ວມຄື: ແຂວງ ຄໍາມ່ວນ, ແຂວງ ສະຫວັນນະເຂດ, ແຂວງ ຈຳປາສັກ, ແຂວງ ເຊກອງ ແລະ ແຂວງ ອັດຕະປື ຊຶ່ງມີຜູ້ເຂົ້າຮ່ວມ ທັງໝົດ 197 ສະຫາຍ, ຍິງ 19 ສະຫາຍ.
ເອກະສານທີ່ນຳມາທາບທາມໃນຄັ້ງນີ້ມີ: ຮ່າງລາຍງານການເມືອງຕໍ່ກອງປະຊຸມໃຫຍ່ຄັ້ງທີ XI ຂອງພັກ; ຮ່າງແຜນພັດທະນາເສດກະກິດ-ສັງຄົມແຫ່ງຊາດ 5ປີ ຄັ້ງທີ IX ແລະ ຮ່າງກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ຂອງພັກ ສະບັບປັບປຸງ; ຈຸດປະສົງການທາບທາມຄວາມເຫັນໃນຄັ້ງນີ້, ດ້ານໜຶ່ງ ແມ່ນເຜີຍແຜ່, ເຊື່ອມຊຶມ ແລະ ສ້າງຄວາມເປັນເອກະພາບ ກັນທາງດ້ານທັດສະນະ, ທິດຊີ້ນໍາ, ບັນດານະໂຍບາຍໃຫຍ່ ທີ່ຈະກໍານົດອອກໃນແນວທາງການເມືອງ ແລະ ແນວທາງການຈັດຕັ້ງຂອງພັກເຮົາ ໃນຊຸມປີຕໍ່ໜ້າ ເຊິ່ງເປັນຈິດໃຈກວມລວມ ທີ່ມີລັກສະນະສ້າງການຫັນປ່ຽນ ທີ່ແຂງແຮງ, ເລິກເຊິ່ງ ແລະ ຮອບດ້ານ ເພື່ອນໍາພາຊີ້ນໍາແກ້ໄຂບັນຫາຕ່າງໆໃຫ້ມີປະສິດທິພາບ ແລະ ປະສິດທິຜົນ; ສ່ວນອີກດ້ານໜຶ່ງ ແມ່ນເພື່ອຮັບຟັງຄໍາຄິດຄໍາເຫັນຂອງບັນດາສະຫາຍຄະນະພັກ, ພະນັກງານຫຼັກແຫຼ່ງທີ່ມາຈາກ 5 ແຂວງພາກໃຕ້ ເພື່ອເປັນພື້ນຖານສໍາຄັນ ໃຫ້ແກ່ການສືບຕໍ່ປັບປຸງຮ່າງເອກະສານດັ່ງກ່າວ ໃຫ້ມີເນື້ອໃນ ເລິກເຊິ່ງ, ຄົບຖ້ວນ, ແທດຕົວຈິງ ແລະ ມີຄວາມອາດສາມາດຈັດຕັ້ງປະຕິບັດ ໃຫ້ເປັນຈິງ; ທັງເປັນການສ້າງຄວາມເຂົ້າໃຈລົງເລິກແຕ່ຫົວທີໃຫ້ບັນດາສະຫາຍຄະນະພັກ, ຄະນະປະຈຳທີ່ເປັນການນຳຫຼັກແຫຼງຂອງແຂວງຕໍ່ຮ່າງເອກະສານຕົ້ນຕໍຂອງກອງປະຊຸມໃຫຍ່ຄັ້ງທີ XI ຂອງພັກ.
ໂອກາດນີ້, ສະຫາຍ ຈັນສີ ໂພສີຄຳ ໄດ້ສະແດງຄວາມຍ້ອງຍໍຊົມເຊີຍຕໍ່ຜູ້ເຂົ້າຮ່ວມກອງປະຊຸມທີ່ໄດ້ມີການປະກອບຄວາມຄິດຄວາມເຫັນຢ່າງກົງໄປກົງມາ ແລະ ທັງສ່ອງແສງໃຫ້ເຫັນແຈ້ງບາງບັນຫາທີ່ເປັນການກົດໜ່ວງທ່ວງດຶງ ໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດໃນໄລຍະຜ່ານມາ, ທັງໄດ້ພ້ອມກັນຊອກຫາແນວທາງ, ວິທີການແກ້ໄຂ ແລະ ບັນດາມາດຕະການ ໃນການຈັດຕັ້ງປະຕິບັດ ບັນດານິຕິກຳຕ່າງໆທີ່ພັກ-ລັດໄດ້ວາງອອກ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.
