ທ່ານ ສອນໄຊ ສີພັນດອນ, ຕ້ອນຮັບການເຂົ້າຢ້ຽມຂໍ່ານັບຂອງບັນດາທ່ານເອກອັກຄະລັດຖະທູດວິສາມັນ ຂອງ ສປປ ລາວ ທີມີແຜນໄປປະຈຳຢູ່ຕ່າງປະເທດ

by | Jan 25, 2022 | ການເຄື່ອນໄຫວ | 0 comments

ໃນວັນທີ 17 ມັງກອນ 2022, ເວລາ 11:00 ໂມງ, ທີ່ກະຊວງແຜນການ ແລະ ການລົງທຶນ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ໄດ້ຕ້ອນຮັບບັນດາທ່ານເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ຈະໄປຮັບສານ   ຕາຕັ້ງ ແລະ ກຽມໄປປະຈຳຢູ່ຕ່າງປະເທດໃນຄັ້ງນີ້ປະກອບມີ: ທ່ານ ຄຳອິນ ຄິດຈະເດດ ເອກອັກຄະລັດຖະທູດລາວ ປະຈຳປະເທດຝຣັ່ງ, ທ່ານ ຄອນເພັງ ທຳມະວົງ ເອກອັກຄະລັດຖະທູດ ເອກອັກຄະລັດຖະທູດລາວ ປະຈຳປະເທດໂອຕຣິດ, ທ່ານ ບົວແກ້ວ ພູມວົງໄຊ ເອກອັກຄະລັດຖະທູດລາວ ປະຈຳຣາຊະອານາຈັກກຳປູເຈຍ ແລະ ທ່ານ ສິນໃຈ ມະນີວັນ ເອກອັກຄະລັດຖະທູດລາວ ປະຈຳປະເທດອົດສະຕຣາລີ.

ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕໍ່ບັນດາທ່ານທູດລາວທີຈະໄປປະຕິບັດໜ້າທີເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳຢູ່ຕ່າງປະເທດໃນຄັ້ງນີ້, ເຊື່ອໝັ້ນວ່າທ່ານທູດທີ່ຖືກມອບໝາຍຈາກ ພັກ-ລັດ ໄປປະຕິບັດໜ້າທີ່ສຳຄັນໃນຄັ້ງນີ້, ໃນການເຮັດໜ້າທີ່ການເມືອງຂອງພັກຂອງປະເທດຊາດ ແລະ ນຳເອົາບົດຮຽນ ບວກກັບປະສົບການຂອງຕົນ ເຂົ້າໃນການເສີມຂະຫຍາຍການພົວພັນຮ່ວມມືກັບຕ່າງປະເທດໃຫ້ເກີດຜົນປະໂຫຍກສູງສຸດ.

ໂອກາດນີ້, ບັນດາທ່ານ ທູດ ໄດ້ສະແດງຄວາມຂອບໃຈຕໍ່ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ທິດຊີ້ນຳ ແລະ ຈະໄດ້ນຳເອົາໄປຈັດຕັ້ງປະຕິບັດໜ້າໃນຄັ້ງນີ້ໃຫ້ດີທີ່ສຸດ.