ທ່ານ ສອນໄຊ ສີພັນດອນ ເຄື່ອນໄຫວຢ້ຽມຢາມ ເຮັດວຽກຢູ່ແຂວງຫລວງພະບາງ

by | Aug 11, 2021 | ການເຄື່ອນໄຫວ | 0 comments

ໃນວັນທີ 03 ສິງຫາ 2021, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫລວງພະບາງ ເພື່ອຊຸກຍູ້, ກວດກາ ແລະ ຕິດຕາມການຈັດຕັ້ງປະຕິບັດວຽກງານຈຸດສຸມຈຳນວນໜື່ງ. ທ່ານ ຄຳຂັນ ຈັນທະວີສຸກ ເຈົ້າແຂວງ ແຂວງຫລວງພະບາງ ໄດ້ລາຍງານສະພາບການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 6 ເດືອນຜ່ານມາ, ວຽກກງານປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19, ສະພາບການແກ້ໄຂຂໍ້ຂັດແຍ່ງຢູ່ໂຄງການ ຂຸດຄົ້ນ-ປຸງແຕ່ງແຮ່ຄຳ ຢູ່ບ້ານຜາປົ່ນ ເມືອງປາກອູ, ໂຄງການກໍ່ສ້າງເສັ້ນທາງລົດໄຟ ລາວ-ຈີນ ແລະ ວຽກງານສຳຄັນອື່ນ ການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງແຂວງ ເປັນຕົ້ນແມ່ນ ຂົງເຂດດ້ານການບໍລິການ ແລະ ທ່ອງທ່ຽວ, ການລົງທຶນ ແລະ ອື່ນໆ, ເຊິ່ງການຂະຫຍາຍຕົວທາງດ້ານເສດຖະກິດຂອງແຂວງຫລວງພະບາງ ປີ 2021 ຄາດວ່າຈະຂະຫຍາຍໃນລະ ດັບ 4,1% (ແຜນການ 4,5%).

ທ່ານ ສອນໄຊ ສີພັນດອນ ໂດຍຕາງໜ້າໃຫ້ຄະນະພັກ, ຄະນະນຳ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານ, ຜົນສຳເລັດ ທີ່ຄະນະນຳ ແລະ ທຸກຂະແໜງການຂອງແຂວງຫລວງຫລວງພະບາງ ຍາດມາໄດ້ຕະຫລອດໄລຍະ 6 ເດືອນຜ່ານມາ ໃນທ່າມກາງທີ່ມີສະພາບຄວາມຫຍຸ້ງຍາກເປັນຕົ້ນແມ່ນ ການແຜ່ລະບາດຂອງພະຍາດໂຄວິດ-19. ພ້ອມກັນນັ້ນ, ໄດ້ໃຫ້ກຽດໂອ້ລົມ ເພື່ອເປັນເຂັມຊີ້ທິດເຍືອງທາງ ໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງ ແນໃສ່ເພື່ອເສີມຂະຫຍາຍຈຸດດີ ແລະ ແກ້ໄຂບັນດາຂໍ້ຄົງຄ້າງ ເພື່ອຮັບປະກັນເຮັດໃຫ້ການພັດທະນາໃນຕໍ່ໜ້າ ບັນລຸຕາມຈຸດປະສົງລະດັບຄາດ ໝາຍທີ່ວາງໄວ້ ເພື່ອນຳເອົາຜົນປະໂຫຍດສູງສຸດ ມາສູ່ປະເທດຊາດ ກໍຄືປະຊາຊົນພາຍໃນແຂວງຫລວງພະບາງ ໃຫ້ນັບມື້ມີຊີວິດການເປັນຢູ່ດີຂຶ້ນຢ່າງຕໍ່ເນື່ອງ. ໂອກາດດຽວກັນ, ທ່ານຮອງນາຍົກລັດຖະມົນຕີ ກໍໄດ້ມອບເງິນຈຳນວນ 280 ລ້ານກີບ ໃຫ້ແຂວງຫລວງພະບາງ ເຊິ່ງໃຫ້ກຽດຕາງໜ້າຮັບໂດຍ ທ່ານ ຄຳຂັນ ຈັນທະວີສຸກ ເຈົ້າແຂວງ ແຂວງຫລວງພະບາງ ເພື່ອເປັນທຶນປະກອບສ່ວນນຳໃຊ້ ເຂົ້າໃນການຈັດຕັ້ງປະຕິບັດວຽກງານພາຍໃນແຂວງ.