ທ່ານ ສອນໄຊ ສີພັນດອນ ເປັນປະທານກອງປະຊຸມປະຈໍາປີຂອງຄະນະກຳມະການຄຸ້ມຄອງອິນເຕີເນັດແຫ່ງຊາດ

ໃນຕອນເຊົ້າວັນທີ 22 ທັນວາ 2020 ທີ່ ກະຊວງແຜນການ ແລະ ການລົງທຶນ ໄດ້ຈັດກອງປະຊຸມປະຈໍາປີຂອງຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ເພື່ອສະຫຼຸບການຈັດຕັ້ງປະຕິບັດວຍກງານ ປະຈໍາປີ 2020 ແລະ ວາງທິດທາງແຜນການ ປະຈໍາປີ 2021 ໂດຍການເປັນປະທານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ປະທານ ຄະນະກຳມະການຄຸ້ມຄອງອິນເຕີເນັດແຫ່ງຊາດ. ໂດຍມີບັນດາທ່ານລັດຖະມົນຕີີ, ຮອງລັດຖະມົນຕີ, ທຸກພາກສ່ວນໃນຄະນະກຳມະການຄຸ້ມຄອງອິນເຕີເນັດແຫ່ງຊາດ, ພ້ອມທັງໄດ້ມີການເຂົ້າຮ່ວມຜ່ານລະບົບກອງປະຊຸມທາງໄກຂອງບັນດາຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງ ພ້ອມດ້ວຍພາກສ່ວນກ່ຽວຂ້ອງຈາກບັນດາກະຊວງ, ອົງການ, ແຂວງ, ນະຄອນຫຼວງ ເຊິ່ງເປັນຄັ້ງທໍາອິດທີ່ມີການເປີດກວ້າງທົ່ວປະເທດ ແລະ ມີຜູ້ເຂົ້າຮ່ວມທັງໝົດຫຼາຍກວ່າ 200 ທ່ານ.

ກອງປະຊຸມໄດ້ຮັບຟັງການສະຫຼຸບການຈັດຕັັ້ງປະຕິບັດວຽກງານການປະຈໍາ 2020 ແລະ ທິດທາງແຜນການປະຈໍາ ປີ 2021 ໃນນັ້ນສິ່ງທີ່ພົ້ນເດັ່ນແມ່ນ ໃນທົ່ວໂລກໄດ້ປະເຊີນໜ້າກັບໂລກລະບາດ ໂຄວິດ 19 ແລະ ພາຍໃນ ສປປ ລາວ ເອງກໍ່ໄດ້ຖືກຜົນກະທົບເຊັ່ນດຽວກັນ ເຮັດໃຫ້ເກີດມີການພົວພັນຂອງຄົນໃນສັງຄົມ ແລະ ການດຳລົງຊີວິດຮູບແບບໃໝ່ ຫຼື New Normal, ສະນັ້ນທຸກພາກສ່ວນໄດ້ເອົາໃຈໃສ່ຊຸກຍູ້ວຽກງານຫັນເປັນດິຈິຕອນໃຫ້ໄດ້ຮັບການພັດທະນາໄວຂຶ້ນ ແລະ ທັນກັບສະພາບການ ເປັນຕົ້ນ ການປະຊຸມຜ່ານລະບົບ ທາງໄກ (Video Conference), ການນຳໃຊ້ລະບົບອີເມວ, ລະບົບສື່ສານພາກລັດ G-Chat, ລະບົບຫ້ອງການທັນສະໄໝ (e-Office), ການຮຽນການສອນຜ່ານທາງອອນລາຍ, ການດຳເນີນທຸລະກຳອອນລາຍຕ່າງໆ, ການສັ່ງຊື້ເຄື່ອງ-ອາຫານການກິນ ຜ່ານລະບົບອອນລາຍ ແລະ ການຈ່າຍເງິນຜ່ານລະບົບເອເລັກໂຕຣນິກ.

ໃນຕໍ່ໜ້າຈະສືບຕໍ່ຊີ້ນໍາການສ້າງ, ປັບປຸງ ແລະ ຈັດຕັ້ງປະຕິບັດບັນດານິຕິກຳ ກ່ຽວກັບວຽກງານຄຸ້ມຄອງໄອຊີທີ ແລະ ດິຈິຕອນ, ສື່ສັງຄົມອອນລາຍ ເພື່ອໃຫ້ກວມເອົາຊ່ອງທາງ ແລະ ວິທີການໃໝ່ທີ່ເກີດຂຶ້ນ ແລະ ຖືກນໍາໃຊ້ຫຼາຍໃນສັງຄົມເປັນແຕ່ລະໄລຍະ ນອກນັ້ນ, ຍັງຈະສືບຕໍ່ວຽກງານການພັດທະນາເສດຖະກິດດິຈິຕອນຂອງ ສປປ ລາວ ໂດຍການຜັນຂະຫຍາຍວິໄສທັດ ແລະ ຍຸດທະສາດ ແລະ ແຜນພັດທະນາເສດຖະກິດດິຈິຕອນຂອງລັດຖະບານ, ສືບຕໍ່ວຽກງານການຄຸ້ມຄອງ ແລະ ແກ້ໄຂການພະນັນອອນລາຍ, ກວດກາການນໍາໃຊ້ຄື້ນຄວາມຖີ່ ແລະ ອິນເຕີເນັດຄາເຟ ທີ່ໃຫ້ບໍລິການບໍ່ຖືກຕ້ອງກັບລະບຽບກົດໝາຍ, ວຽກງານຂຶ້ນທະບຽນຊິມຄາດ, ສືບຕໍ່ກໍ່ສ້າງລັດຖະບານເອເລັກໂຕຣນິກ ໂດຍສົ່ງເສີມການນໍາໃຊ້ໃຫ້ແກ່ບັນດາກະຊວງ, ອົງການລັດຖະບານໃນສູນກາງ ແລະ ທ້ອງຖິ່ນ, ສືບຕໍ່ພັດທະນາ-ຄຸ້ມຄອງອິນເຕີເນັດລວມສູນ ໂດຍການພັດທະນາດິຈິຕອນ ແລະ ການກ້າວເຂົ້າສູ່ຍຸກອຸດສາຫະກຳ 4.0 ໃນອະນາຄົດ.