ໃນວັນທີ 4 ຕຸລາ 2022, ທີ່ກະຊວງແຜນການ ແລະ ການລົງທຶນ ໄດ້ຈັດພິທີປາຖະກະຖາ ໃນຫົວຂໍ້ ການພົວພັນຮ່ວມມື ລາວ-ຫວຽດນາມ ໃນປີສາມັກຄີມິດຕະພາບ 2022 ແລະ ບາງເຫດການພົ້ນເດັ່ນຂອງສາກົນ ແລະພາກພື້ນໂດຍເປັນກຽດປະຖະກະຖາເລົ່າມູນເຊື້ອ ຂອງທ່ານ ສົມສະຫວາດເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດິດຮອງນາຍົກລັດຖະມົນຕີ ແຫ່ງ ສປປ ລາວ ມີບັນດາທ່ານ ຮອງລັດຖະມົນຕີ, ທ່ານ ຫົວໜ້າສູນສະຖິຕິແຫ່ງຊາດ, ທ່ານ ຮອງປະທານຄະນະກຳມະການຮ່ວມມືລາວ-ຫວຽດນາມ ແລະ ທ່ານຮອງປະທານຄະນະກຳມະທິການຮ່ວມມື ລາວ-ຈີນ ແລະ ພະນັກງານອ້ອມຂ້າງຂອງກະຊວງແຜນການ ແລະ ການລົງທຶນເຂົ້າຮ່ວມ.
ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວມີຄໍາເຫັນວ່າ: ໃນນາມຕາງໜ້າ ຄະນະພັກ, ຄະນະນໍາ ກະຊວງແຜນການ ແລະ ການລົງທຶນ ຂໍສະແດງຄວາມຍີນດີຕ້ອນຮັບອັນອົບອຸ່ນມາຍັງ ທ່ານ ສົມສະຫວາດ ເລັ່ງສະຫວັດ, ອະດີດກຳມະການກົມການເມືອງສູນກາງພັກ, ອະດິດຮອງນາຍົກລັດຖະມົນຕີ, ທີ່ໄດ້ສະຫລະເວລາອັນມີຄຸນຄ່າໃຫ້ກຽດປະຖະກະຖາເລົ່າຄືນມູນເຊື້ອ, ເນື່ອງໃນໂອກາດການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ກໍຄືວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ ໃນ 2 ຫົວຂໍ້ຄື: 1)ການພົວພັນຮ່ວມມືລາວ-ຫວຽດນາມ ໃນປີສາມັກຄີມິດຕະພາບ 2022 ແລະ 2)ບາງສະພາບພົ້ນເດັ່ນຂອງສາກົນ ແລະ ພາກພື້ນ, ເພື່ອເປັນການຈັດຕັ້ງສະເຫຼີມສະຫຼອງ 2 ວັນປະຫວັດສາດ “ປີສາມັກຄີມິດຕະພາບລາວ-ຫວຽດນາມ 2022” ແລະ ຮັດແໜ້ນຄວາມສາມັກຄີ, ເສີມຂະຫຍາຍສາຍພົວພັນການຮ່ວມມືລາວ-ຫວຽດນາມ ກໍຄື 2 ກະຊວງແຜນການ ແລະ ການລົງທຶນ ໃນນາມເປັນປະທານຄະນະກໍາມະການຮ່ວມມືລາວ-ຫວຽດນາມ ແລະ ຫວຽດນາມ-ລາວ.ໂອກາດທີ່ທ່ານໃຫ້ກຽດມາຮ່ວມພິທີປະຖະກະຖາ ເລົ່າມູນເຊື້ອ ໃນຄັ້ງນີ້, ຂໍລາຍງານສະພາບການຈັດຕັ້ງປະຕິບັດໜ້າທີ່ ຂອງກະຊວງແຜນການ ແລະ ການລົງທຶນ ທີ່ມີພາລະບົດບາດໃນການເປັນເສນາທີການໃຫ້ແກ່ພັກ ແລະ ລັດຖະບານ ໃນວຽກງານການຄຸ້ມຄອງມະຫາພາກກ່ຽວກັບການວາງແຜນພັດທະນາເສດຖະກິດ-ສັງຄົມແຫ່ງຊາດ, ໂດຍຫຍໍ້ປັດຈຸບັນ ກະຊວງແຜນການ ແລະ ການລົງທຶນ ພວມສຸມໃສ່ການສະຫຼຸບຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 9 ເດືອນ ແລະ ແຜນວຽກຈຸດສຸມ 3 ເດືອນທ້າຍປີ 2022 ແລະ ທິດທາງແຜນການ ປີ 2023; ໂດຍປະຕິບັດ ຕາມມະຕີ 08/ລບ, ລົງວັນທີ 29 ກໍລະກົດ 2022 ວ່າດ້ວຍການແບ່ງຄວາມຮັບຜິດຊອບ ໃນການຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດ ມະຕິສະພາແຫ່ງຊາດ ສະບັບເລກທີ 55/ສພຊ, 56/ສພຊ, 58/ສພຊ ແລະ 62/ສພຊ ລົງວັນທີ 08 ກໍລະກົດ 2022 ແລະ ສຸມໃສ່ການຈັດຕັ້ງຜັນຂະຫຍາຍວາລະແຫ່ງຊາດ ຕາມມະຕິ 07/ລບ, ລົງວັນທີ 04 ຕຸລາ 2021 ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ (2021-2023). ພ້ອມນີ້ ກະຊວງແຜນການ ແລະການລົງທຶນ ໄດ້ເປັນໃຈກາງປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຜັນຂະຫຍາຍວາລະແຫ່ງຊາດ, ອອກເປັນແຜນງານ, ໂຄງການລະອຽດຂອງແຕ່ລະພາກສ່ວນ ຕາມມະຕິຕົກລົງຂອງລັດຖະບານດ້ວຍ.