ໃນວັນທີ 19 ສິງຫາ 2024 ຜ່ານມາ, ຢູ່ສຳນັກງານລັດຖະບານ ສສ ຫວຽດນາມ, ທີ່ ຮ່າໂນ້ຍ, ທ່ານ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ໃຫ້ການຕ້ອນຮັບທ່ານ ປອ. ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກຳມະການຮ່ວມມື ລາວ – ຫວຽດນາມ ເນື່ອງໃນໂອກາດທີ່ໄດ້ມາຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ.
ທ່ານ ປອ. ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກຳມະການຮ່ວມມື ລາວ – ຫວຽດນາມ ໄດ້ລາຍງານໃຫ້ຮູ້ວ່າ: ການມາຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ໃນຄັ້ງນີ້ ແມ່ນມາເຂົ້າຮ່ວມ ກອງປະຊຸມກາງສະໄໝຂອງຄະນະກໍາມະການຮ່ວມມື ລະຫວ່າງ ລັດຖະບານລາວ ແລະ ລັດຖະບານຫວຽດນາມ ປະຈໍາປີ 2024 ຢຸ່ແຂວງເຫງະອານ ເຊິ່ງໄດ້ມີຜົນສໍາເລັດຢ່າງຈົບງາມ, ສາມາດປະຕິບັດສໍາເລັດໂດຍພື້ນຖານ ບັນດາ ຂໍ້ຕົກລົງການຮ່ວມມື ລະຫວ່າງສອງລັດຖະບານ ກໍ່ຄື ສອງກົມການເມືອງ, ອັນໄດ້ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ ແລະ ທິດທາງການຮ່ວມມືສອງຝ່າຍໃນຕໍ່ໜ້າ ແມ່ນສືບຕໍ່ຍຶດໝັ້ນ ແລະ ຈັດຕັ້ງຜັນຂະຫຍາຍສັນຍາວ່າດ້ວຍແຜນການຮ່ວມມື ໄລຍະ 2021-2025 ໂດຍການຜັນຂະຫຍາຍສັນຍາການຮ່ວມມື ລະຫວ່າງສອງລັດຖະບານ ໃຫ້ສອດຄ່ອງກັບທິດຊີ້ນໍາຂອງການນໍາຂັ້ນສູງຂອງສອງຝ່າຍ ແລະ ຕາມເງື່ອນໄຂຕົວຈິງຂອງທັງສອງປະເທດ ເພື່ອຈັດຕັ້ງຜັນຂະຫຍາຍຢ່າງມີປະສິດທິຜົນ, ໂດຍສຸມໃສ່ບາງວຽກຈຸດສຸມ ຄື: ເພີ່ມທະວີການຮ່ວມມືດ້ານການເມືອງ, ການຕ່າງປະເທດ, ນໍາເອົາການພົວພັນດ້ານການເມືອງ ລາວ-ຫວຽດນາມ ເຂົ້າສູ່ລວງເລີກ, ປັບປຸງສະພາບແວດລ້ອມການລົງທຶນ ເພື່ອດຶງດູດການລົງທຶນຈາກຕ່າງປະເທດ ໂດຍສະເພາະນັກລົງທຶນຂະໜາດໃຫຍ່ຂອງຫວຽດນາມ ມາລົງທຶນຢູ່ລາວໃຫ້ຫຼາຍຂຶ້ນ, ພ້ອມທັງແກ້ໄຂຂາດຕົວບັນດາຂໍ້ຄົງຄ້າງ ໃນການຈັດຕັ້ງປະຕິບັດໂຄງການ ຂອງນັກລົງທຶນຫວຽດນາມ, ສືບຕໍ່ພັດທະນາພື້ນຖານໂຄງລ່າງເຊື່ອມຈອດສອງພື້ນຖານເສດຖະກິດ ເປັນຕົ້ນແມ່ນ ເສັ້ນທາງດ່ວນ ວຽງຈັນ-ຮ່າໂນ້ຍ, ເສັ້ນທາງລົດໄຟ ວຽງຈັນ-ຫວຸງອາງ…
ທ່ານ ຟ້າມ ມິງ ຈິງ, ນາຍົກລັດຖະມົນຕີ ຫວຽດນາມ ໄດ້ຊົມເຊີຍຕໍ່ຜົນສໍາເລັດ ກອງປະຊຸມຕີລາຄາການຈັດຕັ້ງຜັນຂະຫຍາຍ ຂໍ້ຕົກລົງແຜນການຮ່ວມມື ປະຈໍາປີ 2024 ແລະ ກວດກາ, ຊຸກຍູ້ການຈັດຕັ້ງປະຕິບັດສັນຍາແຜນການຮ່ວມມື ໄລຍະ 2021-2025 ລະຫວ່າງ ສອງຄະນະກໍາມະການຮ່ວມມືສອງປະເທດ ລາວ ແລະ ຫວຽດນາມ ແລະ ໄດ້ຕີລາຄາສູງບົດບາດຂອງຄະນະກໍາມະການຮ່ວມມືຂອງ 2 ປະເທດ ໃນຄວາມມານະພະຍາຍາມສົມທົບກັນຢ່າງແໜ້ນແຟ້ນແລະສະແດງຄວາມຍິນດີຊົມເຊີຍ ທີ່ມູນຄ່າການຄ້າ ລະຫວ່າງ ຫວຽດນາມ-ລາວ ບັນລຸຫຼາຍກວ່າ 1 ຕື້ໂດລາສະຫະລັດ, ສອງຝ່າຍ ຕ້ອງຍູ້ແຮງການເຊື່ອມຕໍ່ສອງພື້ນຖານເສດຖະກິດ ລະຫວ່າງສອງປະເທດ, ເປັນຕົ້ນແມ່ນການເຊື່ອມຕໍ່ດ້ານຄົມມະນາຄົມ ລະຫວ່າງສອງປະເທດ ແລະ ສະເໜີຝ່າຍລາວ ຊຸກຍູ້ໃນການສ້າງເສັ້ນທາງດ່ວນ ຈາກລາວ ເຊື່ອມຈອດກັບທາງດ່ວນຂອງຫວຽດນາມ ເພື່ອອຳນວຍຄວາມສະດວກດ້ານການຄົມມະນາຄົມໃຫ້ວ່ອງໄວກ່ວາເກົ່າ. ພ້ອມກັນນັ້ນ, ທ່ານ ນາຍົກລັດຖະມົນຕີ ຍັງແນະນຳໃຫ້ສອງຄະນະກຳມະການຮ່ວມມື ໃຫ້ຮີບຮ້ອນຈັດຕັ້ງປະຕິບັດຕໍ່ບັນດາໜ້າວຽກທີ່ໄດ້ຕົກລົງຮ່ວມກັນໃຫ້ມີຜົນສຳເລັດຕົວຈິງຫຼາຍຂື້ນ.