ປາຖະກະຖາວັນສຳຄັນຕ່າງໆຂອງພັກ, ຂອງຊາດ ແລະ ຂອງສາກົນ

by | Aug 11, 2021 | ການເຄື່ອນໄຫວ | 0 comments

ໃນວັນທີ 30 ກໍລະກົດ 2021, ກະຊວງແຜນການ ແລະການລົງທຶນ ໄດ້ຈັດພິທີປາຖະກະຖາ ວັນສຳຄັນຕ່າງໆຂອງພັກ, ຂອງຊາດ ແລະ ຂອງສາກົນ, ພ້ອມທັງສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ ພິທີປາຖະກະຖາດັ່ງກ່າວ, ດຳເນີນພາຍໃຕ້ການເປັນປະທານຂອງ ສະຫາຍ ນາງ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງແຜນການ ແລະ ກາລົງທຶນ ໂດຍມີບັນດາຄະນະພັກ-ຄະນະນຳ, ສະມາຊິກພັກ, ພະນັກງານ-ລັດຖະກອນ ພາຍໃນກະຊວງເຂົ້າຮ່ວທັງໝົດ 212 ທ່ານ, ຍິງ 125 ທ່ານ.

ບັນດາເອກະສານທີ່ເຜີຍແຜ່ໃນຄັ້ງນີ້ ປະກອບມີ: ມະຕິກອງປະຊຸມຄົບຄະນະສະໄໝວິສາມັນຂອງຄະນະບໍລິຫານງານສູນກາງພັກ, ວັນລັດຖະທຳມະນູນແຫ່ງຊາດລາວ ຄົບຮອບ 30 ປີ, ວັນເກີດປະທານ ສຸພານຸວົງ ຄົບຮອບ 112 ປີ, ວັນເຊັນສັນຍາມິດຕະພາບ-ການຮ່ວມມື ລາວ-ຫວຽດນາມ ຄົບຮອບ 44 ປີ ແລະວັນສ້າງຕັ້ງສາຍພົວພັນການທູດ ຄົບຮອບ 59 ປີ, ວັນສ້າງຕັ້ງພັກກອມມູນິດຈີນ ຄົບຮອບ 100 ປີ ແລະ ວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ.

ໂອກາດນີ້, ສະຫາຍ ນາງ ຄຳຈັນ ວົງແສນບູນ ໄດ້ໃຫ້ກຽດໂອ້ລົມ ເພື່ອໃຫ້ທິດຊີ້ນຳຕໍ່ບັນດາສະຫາຍສະມາຊິກພັກ-ພະນັກງານ ພາຍໃນກະຊວງ ແລະ ເນັ້ນວ່າ: ການຈັດປາຖະກະຖາຄັ້ງນີ້, ແມ່ນເພື່ອເປັນການທົບທວນ ແລະຫວນຄືນເຖິງມູນເຊື້ອອັນດີງາມຂອງພັກ, ຂອງຊາດ ແລະມູນເຊື້ອການຕໍ່ສູ້ຢ່າງພິລະອາດຫານຂອງບັນພະບູລຸດທີ່ໄດ້ເສຍສະຫລະຢ່າງບໍ່ມີຂອບເຂດ ພາຍໃຕ້ການນຳພາອັນປີຊາສາມາດຂອງພັກປະຊາຊົນປະຕິວັດລາວ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ    ໃນປັດຈຸບັນ ເພື່ອນໍາເອົາຄວາມຢູ່ດີກິນດີມາສູ່ປະຊາຊົນລາວບັນດາເຜົ່າ. ຄະນະພັກກະຊວງ ຖືເອົາການສະເຫລີມສະຫຼອງ ວັນປະຫວັດສາດສໍາຄັນຂອງຂອງພັກ, ຂອງຊາດ ແລະ ຂອງສາກົນ ໃນຄັ້ງນີ້, ເປັນໂອກາດແຫ່ງການເພີ່ມທະວີສຶກສາອົບຮົມພະນັກງານ, ສະມາຊິກພັກ ໃຫ້ມີນ້ຳໃຈຮັກຊາດ, ຮັກລະບອບໃໝ່, ຮັກລະບອບປະຊາທິປະໄຕປະຊາຊົນ, ສ້າງຄວາມສາມັກຄີໃຫ້ເປັນປຶກແຜ່ນ, ສ້າງສະຕິເປັນເຈົ້າຕົນເອງ, ເພິ່ງຕົນເອງ ແລະສ້າງຄວາມເຂັ້ມແຂງດ້ວຍຕົນເອງ.