ພິທີປະຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ ແລະວັນສຳຄັນຂອງຊາດ

by | Mar 28, 2022 | ການເຄື່ອນໄຫວ | 0 comments

ໃນວັນທີ 18 ມີນາ 2022, ທີ່ກະຊວງແຜນການ ແລະ ການລົງທຶນ, ໄດ້ຈັດປະຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ, ວັນຄຽດແຄ້ນຂອງປະຊາຊົນລາວ, ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 76 ປີ ແລະ ວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 40 ປີ ຂື້ນ,ໂດຍການເປັນປະທານຂອງທ່ານ ຄຳເຈນ ວົງໂພສີ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງແຜນການ ແລະ ການລົງທຶນ, ພ້ອມນີ້ກໍ່ມີບັນດາທ່ານ ຄະນະປະຈຳພັກ, ສະມາຊິກພັກພະນັກງານຂອງກະຊວງແຜນການ ແລະ ການລົງທຶນ ເຂົ້າຮ່ວມ.

ທ່ານ ຄຳເຈນ ວົງໂພສີ ກໍໄດ້ຍົກໃຫ້ເຫັນປະຫວັດແຫ່ງການກຳເນີດ ທາດແທ້, ອຸດົມການ ການເຕີບໃຫຍ່ຂະຫຍາຍຕົວ, ມູນເຊື້ອອັນດີງາມ ແລະ ຜົນງານອັນໃຫຍ່ຫຼວງຂອງພັກປະຊາຊົນປະຕິວັດລາວ ຕະຫຼອດໄລຍະ 67 ປີທີຜ່ານມາ ອັນພົ້ນເດັ່ນກວ່າໜູ່ແມ່ນມູນເຊື້ອແຫ່ງການຕໍ່ສູ້ບໍ່ຍອມຈຳນົນທີ່ເຕັມໄປດ້ວຍຜົນງານ ແລະ ໄຊຊະນະຂອງການປະຕິວັດ ປະຊາທິປະໄຕ ຊີ້ໃຫ້ເຫັນການນຳພາອັນສະຫຼາດສ່ອງໃສຂອງພັກໃນການຕໍ່ສູ້ປົດປ່ອຍຊາດແບບບົວບໍ່ໃຫ້ຊຳ້ນຳ້ບໍ່ໃຫ້ຂຸ່ນ ໃນການປົດປ່ອຍຊາດ ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າແຕ່ລະຍຸກ ແຕ່ລະສະໄໝ ສຶບທອດກັນມາຈົນເຖິງປັດຈຸບັນ ພ້ອມນີ້, ທ່ານ ຍັງໄດ້ຮຽກຮ້ອງໃຫ້ສະມາຊິກພັກ-ພະນັກງານຫຼັກແຫຼ່ງພ້ອມກັນເສີມຂະຫຍາຍມູນເຊື້ອອັນດີງານຂອງພັກ-ລັດທີຮັກຊາດອັນແທ້ຈິງ ຍົກສູງຄວາມສາມາດ ແລະ ຄຸນນະພາບການນຳພາຂອງພັກ ໃນການປົກປັກຮັກສາພັດທະນາປະເທດຊາດ ຕາມແນວທາງຂອງພັກໄລຍະໃໝ່ 67 ປີ ພັກປະຊາຊົນ ປະຕິວັດລາວ ໄດ້ເຮັດສຳເລັດພາລະກິດປະຫວັດສາດອັນຍິ່ງໃຫຍ່, ເພື່ອນຳພາປະຊາຊົນຫຼຸດພົ້ນອອກສະຖານະພາບດ້ອຍພັດທະນາຕາມແຜນທີ່ກຳນົດໄວ້ ກາຍເປັນປະເທດພັດທະນາ ແລະ ກ້າວຂື້ນສູ່ສັງຄົມນິຍົມ.

ນອກນີ້ຍັງໄດ້ຮັບຟັງການປະຖະກະຖາວັນຄຽດແຄ້ນຂອງປະຊາຊົນ ວັນນັກຮົບເສບອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 76 ປີ, ຈາກທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 40 ປີ ຈາກທ່ານ ນາງ ພອນວັນ ອຸທະວົງ ປະທານກວດກາພັກກະຊວງ, ຮອງລັດຖະມົນຕີ ກະຊວງແຜນການ ແລະ ການລົງທຶນ ຕື່ມອີກ.