ພິທີມອບ-ຮັບ ການຊ່ວຍເຫຼືອ ເພື່ອປ້ອງກັນ ແລະ ສະກັດກັ້ນພະຍາດ ໂຄວິດ 19 ຈາກກະຊວງແຜນການ ແລະ ການລົງທຶນຫວຽດນາມ, ຄະນະກຳມະການຮ່ວມມືຫວຽດນາມ-ລາວ ມອບໃຫ້ແກ່ ກະຊວງແຜນການ ແລະ ການລົງທຶນ ລາວ, ຄະນະກຳມະການຮ່ວມມືລາວ-ຫວຽດນາມ

by | Aug 11, 2020 | ການເຄື່ອນໄຫວ | 0 comments

ໃນຕອນເຊົ້າ ວັນທີ 15 ເມສາ 2020 ສະຫາຍ ຫງວຽນ ຈີຢຸງ, ລັດຖະມົນຕີກະຊວງແຜນການ ແລະການລົງທຶນຫວຽດນາມ, ປະທານຄະນະກຳມະການຮ່ວມມືຫວຽດນາມ-ລາວ ໄດ້ນຳພາຄະນະຜູ້ແທນຝ່າຍຫວຽດນາມເຂົ້າໄປອວຍພອນປີໃໝ່ລາວ ແດ່ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ພ້ອມດ້ວຍຄະນະ ແລະພະນັກງານຂອງສະຖານທູດລາວເຂົ້າຮ່ວມ, ຢູ່ສະຖານເອັກອັກຄະລັດຖະທູດ ສປປລາວ ທີ່ນະຄອນຫຼວງຮ່າໂນ້ຍ ສສ ຫວຽດນາມ.

ເນື່ອງໃນປີໃໝ່ລາວ ພສ 2563 ໝູນວຽນມາເຖິງນີ້, ສະຫາຍ ຫງວຽນ ຈີ ຢຸງ ໄດ້ກ່າວອວຍພອນປີໃໝ່ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ລາວ-ຫວຽດນາມ ທີ່ນັບມື້ນັບແໜ້ນແຟ້ນ ແລະ ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ພ້ອມທັງເຊື່ອໝັ້ນວ່າມິດຕະພາບອັນຍິ່ງໃຫຍ່, ສາຍພົວພັນພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກສອງລັດ ກໍຄືປະຊາຊົນສອງຊາດ ຈະນັບມື້ນັບຈະເລີນງອກງາມຂຶ້ນໄປເລື້ອຍໆ.

ໃນໂອກາດນີ້ ສະຫາຍລັດຖະມົນຕີ ຫງວຽນ ຈີ ຢຸງ ກໍໄດ້ມອບເງິນຊ່ວຍເຫຼືອໃຫ້ແກ່ ກະຊວງແຜນການ ແລະ ການລົງທຶນລາວ ຈຳນວນ 10,000 ໂດລາສະຫະລັດ ໂດຍຜ່ານ ສະຖານທູດໃຫ້ແກ່ ກະຊວງແຜນການ ແລະ ການລົງທຶນຂອງລາວ ເພື່ອນຳໃຊ້ ເຂົ້າໃນການປ້ອງກັນ ແລະ ຕ້ານພະຍາດໂຄວິດ-19 ຢູ່ພາຍໃນສປປລາວ, ທຶນດັ່ງກ່າວ ສະແດງເຖິງນຳ້ໃຈໄມຕີຈິດມິດຕະພາບ ສອງປະເທດເວົ້າລວມ ເວົ້າສະເພາະ ລະຫວ່າງ ສອງກະຊວງແຜນການ ແລະ ການລົງທຶນ, ຄະນະກຳມະການຮ່ວມມືລາວ-ຫວຽດນາມ ແລະ ຫວຽດນາມ-ລາວ.

ໂອກາດດັ່ງກ່າວນີ້, ທ່ານ ເອກອັກຄະລັດຖະທູດ ແສງເພັດ ຮຸ່ງບຸນຍວງ ໄດ້ກ່າວສະແດງຄວາມຂອບອົກຂອບໃຈ ຄຳອວຍພອນທີ່ດີງາມ, ຕີລາຄາສູງການພົວພັນລະຫວ່າງລາວ-ຫວຽດນາມ ທີ່ນັບມື້ກ້າວສູ່ລວງເລີກ, ເກີດດອກອອກຜົນໃນຫລາຍດ້ານ, ພ້ອມນັ້ນ ທ່ານ ຍັງໄດ້ກ່າວຄຳຂອບໃຈເປັນຢ່າງຍິ່ງຕໍ່ຝ່າຍເພື່ອນທີ່ຍາມໃດກໍມີນໍ້າໃຈເປັນຫ່ວງເປັນໃຍຕໍ່ຝ່າຍລາວມາໂດຍຕະຫຼອດ, ເຖິງວ່າຈະຫຍຸ້ງຍາກລຳບາກໃນການສະກັດກັ້ນພະຍາດໂຄວິດ 19 ເຊັ່ນດຽວກັນ ແລະຈະຈັດສົ່ງການຊ່ວຍເຫລືອຄັ້ງນີ້ ໃຫ້ກະຊວງແຜນການ ແລະການລົງທຶນລາວ, ຄະນະກໍາມະການຮ່ວມມືລາວ-ຫວຽດນາມ ເພື່ອນໍາໃຊ້ເຂົ້າໃນການປ້ອງກັນ ແລະຕ້ານພະຍາດ COVID-19 ຢູ່ລາວຕາມຄວາມເໝາະສົມ. ທັງໝົດນີ້ ເປັນການປະກອບສ່ວນອັນສໍາຄັນ ໃນການເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ. ຫວຽດນາມ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນໄປ