ພິທີມອບ-ຮັບ ປະທານຄະນະກຳມະການຮ່ວມມືລາວ-ຫວຽດນາມ ແລະ ປະທານຄະນະກຳມະການຮ່ວມມືລາວ-ຈີນ ລະຫວ່າງ ຜູ້ເກົ່າ ແລະ ຜູ້ໃໝ່

by | May 31, 2022 | ການເຄື່ອນໄຫວ, ຂ່າວເດັ່ນ | 0 comments

ໃນວັນທີ 27 ພຶດສະພາ 2022, ທີ່ກະຊວງແຜນການ ແລະ ການລົງທຶນ ໄດ້ຈັດພິທີມອບ-ຮັບ ໜ້າທີ່ລະຫວ່າງ ທ່ານ ສອນໄຊ ສີພັນດອນ ປະທານຄະນະກຳມະການຮ່ວມມືລາວ-ຫວຽດນາມ ແລະ ປະທານຄະນະກຳມະການຮ່ວມມືລາວ-ຈີນ (ຜູ້ເກົ່າ) ແລະ ທ່ານ ຄໍາເຈນ ວົງໂພສີ ປະທານຄະນະກຳມະການຮ່ວມມືລາວ-ຫວຽດນາມ ແລະ ປະທານຄະນະກຳມະການຮ່ວມມືລາວ-ຈີນ (ຜູ້ໃໝ່) ຂື້ນ ໂດຍການເປັນປະທານຂອງ ທ່ານ ສອນໄຊ ສີພັນດອນ ກຳມະການກົມການເມືອງ, ຮອງນາຍົກລັດຖະມົນຕີ, ພ້ອມນີ້ກໍ່ຍັງມີບັນດາທ່ານຮອງລັດຖະມົນຕີ, ຫົວໜ້າສູນສະຖິຕິ, ຮອງປະທານຄະນະກຳມະການຮ່ວມມື ລາວ-ຫວຽດ, ຮອງປະທານຄະນະກຳມະການຮ່ວມມືລາວ-ຈີນ ແລະ ບັນດາທ່ານຫົວໜ້າກົມ, ຄະນະກົມພາຍໃນກະຊວງແຜນການ ແລະ ການລົງທຶນເຂົ້າຮ່ວມ.

ໂອກາດນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳຕໍ່ສະຫາຍ ຄຳເຈນ ວົງໂພສີ ປະທານຄະນະກຳມະການຮ່ວມມືລາວ-ຫວຽດນາມ ແລະທັງເປັນ ປະທານຄະນະກຳມະການຮ່ວມມືລາວ-ຈີນ ຜູ້ໃໝ່ ສຶບຕໍ່ຈັດຕັ້ງປະຕິບັດວຽກງານໃນຕໍ່ໜ້າ ດັ່ງນີ້: ດ້ານວຽກງານການຮ່ວມມືລາວ-ຫວຽດນາມ ເພື່ອຜັນຂະຫຍາຍເນື້ອໃນບົດບັນທຶກ ຂອງສອງກົມການເມືອງ ກໍ່ຄືຈິດໃຈຊີ້ນໍາ ຂອງສອງນາຍົກລັດຖະມົນຕີ ລາວ ແລະ ຫວຽດນາມ ໃນກອງປະຊຸມ ຄັ້ງທີ 44 ຂອງຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ກໍ່ຄື ເນື້ອໃນບົດບັນທຶກ ແລະ ຂໍ້ຕົກລົງວ່າດ້ວຍແຜນການຮ່ວມມື ປະຈຳປີ 2022 ໃຫ້ປະກົດຜົນເປັນຈິງ, ສະເໜີ ຄະນະກໍາມະການຮ່ວມມື ລາວ-ຫວຽດນາມ ສືບຕໍ່ຈັດຕັ້ງຜັນຂະຫຍາຍເນື້ອໃນບົດບັນທຶກ ກໍ່ຄືຂໍ້ຕົກລົງດັ່ງກ່າວ ໃຫ້ເປັນອັນລະອຽດ ໃນນັ້ນ ໃຫ້ເອົາໃຈໃສ່ຊຸກຍູ້ບັນດາກະຊວງ, ຂະແໜງການ, ອົງການ, ນະຄອນຫຼວງ ແລະ ບັນດາແຂວງ ປະສານສົມທົບກັບພາກສ່ວນ ທີ່ກ່ຽວຂ້ອງຂອງສອງຝ່າຍ, ດ້ານວຽກງານການຮ່ວມມືລາວ-ຈີນ ການຮ່ວມມືດ້ານເສດຖະກິດ, ການຄ້າ ແລະ ເຕັກນິກ ລະຫວ່າງ ລາວ-ຈີນ ຖືເປັນທ່າແຮງສໍາຄັນອັນຫນຶ່ງໃນການປະກອບສ່ວນ ພັດທະນາເສດຖະກິດ-ສັງຄົມໃຫ້ເອົາໃຈໃສ່ຕິດຕາມ ແລະ ຊຸກຍູ້ ການຮ່ວມມືໃນຂົງເຂດວຽກງານດັ່ງກ່າວນີ້ ຢ່າງຕັ້ງໜ້າ, ແນໃສ່ເພື່ອຍາດແຍ່ງສ້າງບັນຍາກາດ ແລະ ເງື່ອນໄຂອຳນວຍຄວາມສະດວກທີ່ດີ ໃຫ້ແກ່ການປະຕິບັດວຽກງານການຮ່ວມມືຕົວຈິງຂອງສອງຝ່າຍໃນທຸກດ້ານ.