ໃນວັນທີ 17 ກຸມພາ 2023, ທີ່ສະໂມສອນໃຫຍ່ກະຊວງແຜນການ ແລະ ການລົງທຶນ, ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາສຳຫຼວດຄວາມເປັນໄປໄດ້ໃນການພັດທະນາໂຄງການ ສ້າງເຂດເສດຖະກິດໃໝ່ ນິຄົມອຸດສະຫະກຳໄຟຟ້າ ໃນເນື້ອທີ່ 316 ເຮັກຕາ ຢູ່ເຂດບ້ານໂພນມ່ວງ ແລະ ບ້ານຮ່ອງງົວ, ເມືອງນາຊາຍທອງ, ນະຄອນຫຼວງວຽງຈັນ,ລະຫວ່າງ ລັດຖະບານ ແຫ່ງ ສປປ ລາວ ກັບ ບໍລິສັດ ພັດທະນາ ລົງທຶນໄຟຟ້າ ລາວ-ຈີນ ຈຳກັດ, ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສະຫະກຳ ແລະ ການຄ້າ, ທ່ານ ໄຊຊະນະ ສິດທິພອນ ຮອງປະທານຄະນະກຳມະການຮ່ວມມືລາວ-ຈີນ, ທ່ານ ປອ ສີນາວາ ສຸພານຸວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ນາງ ທິບປະກອນ ຈັນທະວົງສາ ຮອງລັດຖະມົນຕີ ຫ້ອງ ວ່າການສຳນັກງານນາ ຍົກລັດຖະມົນຕີ, ທ່ານ ພູຂົງ ບັນນາວົງ ຮອງເຈົ້າຄອງນະຄອນຫຼວງ ແລະ ຕາງໜ້າຈາກບໍລິສັດກໍ່ໄດ້ເຂົ້າຮ່ວມ.
ໂດຍປະຕິບັດຕາມໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 19/ນຍ, ລົງວັນທີ 6 ກຸມພາ 2023, ທີ່ມອບສິດໃຫ້ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາບົດບັນທຶກ ຄວາມ ເຂົ້າໃຈ (MOU), ເຊິ່ງຕາງໜ້າເຊັນໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ປອ ສີນາວາ ສຸພານຸວົງ ຮອງ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ສຳລີ ບຸດສະດີ ຮັກສາການຫົວໜ້າກົມອຸດສະຫະກຳ ແລະ ຫັດຖະກຳ ກະຊວງອຸດສະຫະກຳ ແລະ ການຄ້າ ແລະ ທ່ານ ປອ ນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນນະຄອນຫຼວງ, ຮ່ວມກັບ ບໍລິສັດ ພັດທະນາ ລົງທຶນໄຟຟ້າ ລາວ-ຈີນ ຈຳກັດ, ເຊິ່ງຕາງໜ້າເຊັນໂດຍ ທ່ານ LIU YONG LONG ປະທານບໍລິສັດ ພັດທະນາ ລົງທຶນໄຟຟ້າລາວ-ຈີນ ຈຳກັດ ແລະ ທ່ານ SUN LEI ອະດີດປະທານສະພາການຄ້າຈີນ ແລະ ເຊັນເປັນພະຍານໂດຍ ທ່ານ WANG JING WU ປະທານ ກຸ່ມການລົງທຶນ ຢູນນານ.