ພິທີເຊັນສັນຍາວ່າດ້ວຍໂຄງການປູກໄມ້ອຸດສະຫະກໍາ ແລະໄມ້ໃຫ້ຫມາກ ທີ່ຕິດພັນກັບ – ການທ່ອງທ່ຽວ ຢູ່ພື້ນທີ່ປ່າຜະລິດ ເຊຄໍາພໍ-ແບ່ງວິໄລ

Mar 18, 2024 | ການເຄື່ອນໄຫວ, ຂ່າວເດັ່ນ

ໃນວັນທີ  15 ມີນາ 2024, ທີ່ ກະຊວງແຜນການ ແລະ ການລົງທຶນໄດ້ຈັດ  ພິທີເຊັນສັນຍາວ່າດ້ວຍໂຄງການປູກໄມ້ອຸດສະຫະກໍາ ແລະໄມ້ໃຫ້ຫມາກ ທີ່ຕິດພັນກັບ – ການທ່ອງທ່ຽວ ຢູ່ພື້ນທີ່ປ່າຜະລິດ ເຊຄໍາພໍ-ແບ່ງວິໄລ ໃນເນື້ອທີ່ 4.000 ເຮັກຕາ ແລະໂຄງການພັດທະນາ ການທ່ອງທ່ຽວແບບອະນຸລັກທໍາມະຊາດ ຢູ່ເຂດປ່າປ້ອງກັນແຫ່ງຊາດ ຍອດນໍ້າພູພຽງບໍລິເວນ ໃນເນື້ອທີ່ 514 ເຮັກຕາ ແລະ 2.000 ຕາແມັດ ຢູ່ເຂດເມືອງສະຫນາມໄຊ, ແຂວງອັດຕະປື. ລະຫວ່າງ ລັດຖະບານ ແຫ່ງ ສປປ ລາວ ຮ່ວມກັບ ລະຫວ່າງລັດຖະບານ ແຫ່ງ ສປປ ລາວ ກັບກຸ່ມ ບໍລິສັດ ຮົງກົງທຽນຊື່ ຈໍາກັດ. ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກໍາ ແລະປ່າໄມ້, ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫຼ່ງຂ່າວ ແລະວັດທະນະທໍາ,  ທ່ານ ບຸນເສີດ ເສດທິລາດ ຮອງເຈົ້າແຂວງ ແຂວງອັດຕະປື, ພ້ອມດຽວກັນນີ້ກໍ່ຍັງມີບັນດາທ່ານ ຫົວໜ້າຫ້ອງການ,​ຫົວໜ້າກົມ, ຮອງກົມ,​ຮອງຫົວໜ້າຫ້ອງການ, ຫົວໜ້າພະແນກ, ຮອງຫົວໜ້າພະແນກ ຈາກສູນກາງ ແລະ ທ້ອງຖີ່ນ ພະນັກງານທີກ່ຽວຂ້ອງຈາກບໍລິສັດກໍ່ໄດ້ເຂົ້າຮ່ວມ.

ໂດຍອິງຕາມ ໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 45/ນຍ. ລົງ ວັນທີ 04 ມີນາ 2024. ທີ່ມອບສິດໃຫ້ ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາ, ເຊິ່ງຕາງໜ້າໃຫ້ລັດຖະບານ ແຫ່ງ ສປປ ລາວ ເຊັນໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ຮສ ປອ ທຸມພອນ ວົງວິສຸກ ຮອງຫົວໜ້າກົມປ່າໄມ້ ກະຊວງກະສິກຳ ແລະ ປ່າໄມ້ ແລະ ທ່ານ ນາງ ແສງຈັນ ແພງເມືອງ ຫົວໜ້າກົມແຜນການ ແລະ ຮ່ວມມື ກະຊວງຖະແຫຼ່ງຂ່າວ ແລະ ວັດທະນະທຳ ແລະ ທ່ານ ສູນນະຄອນ ແກ້ວວຽງຄຳ ຫົວໜ້າພະແນກແຜນການ ແລະ ການລົງທຶນ ແຂວງ ອັດຕະປື ກັບ ກຸ່ມບໍລິສັດ ຮົງກົງທຽນຊື ຈໍາກັດ ເຊິ່ງຕາງຫນ້າເຊັນໂດຍ: ທ່ານ GU WEI (ກູ້ເຫວີຍ) ປະທານກຸ່ມບໍລິສັດ ຮົງກົງ ທຽນຊື້ ຈໍາກັດ ແລະ  ເຊັນເປັນພະຍານໂດຍ ທ່ານ YAO BIN ປະທານ ສະພາການຄ້າຊາວຈີນຕ່າງດ້າວປະຈໍາ ສປປ ລາວ ແລະ ທ່ານ LI ZHIYONG ປະທານ ສະພາການຄ້າຈີນ ປະຈໍາລາວ.