ພິທີເຊັນສັນຍາສໍາປະທານ ໂຄງການທ່າບົກທ່າແຂກເພື່ອພັດທະນາ ໂລຈິສຕິກ ການຂົນສົ່ງສິນຄ້າ ຂອງ ສປປ ລາວ

by | Feb 4, 2022 | ການເຄື່ອນໄຫວ | 0 comments

ໃນ ວັນທີ 28 ມັງກອນ 2022, ທີ່ກະຊວງ ແຜນການ ແລະການລົງທຶນ, ນະຄອນຫຼວງວຽງຈັນ, ໄດ້ຈັດພິທີເຊັນສັນຍາວ່າດ້ວຍການສໍາປະທານໂຄງການທ່າບົກທ່າແຂກ ເພື່ອພັດທະນາ ໂລຈິສຕິກ ການຂົນສົ່ງສິນຄ້າ ຂອງ ສປປ ລາວ. ລະຫວ່າງ ລັດຖະບານແຫ່ງ ສປປ ລາວ ກັບ ບໍລິສັດ ທ່າບົກທ່າແຂກ ຈຳກັດ.

ໃນພິທີເຊັນສັນຍາຄັ້ງນີ້ເປັນກຽດເຂົ້າຮ່ວມໂດຍທ່ານ ວັນໄຊ ພອງສະຫວັນ ເຈົ້າແຂວງແຂວງຄຳມ່ວນ, ທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີ ກະຊວງ ແຜນການ ແລະການລົງທຶນ, ທ່ານ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ພະແນກແຜນການ ແລະ ການລົງທຶນ ແຂວງຄໍາມ່ວນ, ຄະນະອຳນວຍການ ລັດວິສາຫະກິດລາວບໍລິການສິນຄ້າຜ່ານແດນ ກໍ່ໄດ້ໃຫ້ກຽດເຂົ້າຮ່ວມ. ການລົງນາມໃນພິທີເຊັນສັນຍາຄັ້ງນີ້ ຕາງໜ້າໃຫ້ລັດຖະບານແຫ່ງ ສປປ ລາວເຊັນໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງ ແຜນການ ແລະ ການລົງທືນ ແລະ ເຊັນເປັນພະຍານໂດຍ ທ່ານ ຄຳຜອງ ສົມວິຈິດ ຮອງຫົວໜ້າກົມແຜນການ ແລະ ການຮ່ວມມື ກະຊວງໂຍທາທິການ ແລະ ຂົນສົ່ງ, ທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະ ການລົງທຶນ ແຂວງຄຳມ່ວນ ແລະ ຕາງໜ້າໃຫ້ ບໍລິສັດເຊັນໂດຍທ່ານ ພຸດພອນໄຊ ຫຼວງລາດ, ອຳນວຍການ ບໍລິສັດທ່າບົກທ່າແຂກ ຈຳກັດືແລະ ເຊັນເປັນພະຍານໂດຍ ທ່ານ ສາຍຂອງ ລາດດາວົງ ຮອງຜູ້ອຳນວຍການ ລັດວິສາຫະກິດລາວ ບໍລິການສິນຄ້າຜ່ານແດນ, ທ່ານ ນາງ ທູນສະຫວັນ ສີຈັນທອງທິບ ຮອງປະທານ ບໍລິສັດ ຂົນສົ່ງສາກົນ ຈຳກັດ.

ໂຄງການທ່າບົກທ່າແຂກ (ສົ້ນຂົວມິດຕະພາບລາວ-ໄທ ແຫ່ງທີ 3) ມີມູນຄ່າ 15,7 ລ້ານໂດລາສະຫະລັດ ເຊິ່ງບໍລິສັດ ທ່າບົກທ່າແຂກ ຈຳກັດ ໄດ້ຖືກສ້າງຕັ້ງຂຶ້ນ ແລະ ເຊັນສັນຍາຮ່ວມທຶນຢ່າງເປັນທາງການ ໃນວັນທີ 10 ມິຖຸນາ 2021 ທີ່ຜ່ານມາ. ບໍລິສັດ ທ່າບົກທ່າແຂກ ຈຳກັດ ມີອັດຕາສ່ວນການຖືຮຸ້ນໂດຍລັດຖະບານ (ລັດວິສາຫະກິດ ລາວບໍລິການສິນຄ້າຜ່ານແດນ) 30% ແລະ ຝ່າຍເອກະຊົນ (ຕາງໜ້າໃຫ້ 3 ບໍລິສັດໂດຍ ບໍລິສັດ ເກຣັດເຕີແມ່ຂອງ ໂລຈິສຕິກ ຈຳກັດ) 70%; ບໍລິສັດ ທ່າບົກທ່າແຂກ ຈຳກັດ ໄດ້ແນ່ໃສ່ການພັດທະນາທ່າບົກ ໃຫ້ເປັນປະຕູດ່ານເຂົ້າ-ອອກ ຂອງສິນຄ້າສາກົນ ແລະ ຊຸກຍູ້ ສປປ ລາວ ໃຫ້ກາຍເປັນສູນກາງ ການບໍລິການພະລາທິການຂົນສົ່ງ ຂອງພາກພື້ນ ແລະ ສາກົນ ຜ່ານດ່ານຊາຍແດນ ແຂວງຄຳມ່ວນ. ການພັດທະນາ “ທ່າບົກທ່າແຂກ” ແມ່ນນອນຢູ່ໃນແຜນຍຸດທະສາດຂອງລັດຖະບານ ໃນ “ການພັດທະນາໂລຈິສຕິກ ການຂົນສົ່ງສິນຄ້າ” ເຊິ່ງໄດ້ກໍານົດຄວາມສໍາຄັນ ແລະ ຄວາມຈໍາເປັນໃນການພັດທະນາທ່າບົກ ຢູ່ ສປປ ລາວ, ທັງຍັງສອດຄ່ອງກັບນະໂຍບາຍຫັນປ່ຽນປະເທດ ຈາກ “ປະເທດທີ່ບໍ່ມີຊາຍແດນຕິດກັບທະເລ” ໄປສູ່ “ປະເທດເຊື່ອມໂຍງເຊື່ອມຈອດ” ຫຼື “ປະເທດບໍລິການທາງຜ່ານດ້ານຄົມມະນາຄົມຂົນສົ່ງ” ເພື່ອຍົກລະດັບສັກກະຍະພາບດ້ານການຂົນສົ່ງ ແລະ ພະລາທິການຂົນສົ່ງ ຂອງ ສປປ ລາວ.

ນອກນີ້ ໂຄງການ ທ່າບົກທ່າແຂກ” ຈະເຮັດໜ້າທີ່ເປັນສູນສໍາລັບເຕົ້າໂຮມ ແລະ ແຈກຢາຍສິນຄ້າ ແລະ ລະບົບບໍລິການໂລຈິສຕິກທີ່ທັນສະໄໝ ແລະ ຄົບວົງຈອນ, ທັງຍັງປະກອບສ່ວນເຂົ້າໃນການຫຼຸດຜ່ອນການຄ່ຽນຖ່າຍສິນຄ້າແບບຊະຊາຍ ແລະ ຫຼຸດຕົ້ນທຶນດ້ານໂລຈິສຕິກລົງ ເພື່ອເປັນທ່າແຮງໃຫ້ຫົວໜ່ວຍທຸລະກິດຂອງລາວ ສາມາດແຂ່ງຂັນກັບຕະຫຼາດໂລກໄດ້, ແລະ ສາມາດຕອບສະໜອງຄວາມຕ້ອງການຂອງຜູ້ໃຊ້ບໍລິການ ໄດ້ຢ່າງຄົບວົງຈອນ. ທ່າບົກທ່າແຂກ ສະໜອງການບໍລິການ ຍົກຍໍ-ຄ່ຽນຖ່າຍສິນຄ້າ, ຝາກສາງສິນຄ້າ,  ລານຈອດເພື່ອກວດກາຂອງເຈົ້າໜ້າທີ່ພາສີຂາເຂົ້າ-ຂາອອກ, ລະບົບຄຸ້ມຄອງຂໍ້ມູນການແຈ້ງພາສີ, ການບໍລິການ ຕິດຊິງຊັ່ງນ້ຳໜັກ, ບັນຈຸຫຸ້ມຫໍ່, ແຍກ, ເພີ່ມມູນຄ່າ ແລະ ຈັດສົ່ງສິນຄ້າ, ແລະ ເຄື່ອນຍ້າຍສິນຄ້າເພີ່ມເຕີມ.