ໃນວັນທີ 15 ພຶດສະພາ 2024, ທີ່ກະຊວງແຜນການ ແລະ ການລົງທຶນ ໄດ້ຈັດພິທີເຊັນສັນຍາ ພັດທະນາບໍ່ແຮ່ໂຄງການຂຸດຄົ້ນ, ປຸງແຕ່ງ ແລະ ສົ່ງອອກ ແຮ່ເຫຼັກ ຢູ່ເຂດບ້ານໜອງກະປາດ, ເມືອງບົວລະພາ ແຂວງຄຳມ່ວນ ລະຫວ່າງ ລັດຖະບານ ແຫ່ງ ສປປ ລາວ ຮ່ວມກັບ ບໍລິສັດ ພະລັງງານ ຣາຊີຕາ ຈຳກັດ, ເປັນກຽດເຂົ້າຮ່ວມໃນພິທີເຊັນສັນຍາໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍແຮ່, ພ້ອມດຽວກັນນີ້ກໍ່ຍັງມີ ທ່ານ ຫົວໜ້າຫົວການ, ຫົວໜ້າກົມ, ຫົວໜ້າພະແນກ ຈາກສູນກາງ ແລະ ທ້ອງຖິ່ນ, ຜູ້ຕາງໜ້າຈາກບໍລິສັດ ກໍ່ໄດ້ເຂົ້າຮ່ວມ.
ໂດຍອີງຕາມໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 74/ນຍ, ລົງວັນທີ 24 ເມສາ 2024, ທີ່ມອບສິດໃຫ້ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາ ເຊິ່ງຕາງໜ້າເຊັນໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ໜັ້ນຍືນ ຄິດສະໜອນຫົວໜ້າພະແນກແຜນ ແລະ ການລົງທຶນ ແຂວງຄຳມ່ວນ ຮ່ວມກັບ ບໍລິສັດ ພະລັງງານ ຣາຊີຕາ ຈຳກັດ, ເຊິ່ງຕາງໜ້າເຊັນໂດຍ ທ່ານ ສົມພອນ ອຸດອນ ຜູ້ອໍານວຍການ ບໍລິສັດ ແລະ ເຊັນເປັນພະຍານໂດຍທ່ານ ຄູນມີ ໂຊກທະວີ ຮຸ່ນສ່ວນບໍລິສັດ.