ພິທີເຊັນສັນຍາ ວ່າດ້ວຍການສຳຫຼວດເກືອໂປຕາສ ຢູ່ເມືອງໜອງບົກ ແຂວງຄຳມ່ວນ

by | Mar 14, 2022 | ການເຄື່ອນໄຫວ | 0 comments

ໃນວັນທີ 11 ມີນາ 2022, ທີ່ກະຊວງແຜນການ ແລະ ການລົງທຶນ, ໄດ້ຈັດພິທີເຊັນສັນຍາວ່າດ້ວຍການສຳຫຼວດເກືອໂປຕາສ, ຢູ່ເຂດເມືອງໜອງບົກ, ແຂວງຄຳມ່ວນ ລະຫວ່າງ ລັດຖະບານ ແຫ່ງ ສປປ ລາວ ຮ່ວມກັບ ບໍລິສັດ ເອັກດີແອວ ບໍ່ແຮ່ ຈຳກັດຜູ້ດຽວ ແລະ ບໍລິສັດ Max Electric Lao ຈຳກັດຜູ້ດຽວ, ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ວັນໄຊ ພອງສະຫວັນ ເຈົ້າແຂວງແຂວງຄຳມ່ວນ, ທ່ານ ນາງ ຄຳຈັນ ວົງແສນບູນ              ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ປອ. ບຸນເຫຼືອ ສິນໄຊວໍຣະວົງ ຮອງລັດຖະມົນຕີ ກະຊວງການເງິນ, ພ້ອມດຽວກັນນີ້ກໍ່ຍັງມີ ທ່ານ ຫົວໜ້າກົມ, ຮັກສາການຫົວໜ້າຫ້ອງການ, ທ່ານ ຫົວໜ້າພະແນກແຜນການ ແລະ ການລົງທຶນ ແຂວງຄຳມ່ວນ, ຫົວໜ້າພະແນກ, ຮອງຫົວໜ້າພະແນກຈາກສູນກາງ ແລະ ທ່ອງຖິ່ນ ພະນັກງານຈາກຂະແໜງການທີ່ກ່ຽວຂ້ອງ ແລະ ຕາງໜ້າຈາກບໍລິສັດກໍ່ໄດ້ເຂົ້າຮ່ວມ, ໂດຍປະຕິບັດຕາມໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 49/ນຍ, ລົງວັນທີ 04 ມີນາ 2022, ທີ່ມອບສິດໃຫ້ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາ, ຕາງໜ້າເຊັນໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະ ການລົງທຶນ ແຂວງຄຳມ່ວນ ຮ່ວມກັບ ບໍລິສັດ ເອັກດີແອວ ບໍ່ແຮ່ ຈຳກັດຜູ້ດຽວ ແລະ ບໍລິສັດ Max Electric Lao ຈຳກັດຜູ້ດຽວ.

          ພ້ອມດຽວກັນນີ້, ບໍລິສັດ ເອັກດີແອວ ບໍ່ແຮ່ ຈຳກັດຜູ້ດຽວ ແລະ ບໍລິສັດ Max Electric Lao ຈຳກັດຜູ້ດຽວ ໄດ້ມອບເງິນຊຸກຍູ້ວຽກງານປ້ອງກັນການແຜ່ລະບາດ ຂອງພະຍາດໂຄວິດ-19, ຈໍານວນ 100 ລ້ານກີບ ຕາງໜ້າໃຫ້ກະຊວງແຜນການ ແລະ ການລົງທຶນ ຮັບໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ມອບໂດຍທ່ານ XU LIN LIN ປະທານບໍລິສັດ ເອັກດີແອວ ບໍ່ແຮ່ ຈໍາກັດຜູ້ດຽວ.