ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ ໄດ້ຈັດພິທີເຊັນຮັບຮອງເອກະສານໂຄງການ (ສະບັບປັບປຸງ) ແລະ ຈັດກອງປະຊຸມຄະນະຊີ້ນຳ ແລະຄຸ້ມຄອງໂຄງການ ການວາງແຜນ ແລະ ການເງິນ ແຫ່ງຊາດ ເພື່ອການພັດທະນາ ແບບມີສ່ວນຮ່ວມ “National Planning and Financing for Inclusive Development Project” ຂຶ້ນ ໃນວັນທີ 18 ມິຖຸນາ 2024 ທີ່ໂຮງແຮມ ແລນມາກສ໌, ນະຄອນຫຼວງວຽງຈັນ. ພາຍໃຕ້ການສະໜັບສະໜູນຈາກ ຫ້ອງການພັດທະນາສາກົນ ປະເທດ ສ.ອາເມລິກາ ແລະ ກະຊວງ ການຕ່າງປະເທດ – ການຄ້າ ປະເທດ ນິວຊີແລນ ໂດຍຜ່ານ ອົງການ ສປຊ ເພື່ອການພັດທະນາ (UNDP) ໂດຍມີຈຸດປະສົງໃນການປັບປຸງເອກະສານດັ່ງກ່າວ ກໍ່ແມ່ນເພື່ອຂະຫຍາຍໄລຍະເວລາ ແລະເພີ່ມງົບປະມານ ເຂົ້າໃນການຈັດຕັ້ງປະຕິບັດກິດຈະກຳຂອງໂຄງການ ພ້ອມທັງ ປຶກສາຫາລື ກ່ຽວກັບການຄຸ້ມຄອງບໍລິຫານໂຄງການ ແລະນຳພາ-ຊີ້ນຳການຈັດຕັ້ງປະຕິບັດໂຄງການ.
ພິທີເຊັນເອກະສານໂຄງການ (ສະບັບປັບປຸງ) ແລະ ກອງປະຊຸມຄະນະຊີ້ນໍາ ແລະຄຸ້ມຄອງໂຄງການ ການວາງແຜນ ແລະ ການເງິນແຫ່ງຊາດ ເພື່ອການພັດທະນາແບບມີສ່ວນຮ່ວມ ໃນຄັ້ງນີ້ ໄດ້ຮັບກຽດເປັນປະທານໂດຍ ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະການລົງທຶນ ແລະ ປະທານຮ່ວມ ໂດຍ ທ່ານ ນາງ ມາຕິນ ເທເຣີ, ຜູ້ຕາງໜ້າ ອົງການ ສປຊ ເພື່ອການພັດທະນາ ປະຈໍາ ສປປ ລາວ. ໃນພິທີດັ່ງກ່າວ ທ່ານ ນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ, ກະຊວງແຜນການ ແລະ ການລົງທຶນ ໄດ້ລາຍງານໃຫ້ຮູ້ ກ່ຽວກັບພາບລວມຂອງໂຄງການ ໂດຍສະເພາະ 03 ເປົ້າໝາຍຫຼັກ ຄື: 1) ບັນດາໜ່ວຍງານຮັບຜິດຊອບການວາງແຜນເສດຖະກິດ-ສັງຄົມ ແຫ່ງຊາດ ໄດ້ຈັດຕັ້ງປະຕິບັດວຽກງານການວາງແຜນໂດຍອີງໃສ່ຜົນໄດ້ຮັບ ເຊິ່ງຈະນໍາມາສູ່ການມີສ່ວນຮ່ວມ ແລະ ການຮ່ວມມືຢ່າງມີປະສິດ ທິຜົນ, ສອດຄ່ອງກັບ ຖະແຫຼງການວຽງຈັນ ວ່າດ້ວຍການເປັນຄູ່ຮ່ວມ ເພື່ອການພັດທະນາ ທີ່ມີປະສິດທິຜົນ ແລະຍຸດທະສາດການເງິນຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX; 2) ບັນດາຂໍ້ລິເລີ່ມ ແລະຄວາມອາດສາມາດແຫ່ງຊາດທີ່ເປັນເປົ້າໝາຍ ໄດ້ປະກອບສ່ວນເຂົ້າໃນການຊຸກຍູ້ກົນໄກການຕິດຕາມ, ກວດກາດ້ານການເງິນ ແລະ ການວາງແຜນ ໃນຫຼາຍໆດ້ານ ໂດຍຜ່ານການການເຊື່ອມໂຍງ ແລະການປະສານງານທີ່ກົມກຽວ; ແລະ 3)ລັດຖະບານມີຄວາມພ້ອມ ໃນການເຊື່ອມໂຍງກອບການເງິນແຫ່ງຊາດທີ່ມີປະສິດທິຜົນ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ. ມີຜູ້ເຂົ້າຮ່ວມທັງໝົດ 50 ກ່ວາທ່ານ ຈາກບັນດາກະຊວງຂະແໜງການ, ຄູ່ຮ່ວມພັດທະນາ,ອົງການຈັດຕັ້ງສາກົນ, ພາກສ່ວນເອກະຊົນ, ອົງການຈັດຕັ້ງທາງສັງຄົມ ແລະພາກສ່ວນກ່ຽວຂ້ອງອື່ນໆ.
ໂຄງການ ການວາງແຜນ ແລະ ການເງິນແຫ່ງຊາດ ເພື່ອການພັດທະນາແບບມີສ່ວນຮ່ວມ (NPFID) ສ້າງຂື້ນ ເພື່ອປັບປຸງກົນໄກການປະສານງານຂອງ ບັນດາໜ່ວຍງານທີ່ສໍາຄັນຂອງລັດຖະບານ ທີ່ມີໜ້າທີ່ຮັບຜິດຊອບໃນການສ້າງ ແລະ ຈັດຕັ້ງປະຕິບັດຍຸດທະສາດການພັດທະນາແຫ່ງຊາດ ໂດຍສະເພາະແມ່ນການປະສານງານ ແລະການຮ່ວມມື ລະຫວ່າງ ກະຊວງແຜນການ ແລະ ການລົງທຶນ, ກະຊວງການເງິນ ແລະ ກະຊວງການຕ່າງປະເທດ ໂດຍມີເປົ້າໝາຍ ເພື່ອສ້າງແຜນພັດທະນາຮ່ວມກັນ ໃຫ້ສອດຄ່ອງກັບຂະບວນການສ້າງແຜນງົບປະມານ ແລະເຊື່ອມສານເປົ້າໝາຍການພັດທະນາແບບຍືນຍົງ (SDGs) ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ (NSEDP). ນອກຈາກນັ້ນ ໂຄງການ NPFID ຍັງມີຈຸດປະສົງເພື່ອພັກດັນພາລະບົດບາດຂອງໜ່ວຍງານຂະແໜງການ ເພື່ອປຶກສາຫາລືກັບ ຄູ່ຮ່ວມພັດທະນາ (SWGs) ໃນການກະກຽມ ແລະຈັດຕັ້ງປະຕິບັດວຽກງານຂະບວນການໂຕະມົນ ທີ່ເປັນເວທີທີ່ສຳຄັນ ໃນການປຶກສາຫາລື ແລະລະດົມແລ່ງທຶນ ເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ.
ໃນປີນີ້, ໂຄງການ NPFID ກໍໄດ້ກ້າວເຂົ້າສູ່ປີທີສອງຂອງການຈັດຕັ້ງປະຕິບັດ ແລະໄດ້ທຶນເພີ່ມຈາກ ຫ້ອງການພັດທະນາສາກົນ ປະເທດ ສ.ອາເມລິກາ (USAID) ແລະ ກະຊວງການຕ່າງປະເທດ – ການຄ້າ ປະເທດ ນິວຊີແລນ (NZ-FMAT) ສະໜັບສະໜູນເປົ້າໝາຍການພັດທະນາແບບຍືນຍົງ ແລະການຫັນປ່ຽນທາງດ້ານເສດຖະກິດ-ສັງຄົມຂອງລາວ. ການເພີ່ມງົບປະມານດັ່ງກ່າວ ຈະຊ່ວຍໃຫ້ໂຄງການສາມາດຂະຫຍາຍໄລຍະເວລາການຈັດຕັ້ງປະຕິບັດໄປຮອດເດືອນ ມິຖຸນາ 2026 ແລະຂະຫຍາຍຂົງເຂດການສະໜັບສະໜູນອອກຕື່ມອີກ ເຊີ່ງເປັນຂົງເຂດທີ່ສຳຄັນ ໃນການການສ້າງແຜນພັດທະນາເສດຖະກິດສັງຄົມ 5 ປີຄັ້ງທີ 10 ໂດຍສະເພາະການມີສ່ວນຮ່ວມຂອງຫຼາຍພາກສ່ວນ ທັ້ງນີ້ ກໍ່ເພື່ອສ້າງຄວາມຍືນຍົງ ແລະບັນລຸວິໄສທັດ 2030 ອັນຈະນຳພາປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDC).
