ພິທີເຊັນ ສັນຍາວ່າດ້ວຍການ ສຳຫຼວດ ຫີນແກຣນນິດ ແຮ່ອັງຕີມອນ ແລະ ແຮ່ຕິດພັນ ຢູ່ເຂດເມືອງໂພນທອງ ແລະ ເມືອງວຽງຄຳ ແຂວງຫຼວງພະບາງ

ໃນວັນທີ  25 ເມສາ 2024, ທີ່ ກະຊວງແຜນການ ແລະ ການລົງທຶນໄດ້ມີ ພິທີເຊັນ ສັນຍາວ່າດ້ວຍການ ສຳຫຼວດ ຫີນແກຣນນິດ ແຮ່ອັງຕີມອນ ແລະ ແຮ່ຕິດພັນ ຢູ່ເຂດເມືອງໂພນທອງ ແລະ ເມືອງວຽງຄຳ ແຂວງຫຼວງພະບາງ ລະຫວ່າງ ລັດຖະບານ ແຫ່ງ ສປປ ລາວ ຮ່ວມ  ກັບ ບໍລິສັດ ໄທຊານ ຈິວຈິວ ມາຍນິ້ງ ຈຳກັດ. ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ອິນທະວົງ  ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ພ້ອມດຽວກັນນີ້ກໍ່ຍັງມີບັນດາທ່ານຫົວໜ້າຫ້ອງການ,​ຫົວໜ້າກົມ, ຮອງກົມ,​ຮອງຫົວໜ້າຫ້ອງການ, ຫົວໜ້າພະແນກ, ຮອງຫົວໜ້າພະແນກ ຈາກສູນກາງ ແລະ ທ້ອງຖີ່ນ ພະນັກງານທີກ່ຽວຂ້ອງຈາກບໍລິສັດກໍ່ໄດ້ເຂົ້າຮ່ວມ.

ໂດຍອິງຕາມ ໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 71/ນຍ, ລົງວັນທີ 19 ເມສາ 2024 ທີ່ມອບສິດໃຫ້ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາ, ເຊິ່ງຕາງໜ້າໃຫ້ລັດຖະບານ ແຫ່ງ ສປປ ລາວ ເຊັນໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ທອງພັດ ອິນທະວົງ  ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ທ່ານ ປອ ສີທະລອນ ສີໂພໄຊ ຮອງຫົວໜ້າພະແນກແຜນການ ແລະ ການລົງທຶນ ແຂວງ ຫຼວງພະບາງ ກັບ ບໍລິສັດ ໄທຊານ ຈິວຈິວ ມາຍນິ້ງ ຈຳກັດ ເຊິ່ງຕາງໜ້າເຊັນໂດຍ ທ່ານ LIU FA  ບໍລິສັດ ໄທຊານ ຈິວຈິວ ມາຍນິ້ງ ຈຳກັດ ແລະ ເຊັນເປັນພະຍານ ໂດຍ ທ່ານ YU YOUG CHAO ຮອງປະທານ ບໍລິສັດ ໄທຊານ ຈິວຈິວ ມາຍນິ້ງ ຈຳກັດ. ນອກນັ້ນ, ທາງບໍລິສັດຍັງໄດ້ມອບເງິນໃຫ້ແກ່ລັດຖະບານ ຈຳນວນ 500,000 ໂດລາສະຫະລັດ ແລະ ມອບເງິນຊ່ວຍເຫຼືອໃຫ້ແກ່ ອົງການປົກຄອງ ແຂວງຫຼວງພະບາງຈຳນວນເງິນ 50,000 ໂດລາສະຫະລັດ.